واشنگٹن کی کالی دیوار

اپنی فیروز بختی پہ نازاں 
سیہ پوش دویوارپر
آب زرسے لکھے نام 
پڑھتےہوئے 
میری آنکھیں پھسلتی ہوئ 
نیہہ پرجاگریں 
الغِیاث! الاَماں! 
ایک بستی کے جسموں کا گارا
سیہ ماتمی مرمروں کے تلے
اس کی بنیاد کا رزق تھے 
زائریں۔۔۔۔۔۔۔۔۔۔۔۔۔۔۔۔۔۔۔۔۔۔۔
جوُق در جوُق  
اس غم زدہ دل گرفتہ کو
اشکوں کے نذرانے دیتے 
فقط آب زرسے لکھے نام گنتے ہوئے
اور وہ جنکی تعداد گنّےکو
گنتی کاکوئ عددہی نہ تھا
جنکے جسموں کے گارے سے تھاپی ہوئ خشت
 تھامے تھی دیوارکو
کوئ اک اچٹتی ہوئ سی نظربھی ادھرنہ گئ 
میری آنکھیں دھنسی جا رہی تھیں 
پگھلے جسموں کی دلدل میں
آ نکھیں دھنسی جا رہی تھی 
کہ دیوارکی ایک ٹھوکر۔ ۔ 
حقارت بھری ایک ٹھوکرنے
واں سے کہاں لا کے پھینکا ۔۔۔۔۔۔۔۔۔۔۔۔۔۔۔۔۔۔۔۔۔۔۔
میری سوسالہ غربت۔۔۔ خجالت کی تاریخ ہے
میرا ماحول ہے 
اورمیں ہوں 
شراب طہورہ کی
خواہش، طلب اورلذت میں دھت
اپنی گرتی حویلی کی چوکھٹ سے لپٹی 
مری نیم مردہ سی آنکھیں ہیں 
سوچیں ہیں، نظمیں ہیں 
اورآب زرسے لکھے نام 
مجھ پرہنسے جارہے ہیں 
اونچا اونچا ہنسے جارہے ہیں