(Last Updated On: )
وقت کی مینوں رنگ وکھائی جاندا اے
بے قدرا بے مول بنائی جاندا اے
رہبر میرا اپنے محل اسارن لئی
قوم دے ہتھ کشکول پھڑائی جاندا اے
توں تے سجناں وقت گزاری کیتی سی
دل تے اج وی قول نبھائی جاندا اے
وقت نے جس دا سورج جوبن تے کیتا
وقت ہی اس دا چن گہنائی جاندا اے
اوہدا قلم پیمبر ہویا ویلے دا
جیہڑا ستے لوک جگائی جاندا اے
ہر پاسے جے خوشیاں ڈیرے لائے نیں
دل کاہدا فر سوگ منائی جاندا اے
سچا او فنکار اے جیہڑا دکھ جر کے
غم دے مارے لوک ہنسائی جاندا اے
تابشِ جگ توں جھولی بھر کے کنڈیاں دی
راہواں دے وچ پھل وچھائی جاندا اے
