پیارے پنجابیو
،،،،،،ونڈ نہیں گنڈھ دی لوڑ اے،،،،،
بُڈھے بابے دے لکڑاں دے گٹھے تے جنگل دے تِناں بلداں توں لے کے کبوتراں دے ڈار تے شکاری دے جال تیکر اسیں نِکیوں لا توں اِکو گل ای پڑھی سُنی تے پڑھائی وی پر خورے کیوں سانوں اج تک ایس گل دی سمجھ نہیں آئی ساتھوں ایس گل تے عمل نہیں ہویا۔ ساڈے پڑھے لکھے جِیاں توں لے کے ان پڑھ تے متھے ٹھوک لوکاں نوں وی پتا اے بئی ایکا کیہ ہُندا اے ایکے دی کیہ طاقت اے کہڑیاں گلاں سانوں رل کے بہن نہیں دیندیاں کہڑے لوک نیں جہڑے نہیں چاہندے جو پنجابی متر اک ہو کے اپنی ماں بولی نوں اوہدا حق دوان لئی کُجھ کرن
سانوں اک دوجے لئی مثبت رویے دی لوڑ اے ۔سانجھ دی لوڑ اے سچ بولن تے سچ نوں تسلیم کرن دی لوڑ اے
جے بابا اپنے پُتراں نوں گٹھے راہیں ایکے دا سبق سیکھا سکدا اے جے جنگل دے بلد رل کے شیر نوں بھجا سکدے نیں ۔جے کبوتر ایکے نال شکاری دا جال لے کے اُڈ سکدے نیں تے ایہ گل ساڈی سمجھ کیوں نہیں آؤندی
پنجابی نوں اوہدا حق دوان لئی اج ہو رہیاں کوششاں نوں ہور تیز کرن دی لوڑ اے
چنگا لکھن دی لوڑ اے جس زبان کول ادب دے انمُلے خزانے ہون اوہنوں ساری دُنیا منن تے مجبور ہو جاندے ای ایتھے چنگا لکھن والیاں دی قدر نہیں کیتی جاندی سگوں لتھاں کھچن دی کوشش کیتی جاندی اے
بہتے لکھاری وچارے مالی مجبوریاں دی پاروں کتاب ای نہیں چھپوا سکدے جے بالاں دا پیٹ کٹ کے چھاپ لین تے مفت ونڈن تے مجبور نیں
گھٹ توں گھٹ کتاب چھاپن لئی تے لکھاری دی مدد دا کوئی نہ کوئی ذریعہ ہونا چاہیدا اے
انج وی ہُندا اے ایوارڈ دی تقریب تے 277 ستائی دیگاں تے پک جاندیاں نیں تقریب تے لکھاں روپیہ خرچ کر دتا جاندا اے پر لکھاری نوں خالی ایوارڈ ۔کجھ دوست کہن گے ایوارڈ تے ایوارڈ ای ہُندا اے میں کہناں ڈِھڈ تے ڈِھڈ ای ہندا
ایہ وی ہونا چاہیدا اے ہر لکھاری دی حوصلہ افزائی کیتی جائے ہر کتاب نوں کُجھ نہ کُجھ دتا جائے
میرٹ دا خیال وی رکھیا جائے تاں جے کسے دی حوصلہ شکنی نہ ہووے
گل ایکے دی چلی سی پنجابی متروں میں پنجابی بارے بہت پُر اُمید آں میں کدی مایوس نہیں ہویا پنجابی نوں اوہدا مقام تے حق مِلنا ای مِلنا اے ایہنوں کوئی نہیں روک سکدا
بس سانوں پنجابیاں نوں بھائی چارے آپسی پیار تے محبتاں دی لوڑ اے
تنظیماں اداریاں تے لکھاری بھراواں آپسی اختلاف بھُلاون دی لوڑ اے اک پلیٹ فارم تے اکھٹیاں ہون دی لوڑ اکو ٹرین چہ بہن دی لوڑ اے
مفاد پرستیاں بُھل کے قُربانیاں دی لوڑ اے
بھاویں میں ہوواں بھاویں کوئی ہور اک گٹھے وانگ جُڑن دی لوڑ اے تِن بلد بنن دی لوڑ اے ونڈدی نہیں گنڈھ دی لوڑ اے
فر پنجابی نوں کوئی نہیں روک سکدا پنجابی سکولاں چہ رائج وی ہووے گی پنجابی دیاں سیٹاں وی نکلن گیاں پنجابی تے پنجابی لکھاریاں نوں حق وی ملے گا کتاباں وی چھپن گیاں اج چنگے لکھاریاں دی کوئی گھاٹ نہیں ہر کھیتر چہ سوہنا تے سُچا لکھیا جارہیا اے
لوڑ اے تے بابے دا لکڑاں دا گٹھا بنن دی۔لوڑ اے تن بلداں دی لوڑ اے کبوتراں دے ڈار دی
ڈارں دی کوئی راہ نہیں ڈک سکدا
سو ونڈاں نوں بُھلو تے گنڈھا دی کوشش کرو ہر کھیتر چہ جُڑ کے کوشش کرو اپنے علاقے دے ایم۔ پی ۔اے تے ۔ایم۔ این اے اگے پِٹو آون والے ویلے دے امیدواراں نال
دوجے مسئلیاں دا نال نال پنجابی دی گل کرو جہڑا منے اوہنوں ووٹ دیو مردشماری دوران زباناں دے خانے چہ پنجابی لکھو
یونین کونسلاں تے ٹاؤن کمیٹیاں دے چئیرمیناں کولوں پنجابی تقریباں تے پنجابی دی گل کرن لئی زور دیو گھر توں لے کے دفتر تک پنجابی چہ گل کرو
جے اسیں بولاں گے فِر سارا جگ بولے گا
آس اے سارے پنجابی ویر ایس گل تے اتفاق کرن گے نہیں تے فر
،،،،،،نہ کاوان چوں نہ ہنساں چوں،،،،،،،
زہراں ورگی جیکر ہووے
کھنڈ نہیں چنگی ہوندی
بھاویں کنی چنگی لگے
ونڈ نہیں چنگی ہندی
ایہہ کالم فیس بُک دے ایس پیج توں لیا گیا اے۔
