اُردو افسانچہ یہ کشمیر ہے

سری نگر کے انٹرنیشنل ائیرپورٹ سے باہر آتے ہی بھوک سے نڈھال  دونوں جرمن جوڈے ایک اچھے سے ریسٹورنٹ کی تلاش میں سرگرداں بلیوارڈ روڈ پہنچ گئے ۔ ڈل جھیل کے کنارے ایک معروف ریسٹورنٹ میں داخل ہوئے اور اپنا آرڈر پلیس کیا ۔ اب وہ کشمیر کے پُر آشوب حالات کے بارے میں گفتگو کرنے ہی لگے تھے کہ ایک ویٹر ان کے قریب آیا اور انہیں ایک پلے کارڈ دکھایا ۔ " یہاں سیاسی گفتگو کرنا منع ہے " پلے کارڈ پر لکھا تھا ۔ " اوکے او کے " ایک میز کے ارد گرد بیٹھے دو جرمن جوڑوں نے کہا اور اپنا سر اثبات میں ہلانے لگے ۔ اس دوران ایک ویٹر ان کے آرڈر کی تعمیل و تکمیل کرتا ہوا مطلوبہ اشیائے خوردونوش میز پر لگانے لگا ۔ یہ لوگ  کھانے پینے میں لگے اور رومانٹک ہوتے ہوئے رومانی باتیں کرنے لگے ۔ جبھی پلے کارڈ والا ویٹر پھر نمودار ہوا ۔ اُس نے پھر ایک پلے کارڈ دکھایا ۔ " یہاں رومانس کرنا منع ہے " وہ کارڈ دکھا کر جانے لگا تو  جرمن سیاح ہونقوں کی طرح اسے جاتے ہوئے دیکھتے رہے ۔ کھانے کے دوراں انہیں کچھ سردی سی محسوس ہوئی تو یہ یہاں کے موسم کے بارے میں اظہار خیال کرنے لگے جبھی ایک اور پلے کارڈ کی نمائش ہوئی " یہاں موسمیاتی بحث و تمحیص منع ہے " " پر کیوں ۔۔۔۔ ؟" اچانک ایک سیاح چیخا ۔
" کیوں کہ یہ صنم لوٹس کا ذاتی معاملہ ہے " پلے کارڈ دکھایا گیا ۔ " وہاٹ نان سینس ۔" اچانک ایک زنانہ سیاح چیخیں ۔ پھر سے ایک ڈسپلے ہوا ۔ " یہاں چیخنا چلانا منع ہے " او مائی گاڈ ۔۔۔ زنانہ ٹورسٹ زچ ہوکر چیِخیں اور  رونی صورت بنا کر سر تھام کر بیٹھ گئیں ۔ پھر ڈسپلے ہوا " یہاں رونا دھونا منع ہے " " مگر کیوں ۔۔۔۔۔۔۔۔۔۔ ۔؟" اچانک وہ سب شدید غصے میں ایک ساتھ چلائے ۔ جبھی ایک جلی حروف میں لکھا ہوا پلے کارڈ نمودار ہوا ۔
"   کیونکہ یہ کشمیر ہے  !!!!!!   "