توازن اردو ادب تنقیدی پروگرام نمبر 15
محفلِ مسالمہ (پارٹ 2). کی رپورٹ
از :-
مسعود حسّاس و خُبیب تابش
محرم و عاشورہ ایک دوسرے کیلیے لازم و ملزوم کی حیثیت رکھتے ہیں یہی بنیاد ہے کہ ان میں سے کسی ایک کا نام لیا جائے تو دوسرا از خود ذہن میں کوند جاتا ھے
محرم و عاشورہ کے تعلق سے بہت سی باتیں ہمارے درمیان مشتہر ہیں کچھ کا تعلق احادیث سے ہیں اور کچھ ہمارے معاشرے کی پیدا کردہ بھی ہیں
تاہم ان کو احترام و محبت کی نگاہ سے دیکھا جاتا ہے جسے نیک شگون تصور کیا جانا چاھیے
عاشورہ فقط ہمارے دور میں ہی قابل احترام ہے ایسا قطعا نہیں بلکہ اس کے روابط صدیوں سے مربوط نظر آتے ہیں
نبی کریم صلعم کی بعثت سے قبل کفار مکہ کے یہاں عاشورہ کے دن روزہ کی حالت میں کعبے کا غلاف تبدیل کرنے کا رواج تھا جبکہ انہیں ایام میں یہودِ مدینہ بھی روزے کا اہتمام کرتے تھے کیونکہ انکا ماننا تھا کہ اسی مبارک دن اللہ پاک نے موسی علیہ السلام کو فرعون سے نجات دیتے ہوئے اسے غرق کردیا تھا
البتہ کفار مکہ کا روزہ موسی علیہ السلام کے احترام میں نہیں بلکہ کہا جاتا ھے کہ انہیں کچھ باتیں حضرت ابراہیم سے ملی تھیں جس کے سبب روزہ رکھا کرتے تھے
جبکہ ہم مسلمانوں نے حضور اکرم صلی اللہ علیہ وسلم کے فرمان کو سینے سے لگاتے ہوئے عاشورہ کو محترم گردانا جس کی تشریح میں علماء نے متعدد وجوہات رقم کی ہیں
ویسے مورخین نے اس دن کی اہمیت کو اجاگر کرتے ہویے کئی تاریخی سوانح و واقعات درج کیے ہیں مثلا
اسی دن سیدنا امام حسین علیہ السلام کی شہادت ہوئ
اسی دن اللہ کے رسول نے ام المومنین خدیجہ رضی اللہ عنھا سے نکاح کیا
اسی دن قیامت قائم ہوگی
اسی دن ایوب ع س کو شفا ملی
اسی دن اسمعیل ع س کی پیدائش ہوئ
اسی دن سلیمان ع س کو سلطنت واپس ملی
اسی دن موسی ع س پہ توریت نازل ہوئ
اسی دن انہیں فرعون سے نجات ملی
اسی دن یوسف ع س کی اپنے ابو جان سے ملاقات ہوئی
اسی دن انہیں مصر کا منسٹر بنایا گیا
اسی دن نوح ع س کی کشتی جودی پہاڑ پہ اتری
اسی دن خلیل اللہ کیلیے انگارے گلزار بنائے گیے
اسی دن آسمان پیدا کیا گیا
اسی دن آدم ع س کی تخلیق ہوئ
اسی دن ان کی توبہ قبول ہوئ
اسی دن زمین بنائ گئ
اسی دن یونس ع س مچھلی کے پیٹ سے باہر آئے
اسی دن عیسی ع س کو آسمان پہ اٹھایا گیا
اسی دن ان کی پیدائش بھی ہوئ
اسی دن بارش کا پہلا قطرہ زمین پہ پڑا
ایسی نہ جانے کتنی تاریخی باتیں ہیں جو اس دن سے منسوب کی جاتی ہیں بنا بریں حضور اقدس صلی اللہ علیہ وسلم کی متعدد روایتیں متعدد طرق سے اسی دن کی اہمیت کے واسطے مروی ہیں جسے کسی طور بھی نظر انداز نہیں کیا جا سکتا
اسی بنیاد پہ توازن اردو ادب گروپ نے محرم الحرام کے پیش نظر محترم صابر جاذب صاحب کی زیرِ صدارت مسالمے کا احمر جان کی قیادت میں انعقاد کیا جبکہ اس کےمہمانانِ
خصوصی افروز رضوی صاحبہ کراچی پاکستان وآغا نیاز مگسی صاحب پاکستان جبکہ مہمانِ اعزازی گل نسرین صاحبہ پاکستان ، ارسلان فیض کھوکھر صاحب پاکستان اور عامر یوسف صاحب پاکستان تھے جس کی نظامت حرف و صوت پہ قدرت رکھنے والی خوبصورت لب و لہجے کی شاعرہ غزالہ تبسم غزال صاحبہ اور میرِ بزم احمر جان صاحب نے کی۔ تنقیدی پہلو سے ڈاکٹر لبنی آصف صاحبہ، شہزاد نیّر صاحب، نعیم جاوید صاحب، ظہور انور صاحب اور حکیم نعمان صاحب کے علاوہ مسعود حساس صاحب نے بھر پور نمائندگی کی
جس میں پیش کیے گیے کلام پہ تحریری و صوتی پیغامات موصول ہوئے جنہیں من و عن پیش کیا جا رہا ہے۔ پیش خدمت ھے شعراء کا محفلِ مسالمہ (پارٹ 2) میں پیش کردہ مکمل کلام
حمد پاک
_________
مرے لہجے کی زباں کی مری گفتار کی لاج
اس نے رکھی ھے ھمیشہ مرے کردار کی لاج
________
اے خدا میں تری ممنون _ کرم ھوں تو نے
شب کے آنگن میں رکھی دیدہء بیدار کی لاج
_________
چاند تاروں سے مری رات سجانے والے
ھے ترے ھاتھ میں افلاک_ ضیاء بار کی لاج
________
میں بھی دیکھوں گی ترے گھر کو کبھی رب_ کریم
اپنی آنکھوں میں سجا کر ترے دیدار کی لاج
_________
ھر کڑی دھوپ میں اے نیل گگن کے مالک
تیرے سائے نے رکھی سایہء دیوار کی لاج
________
میں تری راہ میں تھک جاوں جو چلتے چلتے
پھر تجھے رکھنی پڑیگی دل_ بیمار کی لاج
_______
میرے مالک نے اسے اور سر افراز کیا
خاک_ طیبہ میں ملی جب مرے پندار کی لاج
_______
ظلم ھوتا ھے جہاں بھی تو وہیں اسکے خلاف
تو ھی رکھتا ھے ھمیشہ مری تلوار کی لاج
_________
تجھ کو دیکھوں میں کبھی خواب میں جلوہ افروز
تجھ سے کہتی ھے تری طالب_ دیدار کی لاج
افروز رضوی
کراچی۔۔۔۔پاکستان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نعتِ پاک
سارے عالم سے سوا اچھا لگا
رشکِ جنت طیبہ اچھا لگا
یک زباں انسانیت یہ کہہ اٹھی
اسوہء خیرالوریٰ اچھا لگا
جن کی عظمت پر خدا بھیجے سلام
ان کو ٹوٹا بوریا اچھا لگا
جو نبی کی شانِ اقدس میں بندھا
ہم کو ہر وہ قافیہ اچھا لگا
چاند ،سورج ،کہکشاں، پھیکے لگے
نور شاہِ دو سَرَا اچھا لگا
محفلِ شعر و سخن جب بھی سجی
ہم کو ذکرِ مصطفٰی اچھا لگا
جس گھڑی بھی زیر لب کاشف مرے
نام ان کا آگیا اچھا لگا
احمد کاشف۔ مہاراشٹر ۔انڈیا
۔۔۔.۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
من و تو کا فرق مٹ جائے، جو چاہے ہو تو ایسی ھو
جو سوچوں میں تو سن پائے سماعت ھو تو ایسی ھو
حقیقت کا تو دعوی' ھے مگر حکم شریعت پر
جو اپنی کھال کھنچوائے ارادت ھو تو ایسی ھو
بس اک اذن رسالت پر سبھی لے آئے اور گھر پر
اسی کا نام چھوڑ آئے رفاقت ھو تو ایسی ھو
مقام کربلا پہ کیا بچا تھا جانتے سب ہیں
نیابت قائم رہ جائے امامت ھو تو ایسی ھو
غزال خوش نوا پائے تمھارے گیت ہی گائے
نا وہ محروم رہ جائے عنایت ھو تو ایسی ھو
غزالہ تبسم غزال اسلام آباد پاکستان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منقبت در شان آلِ یٰس علیہم السلام
جس کے دل میں عشق اہلبیت رہتا بھی نہیں ۔
جس کو زندہ کہ سکیں وہ ایسازندہ. بھی نہیں ۔
جب بھی دل سے لے لیا مینے علی مولی کا نام۔
کام میرے ہوگئے وہ جنکو سوچا بھی نہیں
اے یزیدوں دیکھ لو تم یہ شہیدوں کا مقام
کٹ گئے سب کے گلے اور کوئی مردہ بھی نہيں
ایسے سوئے بستر سرکار پہ مولی علی
درمیاں خطروں کے جیسے کوئی خطرہ بھی نہیں
ہو گیا محکم یقیں انکی حفاظت پر مجھے
بارش آفات برسی اور میں بھیگا بھی نہیں
کس قدر معجز نما ہے انکی چشم دور بیں
پڑھ لیا سب حال دل کا اور میں بولا بھی نہیں
کیسے ہو سکتی ہے مجھ میں آپ میں یکسانیت
آپ ٹھہرے اک سمندر اور میں قطرہ بھی نہيں
ہوگیا جب تو غلام سیدِ سردارِ خلد
عزؔم اب گمراہ ہوجانے کا خطرہ بھی نہیں
محمد شاکر عزؔم ٹھاکردوآروی مرادآباد یوپی انڈیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
موسیٰ کی طرح پاٸی ولادت جہان میں
حکمِ خدا سے آ ٸی امامت جہان میں
پیدا ہوےتو ارض و سماں جھومنے لگے
در عسکری کا آکے ملک چومنے لگے
لاٸے گا وہ نظام حسین ابنِ علی کا
لیگا وہ انتقام حسین ابنِ علی کا
نسلِ یزید تختِ یزیدی کو ہٹانے
بن کر ضیا وہ آٸےگا ظلمت کو مٹانے
اک بار پھر دھر سے وہ کفار مٹانے
آٸے گی ذوالفقارِ علی ساتھ نبھانے
رب جانتا ہے عزمِ وفا میں حسین پر
کیا کیا نہ ہوا دشت بلا میں حسین پر
اللہ کر رہا ہے حفاظت امام کی
ہے آرزو حسین کے بس انتقام کی
جب انتقام ہوگا مکمل جہان میں
ہوگا جہان سارا انہی کی امان میں
سارے کمین و کفر جہنم کو جاٸیں گے
کعبہِ میں ہم حسین کا پرچم لگاٸیں گے
جعفر نہ کمی آٸے زرا بھی ایمان میں
ہونگے پرہيز گار انہی کی کمان میں
جعفر بڑھانوی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جبریل کرنے آٸے نظامت غدیر میں
تھامی رسول نے بھی صدارت غدیر میں
عبدِ خدا کا جشن منانے کے واسطے
مصرع دیاعلی کی ولایت غدیر میں
فرمانِ کبریاٸی سنا جب رسول نے
پڑھنے لگی قصیدہ نبوت غدیر میں
خواہیش تھی جانشین بنیں گےرسول کے
کام آٸی نہ کسی کی سیاست غدیر میں
من کنت مولا کہہ کے نبی نے اٹھا لیا
پہنا کے سر پہ تاج ولایت غدیر میں
قرآن کر رہا ہے ثنا بو تراب کی
ساری فضیلتوں کی وضاحت غدیر میں
بعدِ رسول دیں کی حفاظت کے واسطے
جبریل لاٸے ایسی ضمانت غدیر میں
جبریل کہہ رہے تھے مبارک ھو یاعلی
دونوں جہاں کی پاٸی ریاست غدیرمیں
جعفر خدا نے دین مکمل کرا لیا
کی ہےنبی نےاسکی وضاحت غدیر میں
جعفر بڑھانوی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منقبت
کوٸ حسین سا کیسے دکھاۓ یہ دنیا
مثال کوٸ اگر ہو تو لاۓ یہ دنیا
ذرا بھی ہو اگر عرفانِ مقصدِ شبّیر
درِ حسین پہ سر کو جھکاۓ یہ دنیا
عذابِ حشر سے بچنے کی بس یہ صورت ہے
نبی کی آل کو دل میں بساۓ یہ دنیا
حسین سا تو بڑی بات اس کا ذکر ہی کیا
در حسین سا در ہی دکھاۓ یہ دنیا
وقار جن کا خدا نے بلند رکھا ہے
گھٹا سکے تو گھٹا کر دکھاۓ یہ دنیا
علم میں حضرت عباس کا اٹھاتا ہوں
ذرا جھکا کے مجھے اب دکھائے یہ دنیا
یہی دعا ہے خدا سے کہ ایں میرے شبّیر
رضا کو آپ کا منگتا بتاۓ یہ دنیا
رضاالحسن رضا پاٸتی کلاں امروہہ یو پی بھارت
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سلام بحضور امامِ عالی مقامؑ
ڈاکٹر لبنیٰ آصف
امام ِ فقر و ولایت حسینؑ تجھ پہ سلام
تو نورِ شمعِ رسالت حسینؑ تجھ پہ سلام
شہید کرب وبلا اے سراپا صبرورضا
جلیسِ تختِ رسالت حسینؑ تجھ پہ سلام
صلاۃِ قائم ودائم اسی کو کہتے ہیں
نماز میں ہو شہادت حسینؑ تجھ پہ سلام
تو بخششوں کا وسیلہ ہے تجھ پہ لاکھ درود
تو رحمتوں کی بشارت حسینؑ تجھے سلام
بہ پیشِ جبرِ مسلسل بہ نوکِ تیر و سناں
تیرے قیام پہ حیرت حسینؑ تجھ پہ سلام
یہ شیر خوار یہ کمسن یہ عصمتیں یہ نحیف
یہ ساز و رخت یہ ہجرت حسینؑ تجھ پہ سلام
تیرے بغیر کسی کو کہاں نصیب قرار
تو اوجِ صبروقناعت حسینؑ تجھ پہ سلام
یہ بندگی کو جو تابندگی عطا کی ہے
حسینؑ تیری عبادت حسینؑ تجھ پہ سلام
تیرے لہو نے معلیٰ کیا ہے صحرا کو
تیرے قدم کی فضیلت حسینؑ تجھ پہ سلام
سوادِ ظلم بھی ہے سجدہ ریز تیرے حضور
عروجِ شانِ ولایت حسینؑ تجھ پہ سلام
ڈاکٹر لبنیٰ آصف
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منقبت درشان امام عالی مقام
ہے دلوں پر آج بھی قبضہ علی کے لال کا
پڑھتا ہے سارا جہاں خطبہ علی کے لال کا
شہر طیبہ میں تھا اک کہرام برپا ہر طرف
غم میں ہے ڈوبا ہوا کنبہ علی کے لال کا
تین دن کے بھوکے پیاسے سید و انصار نے
ساتھ ہر اک جا دیا مولیٰ علی کے لال کا
ہر طرف گونجی صدائیں نعرۂ تکبیر کی
مسکرایا جب کبھی بیٹا علی کے لال کا
تھر تھرا اٹھے یزیدی، خوف سے لرزہ ہوئے
آ گیا جب رن میں شہزادہ علی کے لال کا
لشکر کوفہ میں ہر سو کھلبلی سی مچ گئی
کربلا میں دیکھ کر جذبہ علی کے علی کا
مذہب اسلام کو پھر سے ملی ہے زندگی
رنگ لایا ہے لہو مولیٰ علی کے لال کا
شمع خیمہ بجھ گئی پر ہل نہ پایا ایک شخص
اسقدر چہرہ تھا تابندہ علی کے لال کا
لا نہیں سکتی ہے یہ دنیا کبھی اسکا جواب
نیزے پر قرآن کا پڑھنا علی کے لال کا
ہند ہو اجمیر سنجر ہو خراساں یا حلب
بٹ رہا ہے ہر جگہ صدقہ علی کے لال کا
کربلا سے شام تک اور شام سے شہر نبی
ہے امیر کاروں بیٹا علی کے لال کا
کرتا ہے شبیر کا قرآن جب خود تذکرہ
کیوں نہ ساحل پھر پڑھے خطبہ علی کے لال کا
شاہ رخ ساحل تلسی پوری، بلرامپور- لکھنؤ، الہند
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
"السلام یا امامِ عالی مقام "
ذکرِ کربل ہُوا برائے حسین
اشک کرنے لگے ثنائے حسین !
دینِ برحق کی سر بلندی کو
نیزے پر آیتیں سنائے حسین !
سب یزیدی چلن کے پیرو تھے
کون سنتا وہاں صدائے حسین؟
قول ایسے بھلا نبھائے کون؟
قول جیسے مِرا نبھائے حسین !
صبر کی کوئی تو مثال ملے
جو مکمل ہو ماسوائے حسین !
اور بھی ہیں شہادتیں لیکن
ہے میسر کسے ادائے حسین؟
کربلا و فرات روتے تھے
بین کرتے تھے ہائے ہائے حسین !
عقل میری اسیر ہے اُن کی
میرا دل بھی ہے مبتلائے حسین !
عصرِ حاضر یزیدیت کا ہے
آؤ امت تمہیں بلائے حسین !
(ساحل عباس)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منقبت سید الشہد اءامام حسینؑ
لب تک فلک کو یاد ہے عظمت حسین کی
غیروں پہ بھی عیاں ہے عزیمت حسین کی
مثل رسول ہاشمی صورت حسین کی
ناقابل بیان ہے رفعت حسین کی
ایوان ظلم کی ہے اطاعت خودی کی موت
دیتی یہی تو درس ہے سیرت حسین کی
عزم و وفا کی راہ کا ہے نام کربلا
ہے سنگ راہِ عشقِ صعوبت حسین کی
تحریک و انقلاب جہاد اور اجتہاد
ہیں یہ اصولِ زیست ہی سنت حسین کی
نا اہل کو نہ دو کہ امانت ہے اقتدار
کرتی ہے یہ تقاضہ محبت حسین کی
دینِ ہدا کے دیس نکالا پہ ہو خموش
کیا چاہتے نہیں ہو معّیت حسین کی
کیا مقصدِ حسین تھا سوچا نہیں کبھی
باقی ہے بس زباں پہ حکایت حسین کی
طاغوت حکومت و بیعت ہے گو قبول
پھر کیوں رلا رہی ہے شہادت حسین کی
تیغیں یزیدیت کے محافظ ہیں آج بھی
ہے آج بھی دلوں پہ حکومت حسین کی
غیرِ خدا کا حکم ہو نافظ ذمین پر
کیا دوستو یہی ہے عقیدت حسین کی
پہچانِ حق نہیں ہے کہ باطل نہیں عیاں
کیوں کھو چکے ہیں ہم وہ امانت حسین کی
ابنِ عزیز سا کوٸ لیگا عمر جنم
تازہ اگر ہو پھر سےشجاعت حسین کی
حق کے مشن کو دے کے رگِ جاں کا گرم خوں
قاٸم کرو جہان پہ سطوت حسین کی
ابنِ زیاد چھا گۓ عصرِ جدید کے
نعمان دہر کو ہے ضرورت حسین کی
حکیم نعمان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تمہارا میرا رہنما حسین ؓ ہے حسین ؓ ہے
تِیرہ شَبی میں راستہ حسین ؓ ہے ؓ حسین ہے
دُکھی دلوں کاحوصلہ حسین ؓ ہے حسین ؓ ہے
گرے ہوؤں کاآسراحسین ؓ ہے حسینؓ ہے
جو کی تھی اسماعیلؑ نے وہ ابتدا حسِین تھی
اس ابتدا کی انتہا حسین ؓ ہے حسین ؓ ہے
سنائی دےرہی ہیں خوب مِدحتیں حسین ؓ کی
نگر نگر جَگہ جَگہ حسین ؓ ہے حسین ؓ ہے
بتاؤں کس کی ہار تھی؟بتاؤں کس کی جیت ہے؟
یزید تھا یزید تھا، حسین ؓ ہے حسین ؓ ہے
اب اس سے بڑھ کے اور کیا بیان ہوں فضیلتیں
جوہے مشابہ مصطفیؐ حسین ؓ ہے حسین ؓ ہے
سنے گا میری التجا دعاؤں پر ہے اِکتفا
اگرچہ میں ہوں بے نوا حسین ؓ ہے حسین ؓ ہے
اشرف علی اشرف
سندھ پاکستان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مرثیہ
مَیں جب ہوا مُبتلا حُسین کے غم میں
نہ کوئی غم بھی رہا، حُسین کے غم میں
نہیں کروں گا کسی یزید کی بیعت
قبول مجھ کو قضا حُسین کے غم میں
ملے وراثت میں مجھ کو آل کے دکھ ہیں
تبھی ہوں رونے لگا حُسین کے غم میں
یہ لوگ تو لوگ، مجھ کو لگ رہے غمگین
پرند، پانی، ہوا حُسین کے غم میں
خدا کا پھر نور پھوٹنے لگا مجھ میں
مرا یہ دل جب جلا حُسین کے غم میں
اُسے خدا بخش دے گا آپؐ کے صدقے
کہ اشک جس کا بہا حُسین کے غم میں
مَیں اُمّتی بھی اُسی نبی کا ہوں، جس کا
اُداس دل تھا ہوا حُسین کے غم میں
میں خود کو محسوس کربلا میں کرنے لگا
یہ مرثیہ جب لکھا حُسین کے غم میں
جہان میں روشنی اُسی دیے کی ہے
جو کربلا میں جلا حُسین کے غم میں
کہو حُسینی مرے قبیل کو لوگو!
سکون ہم کو ملا حُسین کے غم میں
نبی خدا سے کرے، حُسین نانا سے
کہ لفظ سیکھا وفا حُسین کے غم میں
یہ زندگی ایک بوجھ لگتی تھی اکمل
جو ہو گئی خوش نما حُسین کے غم میں
اکمل حنیف، لاہور پاکستان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نثار دل و جاں کروں الفت حسین پر
اللہ کی ہو خاص عنایت حسین پر
کیسا محمدی ہے پرکھنے کے واسطے
اتری ہے کبریا سے شہادت حسین پر
قربان کنبہ ہو گیا میرے حسین کا
قربان خود بھی ہو گئی ہمت حسین پر
نیزے سجا ہے سر پھر بھی کلمہ کہے زباں
واجب اسی طرح تھی عبادت حسین پر
کرتا رہوں میں پیش درود ان کی آل پر
مجھ کو یوں آ رہی ہے محبت حسین پر
خالد سروحی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جو سامنے یزید کے پیکار ہو گئے
وہ حوصلے زمین کا معیار ہو گئے
خوداریوں کے ساتھ عجب تھا سفر کوئی
سب معتبر حسین کے انکار ہو گئے
ہر رات میں یزید کہیں کانپتا نہ ہو
ہر صبح میں حسین کے آثار ہو گئے
کیا لوگ تھے فرات سدا سوچتا پھرا
کیا ہو گئے وہ لوگ جو آزار ہو گئے
بپھرے غمِ حسین سے دریا ہیں آج تک
صحرا اسی سے صاحبِ اسرار ہو گئے
صدیوں سے جل رہے ہیں ہوا میں بقا کے ساتھ
کچھ سر بکف چراغ جو انوار ہو گئے
جو کربلا میں بک گئے دل کے عوض حسین
صحرا میں جیسے مصر کے بازار ہو گئے
چھاؤں میں گھومتی ہے زمیں آسماں کے سنگ
وہ ہر قدم پہ سایہِ دیوار ہو گئے
عامر گزر گئی تھی قیامت کہ کربلا
لگتا تھا سب عذاب سرِ دار ہوگئے
عامر یوسف
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منقبت درِ شام ِ غریباں
تو نے تو اے یزید مرا دل جلا دیا
لاشوں کی بھیڑ میں مرا اصغر لِٹا دیا
اکبر کہیں پڑا مرا ، سر کے بنا حسین
آلِ محمدی کو لہو میں نہا دیا
ماتم کناں تھی ریت یہ عترت رسول کی
پاکیزہ چادروں کو سروں سے ہٹا دیا
غربت کی شام چھا گئی عریان دشت میں
دشمن نے آل_ پاک کا خیمہ جلا دیا
پہرے بٹھا دئے تھے جو نہر ِ فرات پر
سوکھے لبوں کی پیاس نے دریا رُلا دیا
باطل۔ کے سامنے کبھی حق سے نہیں ہٹا
کر بل میں سر حسین نے اپنا کٹا دیا
عشرت کے اس خمار سے کافر ہوا یزید
حرُ کو وفا کی شان نے ایماں سکھا دیا
ڈرتی ہے مجھ سے موت مرے اشک دیکھ کر
گل کو غم ِ حسین نے جینا سکھا دیا
جاروب کش درِ بتول پاک
گل_ نسرین
ملتان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منقبت بحضور سیدنا امام حسین رضی اللہ عنہ
تاقیامت آپ کی ہے حکمرانی یا حسین رضی اللہ عنہ
ہے ازل سے ہی ابد تک جاودانی یا حسین رضی اللہ عنہ
آپ کی بخشی ہوئی ہے زندگانی یا حسین رضی اللہ عنہ
"آپ کو حاصل ہوئی ہے کامرانی یا حسین رضی اللہ عنہ "
گلشنِ زہرہ کی دیکھو گل فشانی یا حسین رضی اللہ عنہ
لٹ گئی اکبر کی قاسم کی جوانی یا حسین رضی اللہ عنہ
کربلا میں سر کٹا کر آپ نے ثابت کیا
آپ نے کی دینِ حق کی ترجمانی یا حسین رضی اللہ عنہ
دیکھئے پیاسی سکینہ ہے خدایا جاں بلب
آج تک نادم ہے دریاؤں کا پانی یا حسین رضی اللہ عنہ
آپ نےسینچالہو سے دین کایہ گلستاں
آپ کی ہم پر سدا ہے مہربانی یا حسین رضی اللہ عنہ
ہر طرف قائم عبادت کی بہاریں دیکھیے
ہر طرف ہے دینِ حق کی ضوفشانی یا حسین رضی اللہ عنہ
مٹ گیاپل بھرمیں دیکھوکس طرح نامِ یزید
آپ کی قائم رہے گی حق بیانی یا حسین رضی اللہ عنہ
وہ بہتر جو کٹے تھے کربلا میں ارسلان
مل گئی اُن کوحیاتِ جاودانی یا حسین رضی اللہ عنہ
ارسلان فیض کھوکھر پسرور سیالکوٹ پاکستان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منقبت بحضور سیدنا امام حسین رضی اللہ عنہ
نانا کے دین کو تھا بچایا حسین رضی اللہ عنہ نے
میدانِ کربلا کو سجایا حسین رضی اللہ عنہ نے
تھا غم بھی مبتلا ترے صدمے میں یا حسین رضی اللہ عنہ
ایسا بلند مقام ہےپایا حسین رضی اللہ عنہ نے
کٹوا کے سرحسین رضی اللہ عنہ نے سجدے میں دیکھیے
قرآن نیرے پر تھا سنایا حسین رضی اللہ عنہ نے
انسان کی بقا کو بچاتی رہی نماز
اور سجدے کی بقا کو بچایا حسین رضی اللہ عنہ نے
اصغر کی لاش اور کبھی قاسم کی لاش کو
اک ایک لاشے کو تھا اٹھایا حسین رضی اللہ عنہ نے
اک ایک بوند خوں کی لُٹائ تھی جنگ میں
عہدِ وفا کوخوب نبھایا حسین رضی اللہ عنہ نے
جنت کے شاہزادے ہیں ابنِ علی رضی اللہ عنہ سدا
جنت کی آبرو کو ہے پایا حسین رضی اللہ عنہ نے
پہنچے جو کربلا میں بہتّر تھے ارسلان
آخر سبھی کو حق پہ لُٹایا حسین رضی اللہ عنہ نے
ارسلان فیض کھوکھر پسرور سیالکوٹ پاکستان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آنکھ نے دیکھے خدائی کے وہ منظر خاک پر
دین کی تعمیر کرتے تھے بہتر خاک پر
________
درس_ تسلیم و رضا دیتی ھے آواز_ ضمیر
اور برہنہ پاوں تھے سجاد_ مضطر خاک پر
________
کیا قیامت کی گھڑی گزری تھی معصومین پر
پیاس سے بیتاب تھے زہرہ کے دلبر خاک پر
________
انتہا پر دیکھ کر سادات کی تشنہ لبی
سر پٹختے آ گئے تھے سب سمندر خاک پر
________
رد بیعت سے بڑھی کچھ اور توقیر _ حسین
اور روشن ھو گیا ایماں کا ممبر خاک پر
_________
غیر کے ھاتھوں میں پڑ کے دکھ دیا شبیر کو
آہ و زاری کرتا تھا ھر ایک نشتر خاک پر
_______
نیزے پہ شبیر کے افروز کل تھا سر بلند
رو رھا تھا آج تک اک کند خنجر خاک پر
افروز رضوی۔۔کراچی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سلام بنتا ہے حُسینؓ لکھنے سے
کلام بنتا ہے حُسینؓ لکھنے سے
رقیب بھی میرا رفیق بنتا ہے
غلام بنتا ہے حُسینؓ لکھنے سے
یزید جلتے ہیں مگر مِرا اونچا
مقام بنتا ہے حُسینؓ لکھنے سے
زمین ہو یا آسمان پر ، ہر دکھ
تمام بنتا ہے حُسینؓ لکھنے سے
حُسینؓ کے غم میں قدم قدم جینا
دوام بنتا ہے حُسینؓ لکھنے سے
کبھی نہ جھک آغا یزید کے آ گے
کہ نام بنتا ہے حُسینؓ لکھنے سے
آغا نیاز مگسی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لا الہ الا اللہ
شہیدِ حق کی صدا لا الہٰ الا اللہ
پیامِ کرب و بلا لا الہٰ الا اللہ
گلوئے صبر پہ خنجر چلا ستم گر کا
لہو میں ڈوب گیا لا الہٰ الا اللہ
حسین و منی کی تختی پہ آج تک کندہ
ہے نقشِ مہرِ وِلا لا الہٰ الا اللہ
بریدہ سر کی تلاوت پہ کان دھر تو سہی
کہ آ رہی ہے صدا لا الہٰ الا اللہ
دہانِ دین پہ ظالم کا شرمناک ستم
حسینً پڑھتا رہا لا الہٰ الا اللہ
یہ اور بات کٹیں گردنیں 72 کی
جہاں میں بچ تو گیا لا الہٰ الا اللہ
نبیؐ کا خون ہے لخت علیؑ کی نس نس میں
لبوں پہ صبح و مسا لا الہٰ الا اللہ
دیارِ شام،عدو،بیٹیاں محمدؐ کی
ردائے آلِ عبا لا الہٰ الا اللہ
کریں وہ حکم مودٙت کا تجزیہ جاذبٙ
ہو جن کی فکرِ رسا لا الہٰ الا اللہ
صابر جاذب۔ لیہ۔ پاکستان
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اخیر میں صدر محفل صابر جاذب صاحب نے فرمایا کہ توازن اردو ادب کا شکر گزار ہوں کہ اس با برکت محفل کا حصہ بناکے مجھے سرفرازی عطا کہ در اصل حسین اور انکے رفقاء انسانیت کا سرمایہ ہیں حرف انکار جس کسی نے بھی پیشانی پہ لکھا وہ دو اصل اجتماعی ضمیر ھے اور جس نے بھی جبر واستبداد کی بیعت سے انکار کیا وہ استعارئہ حریت ہے حسین اور خانوادئہ حسین کے علاوہ ان کے رفقاء و جانثاران سبھی مزھب و مسلک مقام و ملک رنگ و نسل سے اوپر اٹھ کر انسانیت کے لیے مشعلِ راہ ہیں
ہمارے توازن اردو ادب کے تمام شعرا نے اچھا اور معیاری کلام پیش کیا جسے میں دورانِ مشاعرہ سنتا رہا اور ان پہ تبصرے بھی کرتا رہا اخیر میں نظامت کی تعریف کرتے ہوئے اپنا کلام بھی حصول تبرک کیلیے پیش فرمایا ۔
مسعود حساس کویت
خبیب تابش انڈیا
