توازن ادب تنقیدی پروگرام بعنوان چاند

(Last Updated On: )

توازن اردو ادب کے فورم پر لفظِ چاند کے عنوان پر تنقیدی مشاعرہ مورخہ ١٤اپریل بروز دوشنبہ 2019 کو منعقد ہوا۔ توازن اردو ادب میں شامل شعراء کرام نے اپنی فطرت کے مطابق  رواں پروگرام میں بھی بڑھ چڑھ کے حصہ لیا جس کی وجہ سے خوبصورت کلام پڑھنے اور سننے کو ملے۔

اس پروگرام کی صدرات خوبصورت لب و لہجے کے مالک مشہور شاعر اور عمدہ قلم کار جناب آغا نیاز مگسی بلوچستان پاکستان نے فرمائی جنکی تشریف آوری نے پروگرام کو چار چاند لگا دیۓ۔محترم جناب احمر جان پاکستان نے جو کہ توازن ادبی گروپ کے چیف آرگنائزر ہیں انہیں کی نشاط آوار شخصیت کے ہاتھوں کا کمال تھا کہ ہاتھوں ہاتھ پروگرام منعقد کیا جسے ہاتھوں پہ لیا گیا یہاں اس امر کی وضاحت ناگزیر ہے کہ شعور کی بالیدگی ہی شعر گوئی کی جانب متوجہ کرتی ہے ازاں بعد موزونئی طبع اپنے جوہر دکھاتے ہوئے اسے ردھم عطا کرتی ہے پھر مشاہدے مطالعے و مشورے جیسے اسلحے شعر میں اثر پذیری کوفزوں تر کرتے ہیں

اس سلسلے میں مشاہدے کو بڑی اہمیت حاصل ہے کہ یہی عنصرِ خاص ہی شعر گری کی جانب متوجہ کرتا ہے

ہمارا مشاہدہ گواہ ہے کہ جب جب خون اور آگ کی ہولی کھیلی گئی تب تب کچھ نہ کچھ حساس لوگوں نے اس پہ قلم اٹھایا حتی کہ اسی کے بطن سے متعدد تحریکوں نے بھی جنم لیا

مگر اس سے بھی انکار نہیں کیا جا سکتا کہ شعرگری میں عشق و محبت چاہت اور الفت نے بھی اپنا کردار بخوبی نبھایا ہے اور جب بات آجائے محبت کی چاہت کی اپنائیت کی تو دلی ہیجانی کیفیت کو کسی طور درکنار نہیں کیا جاسکتا

اور کیا کیا جائے کہ یہ جنونی کیفیت ایامِ فراق میں چاند دیکھتے ہوئے دو آتشہ ہوجاتی ہے

تو آئیے چاند جیسے اہم ترین موضوع پہ اشعار پیش کرتے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کبھی   ہوا   کہ   لبِ   بام   آ   گیا  ہو  چاند

کبھی سناکہ کسی گھرمیں چاندنی ٹھہری

امین اوڈیرائی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وحشت اسی سے پھر بھی وہی یار دیکھنا

پاگل کو جیسے چاند کا دیدار دیکھنا

عبیداللہ علیم

 

چاند نکلا تو سمندر کے کنارے جاگے

لوگ سب سو گئے تب درد کے مارے جاگے

ہر ستارے کو بتا دو جو ہیں راتوں کے الم

جو ہمارا ہے وہی ساتھ ہمارے جاگے

احمدمنیب

 

انتخاب۔ سید زیرک حسین اسلام آباد

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

رات یہ کیسا نکلا چاند

 آدھا بادل آدھا چاند

پنکھڑیوں پر موتی پھیلے

رات کو اتنا رویا چاند

 

ہر ایک شام کسی یاد کے کنارے سے

میں چاند دیکھتی تھی جھیل میں اترتے ہوئے

 

ڈاکٹر لبنیٰ آصف

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اس کے چہرے پہ داغ کیسا ہے

چاند رویا یے رات بھر شاید

اصغر شمیم

۔۔۔۔۔۔۔۔۔۔۔۔۔۔۔۔۔۔۔۔۔۔۔

میرے آنگن میں چاند کیا اترا

وقت مٹھی میں آ گیا میری

ملک سکندر پاکستان

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چاندنی رات کا مزاج نہ پوچھ

ہم غریبوں  کے  گھر  نہیں آتی

عبدالحمید عدم

انتخاب۔ شجاعت رجوی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہزاروں ظلمتوں کو چیر کر اک چاند جو نکلا

چلو اے دوستوإ اب روشنی سے عید ملنا ہے

امیرالدین امیربیدرکرناٹک بھارت

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 

فلک پہ چاند جو روشن ہے یوں سحاب کے ساتھ

یہ استعارہ ترے رُخ کا ہے نقاب کے ساتھ

.

 

اس کو دیکھا کہ جب حجاب نہ تھا

چاند کے سامنے سحاب نہ تھا

.

 

اس کے چہرے کی رونقیں واللہ

ایسا روشن تو ماہتاب نہ تھا

سعید سعدی بحرین

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مطلعِ عشق پر انوکھا چاند

تیرا چہرہ ہے یا چمکتا چاند

 

اُس کا چہرہ بس گیا آنکھوں میں یوں

چاندنی شب جیسی آنکھیں ہو گئیں

بنت سعد (اسلام آباد)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چاند   میرا  اسقدر  پاکیزہ   ھے

مجھ کو لگتا ھے اٹھا حرمین سے

غزالہ تبسم غزال

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چاند کی فصیلیں تھیں اور مکان شیشے کا

میں نے خواب میں دیکھا سائبان شیشے کا

عینی زا سید

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اور چاند رات ہے

 

ہاتھوں میں اس کے ہاتھ ہے اور چاند رات ہے،

دل دل کے ساتھ ساتھ ہے اور چاند رات ہے

کلیاں ہیں اس کی زلف میں، گجرے ہیں ہاتھ میں،

حوروں کو آج مات ہے اور چاند رات ہے

جذبوں کا اک فرات ہے اور چاند رات ہے

کومل فراز !!  دل مرا، اس پر یہ ظلم ہے،

نظروں کی واردات ہے اور چاند رات ہے

اطہر حفیظ فراز 3جون 2019

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ابھی تاروں سے کھیلو چاند کی کر نوں سے اٹھلا ؤ

ملے گی اس کے چہرے کی سحر آہستہ آہستہ

مصطفی زیدی

انتخاب۔ غزالہ انجم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

الجھے الجھے سے خال و خد میرے

الجھی الجھی سی ہیں لکیریں بھی

اب ستارے بھی ہیں گریزاں سے

اور کہاں چاند کی فصیلیں بھی

وہ مجھے بولنے نہیں دیتا

ہیں میرے پاس تو دلیلیں بھی

 عینی زا سید

۔۔۔۔۔۔۔۔۔۔۔۔۔۔۔۔۔۔۔۔۔۔۔

مرے دل کو بنا کر اک نشانہ

مسلسل چاند ماری کر رہا ہے

اترتے  چاند  کا  وعدہ   تمہارا

مری آنکھوں کو بھاری کر رہا ہے

جابر ایاز سہارنپوری

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہم نوا چاند کہ ہم راز کہ تم دل میں ہو

ہر طرف ہے یہی آواز کہ تم دل میں ہو

.

سایہِ چشم میں اترا رخِ  جاناں کا فسوں

وہی  چہرہ  وہی انداز کہ تم دل میں ہو

عامر یوسف لاہور پاکستان

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سرد راتوں میں کبھی چاند سے جھلسے گا بدن

اور کبھی ذہن کو خوشبو کی ردا دکھ دے گی

میں اندھیروں سے نھی ڈرتا مگر تیرے بغیر

چاندنی رات جب آۓ گی بڑا دکھ دے گی

      کامل جنٹیوی بھارت

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

چشمِ جاناں میں کہ اک فتنہِ جاں چاند میں ہے

جلوہ پرداز وہ جیسے کہ نہاں چاند میں ہے

عامر یوسف لاہور پاکستان

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دھیمی دھیمی روشنی سے فیض میں پاتا رہا

چاند جب ٹھہرا ہوا تھا بام و در کے درمیاں

اصغر شمیم

۔۔۔۔۔۔۔۔۔۔۔۔۔۔۔۔۔۔۔۔۔

 

"تارک"

چودھویں رات کے چاند کو چھوڑ کر  میں کدھر جا رہا ہوں

مجھے چاند کہتا ہے

"آؤ مری حُکمٙرانی میں دیکھو ذرا زندگی کے نظارے

مرے ساتھ تم بھی جلو رات بھر

آفتابی کرن کا کرو سامنا 

ساحلوں سے اچھل کر ہوا میں گُھلو

میری طاقت کے سب راز تم جان لو

جزر اور مد کو کیسے بناتا ہوں میں

کیوں سمندر میں ہلچل مچاتا ہوں میں 

کون گرتا ہے کس کو اٹھاتا ہوں میں

آج کی رات کیکر تنے سے نکالے گا رس

آج مادہ پپیتے کے پھولوں پہ پولن گرانے چلی ہے ہوا

آج سیل فون کی بیٹری ختم ہونے تلک بات ہو گی

مگر تشنگی بجھ نہیں پاۓ گی

آج کی رات مٹّی کا بیٹا نئی فصل بونے چلا جاۓ گا"

چودھویں رات کے چاند!!!

یہ ساری باتیں میں اچّھی طرح جانتا ہوں

یہ سب دیکھنے کی،یہ سب جاننے کی،ہمیشہ سے خواہش رہی ہےمگر۔۔۔۔۔۔۔

آج کی رات سب چھوڑ کر میں کدھر جا رہا ہوں

تجھے یہ خبر ہی نہیں

آج کی رات چاہت لحاف اوڑھ کر ساتھ لیٹے گی میرے ذرا دیر بس ۔۔۔۔۔۔

(عامر لیاقت عامر)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

وہ خاموش راتوں میں ۔۔۔۔۔۔میرا اداس  چاند ۔۔۔۔دل کی طرح ویران چاند۔۔۔۔۔۔اکیلا تنہا اضطراب چاند۔۔۔۔۔۔میرے خوابوں کی طرح۔۔۔۔۔۔ادھورا چاند۔۔۔۔۔۔۔نصیب کی طرح داغ دار چاند۔۔۔۔۔تیرگی میں ڈوبا ۔۔۔۔ پہلی کا چاند۔۔۔۔۔ہجر کا مارا۔۔۔۔روتا چاند۔۔۔۔۔مجھےپکارتا اداس چاند ۔۔۔۔۔۔میرے آنسوں میں بہتا ۔۔۔۔۔۔۔۔ڈوبتا چاند۔۔۔۔۔۔زمین پر میں تنہا۔۔۔۔۔۔آسمان پر وہ تنہا چاند۔۔۔۔۔۔۔بڑھتا گھٹتا۔۔۔۔دل میں میرے اترتا چاند۔۔۔۔۔۔تم۔ہاں تم ہو ۔۔۔۔۔میرے ایک بے وفا چاند

       فدحت جمال کراچی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مرے محبوب کی صورت کہ جس پہ جان بھی حاضر

جمالِ یار سے ہم بھی سدا مرعوب رہتے ہیں

ملا ہے چاند سا چہرہ مقدر سے مجھے آغا

اسی ہم  چاند کے طالب کبھی مطلوب رہتے ہیں

آغا نیاز مگسی بلوچستان

 

خطبہ صدارت۔

اظہار تشکر و اظہارِ مسرت

 

میں ادارہ  توازن اردو ادب  کا نہایت شکر گزار ہوں کہ جس کی انتظامیہ نے مجھے  چاند کے موضوع پر منعقد ہونے والے اس  عالمی آن لاٸن مشاعرہ  کی صدارت سے جیسے اہم ترین اعزااز سے نوازا  اس کے ساتھ ساتھ میں تمام معزز ممبران کا بھی تہہ دل سے شکرگزار ہوں جنہوں نے اس مشاعرے میں حصہ لے کر کامیابی سے ہمکنار کیا  اس مشاعرے میں بہت ہی خوبصورت تخلیقات پیش کی گٸیں  جس کی مجھ ناچیز کو نہایت خوشی اور مسرت حاصل ہوٸی ہے  

اردو ادب کے فروغ میں  ادارہ   ” توازنِ اردو ادب “ نہایت اہم اور فعال کردار ادا کر رہا ہے   جس طرح کے ادبی سلسلے شروع کیٸے گٸے ہیں اس سے ہم ایک دوسرے کی صلاحیتوں ، تجربات اور مشاہدات سے بھرپور استفادہ حاصل کر رہے ہیں جبکہ مجھ جیسے لوگ سیکھنے کے عمل سے گزر رہے ہیں  کیوں کہ اس گروپ میں استاذ کے درجے پر فاٸز مرد و خواتین شعرا موجود ہیں جن کی ہمہ وقت ہنماٸی حاصل ہے  میری دعا ہے کہ  یہ ادارہ اسی طرح بلکہ اس سے بھی زیادہ اردو ادب کے فروغ کیلیٸے اپنا فعال کردار ادا کرتا رہے گا

 

آپ سب کا ممنون و شکر گزار

 

 آغا نیاز مگسی

نصیرآباد بلوچستان  (   پاکستان)