جیون کی آرزو میں سانسیں ادھار مانگیں
جیون نے جب ستایا سارا ادھار پھینکا
اس خوب صورت شعر کی خالق پاکستان کی معروف شاعرہ اور ماہر تعلیم محترمہ پروفیسر شائستہ سحر صاحبہ ہیں ۔ جس شاعرہ کا جیون یا زندگی سے اس طرح کا واضح اور کھرا انداز تخاطب ہو اس کے تخیل کی پرواز کا بخوبی اندازہ لگایا جاسکتا ہے ۔ ان کی شاعری کا اہم موضوع اور ہدف زندگی اور منزل کا تعین اور حصول ہے جس کے لیے وہ عازم سفر تو ہیں مگر پرعزم ہیں وہ زندگی سے ان کی شرائط پر زندہ رہنے کا سمجھوتہ کرنے پر ہرگز تیار نہیں وہ اصولوں کی بنیاد پر جینا چاہتی ہیں بصورت دیگر خودداری کا مظاہرہ کرتے ہوئے ایسی سانسوں کو واپس پھینکنے کو ترجیح دیتی ہیں ۔ان کو زندہ رہنے کی آس اور تمنا تو ہے مگر کسی بھی موقع پر خودداری سے دستبرداری ان کو قبول نہیں ہے ۔
محترمہ شائستہ سحر صاحبہ میر پور خاص سندھ میں عبدالغنی میمن کے گھر میں پیدا ہوئیں ۔ ان کی والدہ محترمہ کا نام زبیدہ خاتون جبکہ شریک حیات کا نام شکیل احمد ہے ۔ شائستہ صاحبہ کا اصل نام شائست پروین ہے اور سحر ان کا تخلص ہے۔ انہوں نے سندھ یونیورسٹی جام شورو/ حیدرآباد سے ارردو ادب میں ماسٹرز کی ڈگری حاصل کی اور تعلیم کے شعبے سے وابستہ ہو گئیں ۔ اس وقت وہ خاتون پاکستان کالج کراچی میں اسسٹنٹ پروفیسر کے عہدے پر تعینات ہیں ۔انہوں نے 1986 سےشاعری کا آغاز کیا ان کی شاعری کے اب تک 4 مجموعے شایع ہو چکے ہیں جن میں " عذاب آگہی 1997 متاع فکر 2015 کرب آرزو 2016 اور بے دھیانی حال ہی میں مارچ 2020 میں شایع ہو چکا ہے ۔
شائستہ سحر صاحبہ کی شاعری سے ایک نمونہ کلام اور چند منتخب اشعار آپ کے ذوق کی نذر ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
غزل
تکرارِ ہست و بود سے باہر نکل کے دیکھ
اک بار تو قیود سے باہر نکل کے دیکھ
تجھ کو دکھاؤں جلوہ ء صد رنگ آرزو
پابندی ء سجود سے باہر نکل کے دیکھ
اک ساعتِ سعید بھی آئے گی درمیاں
ہنگامہ ء وجود سے باہر نکل کے دیکھ
بے انتہا میں جا کے مزا انتہا کا لے
مے خانہ ء حدود سے باہر نکل کے دیکھ
غفلت کی نیند کھا نہ جائے قوتِ خودی
اس حالتِ غنود سے باہر نکل کے دیکھ
کب تک رہے گی پردہ ء ظاہر کی آب و تاب
اب حلقہ ء نمود سے باہر نکل کے دیکھ
پھر سنگ پھینک جھیل میں کچھ اضطراب ہو
اے زندگی جمود سے باہر نکل کے دیکھ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رستوں کو تعویذ بنا کر دل میں رکھ لوں
شاید ایسے خود تک آیا جا سکتا ہے
۔۔۔۔۔۔۔۔۔۔۔۔۔۔
ایک تو شعر کا اپنا ہے عذاب
اور پھر اس پہ پذیرائی کا دکھ
۔۔۔۔۔۔۔۔۔۔۔۔۔۔۔۔۔۔۔
تری چاہت میں جتنے موڑ آئے
مری زلفوں میں اتنے خم نہیں تھے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مرے چہرے سے نوچ کر آنکھیں
خواب پھرتے ہیں دربدر میرے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آیت عشق کی تلاوت میں
آنکھ انجیل ہو گئی ہوگی
شائستہ سحر
