شفقت عاصمی صاحب ایک ایسے ادیب، شاعر، مصنف، محقق، مترجم، سفر نامہ نگار ، ماہر تعلیم اور ماہر لسانیات ہیں جن کی خداداد صلاحیتوں اور حب الوطنی پر بجا طور پر فخر کیا جا سکتا ہے ۔ یہ ان کی اپنے وطن،اپنی سرزمین اور اپنی قوم سے بے پناہ محبت کا واضح ثبوت ہے کہ انہوں نے بلوچستان میں رہ کر بلوچی لوک گیتوں کو پنجابی میں ترجمہ کیا ہے جو کہ پاکستان کی ادبی تاریخ میں شاید ایسی پہلی کاوش اور تصنیف ہے اور بلا شبہ یہ تاریخی اہمیت کا حامل کام ہے اس سے بلوچ اور پنجابی قومیتوں کے درمیان قربت اور محبت ہی پیدا ہو سکتی ہے اور دوریاں ختم کرنے میں کافی مدد مل سکتی ہے ۔ شفقت عاصمی صاحب نے فقط اسی پر ہی اکتفا نہیں کیا ہے بلکہ انہوں نے پشتو ضرب الامثال پر تحقیق کر کے ان کا اردو ترجمہ کر کے ایک اور قابل فخر ادبی کارنامہ سر انجام دیا ہے ۔
بلوچستان کے یہ فرزند شفقت عاصمی صاحب 6 جون 1968 کو مسلم باغ ضلع قلعہ سیف اللہ میں پیدا ہوئے جن کے والد صاحب کا نام محمد یوسف چشتی ہے ۔ عاصمی صاحب کا اصل نام شفقت علی ہے اور شفقت عاصمی ان کا قلمی نام ہے ۔انہوں نے ایم فل ایجوکیشن کیا اور ماہر مضمون کی حیثیت سے محکمہ تعلیم بلوچستان میں تعینات ہو گئے ۔ ان کی اب تک 5 کتابیں شایع ہو چکی ہیں جن میں
1 دریچہ سخن یہ ان کا شعری مجموعہ ہے جو 2012 میں سرچ پبلیکیشنز سانگلہ ہل لاہور سے شائع ہوا۔
2 دائروں کے درمیاں یہ بھی ان کا شعری مجموعہ ہے یہ بھی لاہور ہی سے دعا پبلشر کے زیر اہتمام 2017 میں شایع ہوا ۔
3 بلوچی ویہڑا یہ تصنیف بلوچی لوک گیتوں کا پنجابی میں ترجمے پر مشتمل ہے جو کہ پاکستان میں اس نوعیت کی پہلی کتاب ہے جس کو پلاک گورنمنٹ آف پنجاب نے 2018 میں شائع کیا ۔
4 معروضیات اردو یہ ایک درسی کتاب ہے جو 2017 میں آسان پبلشرز لاہور سے شائع ہوئی ہے ۔
5 ملغرلے یہ بھی ایک تحقیقی کتاب ہے جو پشتو ضرب الامثال پر مشتمل ہے اس میں ضرب الامثال کا پس منظر بھی لکھا گیا ہے یہ پبلشر لاہور کے تحت 2019 میں شائع ہوا ہے ۔ عاصمی صاحب کی 3 مزید کتابیں زیر اشاعت ہیں جن میں
1 خواب، پرندے اور شمال( بولان سے دیوسائی ) یہ ایک سفرنامہ ہے
2 دیوار سندھ کے اس پار یہ بھی ایک سفرنامہ ہے
3 رقص فعولن یہ ان کا اردو شعری مجموعہ ہے
عاصمی صاحب کو بہترین ادبی خدمات کے اعتراف میں سرائے ادب انٹرنیشنل لاہور کی جانب سے خصوصی ایوارڈ دیا گیا ہے ۔
شفقت عاصمی صاحب کی پہلی نظم "تکمیل " کے عنوان سے 1985 میں روزنامہ مشرق کوئٹہ میں شائع ہوئی تھی اور وہ اس وقت میٹرک کے طالبعلم تھے ۔ شفقت صاحب دیگر اکثر ادباء اور شعراء سے اس لیئے بھی مختلف اور ممتاز ہیں کہ انہوں نے پاکستان کی قومیتوں کے درمیان اپنی تخلیقی صلاحیتوں کے ذریعے قریبی تعلقات استوار کرنے بلکہ ایک دوسرے کے قریب لانے کی بھرپور اور مخلصانہ کوششیں کی ہیں جس کےلئے وہ بجا طور پر داد و تحسین اور مبارک باد کے مستحق ہیں ۔ انہوں نے موجودہ ادبی صورتحال پر تبصرہ کرتے ہوئے کہا کہ ادبی سرگرمیاں قابل تحسین ہیں تاہم جو ادبی گروہ بندیاں ہیں وہ باعث تشویش عمل ہیں انہوں نے کہا کہ فروغ ادب کے لیے ادبی اداروں کو فعال کرنے کی بہت ضرورت ہے ۔ سوشل میڈیا کی اہمیت اور کردار کے بارے میں انہوں نے کہا کہ یہ ادب کے فروغ میں بہتر اور فعال کردار ادا کر رہا ہے ۔ شفقت عاصمی صاحب نے ملکی حالات اور موجودہ عالمی وبائی صورتحال کو بھی مدنظر رکھ کر بہت خوبصورت اور جاندار شاعری کی ہے جس کی ایک جھلک معزز قارئین کی نذر ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ کیسا ستمگر اشارا ہوا ہے
بہاروں میں گُل سے کنارا ہوا ہے
اے جانِ جہاں خوف کا ہے یہ عالم
ترے بن بھی رہنا گ وارا ہوا ہے
کہ ہے آسماں ، دھرتی سب کے برابر
سمجھ لو اشارا دوبارا ہوا ہے
یہ ہر سو خموشی یہ تنہائی ، وحشت
سفر بے بسی کا ستارا ہوا ہے
کہ نوچا ہے فطرت کو انساں نے بے حد
اسی واسطے تو خسارا ہوا ہے
نئی سوچ ہوگی ، نیا دور ہوگا
یہ اُمید اپنا سہارا ہوا ہے
وہ آتا ہی ہوگا ذرا دیر میں بس
کہ میں نے خدا کو پکارا ہوا ہے
اگر عاصمی بچ گئے اس وبا سے
نیا اک جہاں پھر ہمارا ہوا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نگر حادثہ ہے ڈگر حادثہ ہے
یہاں زندگی کا سفر حادثہ ہے
سمجھ لو! وبا کے دنوں کی کہانی
ادھر حادثہ ہے ، اُدھر حادثہ ہے
رہو گھر میں اپنے حفاظت سے اب تم
کہ ہر اک یہاں رہ گزر حادثہ ہے
لِکھوں کیسے اب میں وبا کا فسانہ ؟
کہ زیر و زبر ہر سطر حادثہ ہے
ملیں گے تجھے پھر کسی دن " گواڑخ "
یہ دوری فقط بے ضرر حادثہ ہے
یہ شر کی شرارت سِوا کچھ نہیں ہے
رہو دور ان سے خبر حادثہ ہے
حوادث کا اپنا سفر ہے یہاں پر
گزر جائے گا، یہ اگر حادثہ ہے
یہ دنیا بہت خوبصورت ہے شفقت
یہ جینا ، یہ مرنا ، مگر حادثہ ہے ۔
( " گواڑخ " بلوچستان کے پہاڑوں میں کھلنے والا ایک پھول)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وبا کے دنوں میں شاعری ۔۔۔۔ تازہ کلام
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چند منتخب اشعار
یہ جمہوریت اور یہ آسودگی سب
فریب نظر ہے عنایت کے قصے
یہ مخصوص طبقے کی جادو گری ہے
یہ تمغے، بصارت، بسالت کے قصے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اب نہ درکار وضاحت ہے مجھے
آجکل خود سے بغاوت ہے مجھے
بھول جانے کا تجھے سوچتا ہوں
ان دنوں کتنی فراغت ہے مجھے
میں فقط سانس سے رشتہ رکھوں
کتنی محدود رعایت ہے مجھے
شفقت عاصمی
