صابن اور سینیٹائزر

کورونا کے خلاف جنگ کا طاقتور اسلحہ (2)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کسے خبر تھی کہ کورونا یوں بے قابو ہو گا کہ دنیا ہی بدل جائے گی۔
اور کسے خبر تھی کہ اس کے خلاف جنگ کا سب سے بڑا ہتھیار، ایک ایسا سادہ اور سستا سا پرودکٹ ہو گا جو ہر گھر میں پہلے سے ہی موجود ہے۔
جی ہاں قارئین، ان حالات میں صابن سے بڑھ کر قدرت کا کوئی انمول تحفہ نہیں۔ صابن کو معمولی نہ سمجھیں۔ اس کی مدد سے ہم کورونا کے خلاف آدھی جنگ جیت چکے ہیں۔
اس آرٹیکل میں صابن اور سینیٹائزر کے بارے میں اہم ترین معلومات فراہم کی جارہی ہے جسے جاننا ہر انسان کے لئے اشد ضروری ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صابن اور ڈٹرجنٹ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صابن اور ڈٹرجنٹ کی کیمسٹری بہت سادہ ہے۔
صابن جو عموماً تیل یا چربی اور کاسٹک سوڈا کے باہم تعامل سے بنتا ہے، سوڈیم سٹیئریٹ یا سوڈیم پامیٹیٹ وغیرہ پر مشتمل ہوتا ہے۔
اس مالیکول کے دو حصے ہیں۔ ایک ہائڈروفِلک اور دوسرا ہائڈروفوبک۔
پہلا حصہ پانی میں حل ہونے والے اجزاء پر کام کرتا ہے مثلاً تیزاب، نمکیات، اساس وغیرہ۔
دوسرا حصہ ان اجزاء پر کام کرتا ہے جو پانی میں غیر حل پذیر ہوتے ہیں مثلاً تیل، گھی، مکھن، گریس وغیرہ۔
ڈٹرجنٹ کا مالیکیول بھی اس سے ملتے جلتے حصوں پر مشتمل ہوتا ہے۔
صابن کیسے کام کرتا ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہمیں دشمن کی کمزوری کا پتہ ہے اور یہ ہماری بہت بڑی طاقت ہے۔
کورونا وائرس کے جسم کے بیرونی حصے میں لیپڈ (Lipid) کی میمبرین پائی جاتی ہے جو اسکی سب سے بڑی کمزوری ہے۔ یہ لیپڈ ویسا ہی ہے جس سے مکھن یا گھی وغیرہ بھی بنتے ہیں۔
اب ذرا تصور کیجئے، آپ ایک ایسی پلیٹ کو پانی سے دھونے کی کوشش کر رہے ہیں جس پر مکھن مَلا ہوا ہے۔ کیا آپ اسے صرف پانی سے دھو پائیں گے؟ بہت مشکل ہے نا۔۔۔۔ لیکن اگر صابن مل جائے تو؟
۔۔۔ پھر تو جھٹ پٹ دھل جائے گی۔
کیوں؟ کیونکہ صابن کے ہائڈروفوبک حصے نے لیپڈ کو حل کر کے بہا دیا۔
یہی صابن کورونا وائرس کی لیپڈ میمبرین پر اسی طرح کام کرتے ہوئے اسے توڑ پھوڑ کے رکھ دیتا ہے، اس کی حفاظتی دیوار ملیا میٹ کر دیتا ہے اور یوں وائرس تباہ و برباد ہو جاتا ہے۔
جب آپ صابن سے ہاتھ دھوتے ہوئے ہاتھوں کو مَلتے ہیں تو جھاگ پیدا ہوتی ہے (اور جب زیادہ مَلتے ہیں تو زیادہ جھاگ پیدا ہوتی ہے۔۔۔۔ ایک مشہور سیاسی جملہ یاد آ گیا )۔
اس جھاگ کی وجہ سے وائرس اور بیکٹیریا جِلد سے علیحدہ ہو جاتے ہیں اور صابن ان کا بآسانی صفایا کر دیتا ہے۔ اسی لئے ضروری ہے کہ بیس سیکنڈ تک ہاتھ اچھی طرح مَلے جائیں۔
یہاں یہ بات اہم ہے اور سمجھنے کی ہے کہ صابن صابن ہوتا ہے چاہے اصلی ہو یا نقلی (ایک اور سیاسی جملہ )۔ اس میں کسی سیف گارڈ، لائف بوائے گولڈ یا ڈیٹول سوپ کی ضرورت نہیں۔ سستے سے سستا صابن بھی یہی کام کرتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سینیٹائزر Sanitizer
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سینیٹائزر کا لفظ، sanitary سے نکلا ہے جس کا مفہوم گردو غبار اور جراثیموں سے پاک اچھے صحتمند ماحول سے وابستہ ہے۔
سینیٹائزر، کسی بھی ایسی شے کو کہا جاتا ہے جو جِلد کو جراثیموں سے پاک کرنے کے لئے استعمال ہو۔ بنیادی طور پہ یہ اینٹی سیپٹک کے گروہ میں شامل ہے۔ روز مرہ کی زبان میں یہ ایسا لیکوئیڈ ہے جسے ہاتھوں پہ مَل کے جراثیموں کا خاتمہ کیا جا سکے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سینیٹائزر کے اجزاء
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایک معیاری سینیٹائزر مندرجہ ذیل اجزاء پر مشتمل ہوتا ہے۔
1۔ الکحل Alcohol
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ سب سے اہم جزو ہے۔ الکحل کی کئی اقسام ہیں۔ ان میں ایتھائل الکحل یا پروپائل الکحل، سینیٹائزر میں استعمال ہوتے ہیں۔ ان کی کم سے کم مقدار 60 فیصد ہونا ضروری ہے۔ 70 سے 75 فیصد بہتر ہے۔ کم مقدار میں اس کا اثر نہیں ہوتا۔
بازار میں اور آن لائن بکنے والے بہت سے غیر معروف سینیٹائزرز کا کچھ پتہ نہیں کہ ان میں مطلوبہ تناسب موجود ہے یا نہیں۔
2۔ ایلو ویرا جیل Aloe vera gel
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اس کی 25 فیصد مقدار درکار ہے۔ اگر سینیٹائزر سپرے بنانا ہو تو پھر اس کے بدلے پانی لیا جاتا ہے۔
3۔ گلیسرین یا کوئی بھی تیل
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ صرف 2 فیصد درکار ہے۔ تیل میں زیتون، لونگ، کوکونٹ، پیپر منٹ یا کوئی بھی تیل لیا جا سکتا ہے۔
4۔ ہائڈروجن پر آکسائڈ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ اختیاری جزو ہے مگر اس کی شمولیت سے سینیٹائزر کی تاثیر میں اضافہ ہو جاتا ہے۔ اس کی صرف 3 فیصد مقدار درکار ہوتی ہے۔
ان سب کے علاوہ کوئی خوشبو بھی شامل کی جا سکتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اپنا سینیٹائزر خود بنائیے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ مندرجہ بالا اشیاء سے اپنا سینیٹائزر خود بھی بنا سکتے ہیں۔ یہ اشیاء نیچے دی گئی مقدار میں لے کر کسی صاف ستھرے گلاس یا کپ میں چمچے سے اچھی طرح مکس کر لیں۔ 100 ملی لیٹر سینیٹائزر تیار ہو جائے گا۔
1۔ ایتھائل الکحل یا پروپائل الکحل : 70 ملی لیٹر
2۔ ایلو ویرا جیل : 25 ملی لیٹر
3۔ لونگ کا تیل یا پیپرمنٹ آئل : 10 سے 15 قطرے
4۔ ہائڈروجن پر آکسائڈ: آدھا چمچہ اگر دستیاب ہو
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سینیٹائزر کا طریقۂ استعمال
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
1۔ دو سے تین ملی لیٹر سینیٹائزر لیں اور اچھی طرح ہاتھوں پہ ملیں۔ انگلیوں کے درمیان اور ہر جگہ۔
2۔ 40 سے 60 سیکنڈ تک ہاتھ ملیں، جب تک یہ خشک نہ ہو جائیں۔
3۔ گندے ہاتھوں پہ سینیٹائزر کا بہت کم اثر ہوتا ہے۔ لھذا ہاتھ صاف ستھرے ہونا ضروری ہیں۔
4۔ ہاتھوں پر تیل، گریس یا چکنائی لگی ہو، تب بھی اس کا اثر نہیں ہو گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صابن بہتر یا سینیٹائزر؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صابن ہر طرح سے بہتر ہے، لیکن اگر صابن دستیاب نہ ہو یا آپ سفر میں ہوں یا ایسی جگہ جہاں پانی میسر نہ ہو تو پھر سینیٹائزر استعمال کریں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔