رمتے دا دوجا ویاہ

رمتے دا دوجا ویاہ

میرے لالے میری بچپن وِچ شادی کروا دی

شادی کی، ساری عمر دی مینوں قید کرا دی

میں نِکّا وُٹی وڈی میری، جوڑ نہ جوڑیا میرا

میں لگاں جیویں گھوڑی پچھے پھرے بچیڑا

میرے دل نے آکھیا رمتیا، یا مہرا کھا لے

یا اج کل دی کُڑی نال توں ویاہ کروا لے

او خاص جگہ توں فِٹ کُرتے او تنگ شلواراں

اِندر وی مر جائے ویکھ ک ماڈرن مُٹیاراں

جو پھوڑیاں اُتے پٹیاں، ہیکاں تے چُنّیاں

اکھاں نال گلاں کر دیاں کالج دیاں مُنّیاں

کئیاں لمکن گردن وچ جالی دے دوپٹے

اکھاں وِچ کجلا کہر دا، راہ جاندے پٹے

پیا دل وچ دوجے ویاہ دی میں پک پکاواں

کوئی ایہداں دی جے مل جائے تے سُرگ نوں جاواں

اگوں کی دسّاں گل کی انہونی ہوئی

بس ربّ نے سن لئی بندے دی اک عرضوی

میں دوجا ویاہ کروا لیا کد چوڑی چھاتی

بھئی ماواں دھییان میلنا پیئو پُت براتی

اُس بھاگھ بھری ڈولی جد میرے گھر آئی

یتیم خانے دے بینڈ نے اے دُھن وجائی

’’ ہم ابتدائے عشق میں ساری رات جاگے

اب اللہ جانے رمدیا کیا ہو گا آئے‘‘

اے سُندے سارے یاراں نوں آ گئی تریڑی

بھئی ہولی ہولی کھسک گئے سب جانی بیلی

جد ڈولی وچوں نکلی میری لاڈو رانی

اونوں دیکھن لئی آ گئی سب انّی کانی

کئی کہن وہٹی تے نوی اے سوہنئ آئی

پرانی وہٹی نے سُن کے پا دیتی دُھائی

میں پریاں توں وی ودھ ساں جد شادی ہوئی

نی اے کی کرو مقابلہ میرا کلموئی

نئی وہٹی اکھیا پرانئے کی ٹیں ٹیں لائی

تو تو توں نوبت ودھ کے جنگ تیکر آئی

اک نے جھاڑو پھڑ لیا دوجی نے سوٹا

اک نے ساڑھی کَس لئی دوجی نی لنگوٹا

بھئی آمنے سامنے وار دوناں دے ایسے چلے

چھڈاں لگا میں آ گیا دوناں دے تھلے

اوہ اکھاں میچ کے لگ پئیاں بھئی بلے بلے

وار دوناں زنانیاں دے کوئی سورنا جھلے

اس گھر وچ دوناں چوں کوئی اک رہے اے فیصلہ ہویا

پر مینوں دوناں شیرنیاں کرتا ادھ مویا

پر میں وی ڈردے مارے نے کم فوراً کیتا

میں تھلے والا مکان چٹ تے لیتا

وکھو وکھ کر کے میں دوناں نو شکر منایا

ادھو ادھ کر کے میں دوناں دے ونڈے آیا

میں دوجا ویاہ کروا کے ڈاڈا پچھتاواں

اک دن تھلے رواں اک دن اُتے جاواں

اک دن پی کے آ گیا میں بوتل ساری

میں نشے دے اندر بھل گیا مت بوتل ماری

میں چڑھن لگا جد پوڑیاں پئی واج کراری

توں چلیاں اج کتھے بدھوا اج میری واری

اُپرلی کیندی آن دے او کرماں ماری

بس یاراں دی کمرا کے لے گئی خُماری

تھڑلی کیندی پیر اُتے تو پا نی سکدا

اُپرلی کیندی آیا اے تے جا نئی سکدا

تھڑلی پھڑ لیا گٹیو اُتلی نے والوں

میں آکھاں میرے مالکا مینوں کڈھ جنجالوں

اُپرلی کھچے اُپر نوں تے تھلویں تھلے

میں آکھاں ربّا رکھ لے رمدے ہونی چلے

اوناں دوناں مینوں لمکا لیا وانگ کریلے

بھئی جیبھا میری لمک گئی تے نکلے ڈیلے

توری وانگوں لٹک کے رات میری لنگی

اس رات دے نالوں کئی درجے سے پھانسی چنگی

جان دن چڑھدے نال سی دوناں مینوں چھڈیا

میں دھگیا دم زمین تے منہ رہ گیا اڈیا

مینوں ہوش آئی جد لوکاں منہ وچ پانی پایا

تاں اُٹھدے نال ہی میں اے رولا پایا

اوے لوکو میرے وانگ نہ کوئی غلطی کھانا

مُہرا کھانا منظور نہ دوجا ویاہ کروانا