آئی وساکھی کنکاں پکیاں
کھیت نوں واہ کے روڑی پائی
محنت کر کے جان سکائی
آخر گھڑی مبارک آئی
ترسدیاں سی جس نوں اکھیاں
آئی وساکھی کنکاں پکیاں
دھپ ناں مر گئے کیڑے کاڈھے
داتیاں پھڑ کے بہہ گئے واڈھے
ایہہ کرسان بڑے نیں ڈاڈھے
بھتا لے کے ٹریاں سکیاں
آئی وساکھی کنکاں پکیاں
کوٹھیاں دے وچ آ گئے دانے
کملے وی بن گئے سیانے
ہر جی گھر دا موجاں مانے
مرزے پے شنگارن بکیاں
آئی وساکھی کنکاں پکیاں
اج كرسان خوشی وچ آیا
جٹ نے ڈھول تے بھنگڑا پایا
کھیتوں بولھ کنک دا چایا
خرچیا مال اڈاییاں پھکیاں
آئی وساکھی كنكاں پکیاں
تھاں تهاں میلے لگ پے لگن
رن دے نخرے دل نوں ٹھگن
وسر گیا جیوں کٹیا پھگن
ہسدیاں نچدیاں گاؤندیاں جٹیاں
آئی وساکھی كنكاں پکیاں
یا مولا ! ہن مینہ نہ آوے
محنت کتے نہ ورتھا جاوے
کنکاں جٹ بھڑولے پاوے
فر کھیتاں وچ ویجے مکیاں
آئی وساکھی كنكاں پکیاں
نور واہی دی ریت نرالی
ایہہ ہے رب دے نال بھیالی
بھرے کدی یاں رہ جۓ خالی
انج وی گلاں ہندیاں تکیاں
آئی وساکھی كنكاں پکیاں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
