پرائیڈ آف پنجاب ایوارڈ /تے سرائیکی ہیرو
کسے ویر دی دی دِل آزاری ہووے تے ہتھ بنھ کے معزرت
21فروری ماں بولی دیہاڑ تے پنجاب انسٹیٹیوٹ آف لینگوئج آرٹ اینڈ کلچر(پلاک ) ولوں پرائیڈ آف پنجاب دا تے دوجے وکھ وکھ کھیتراں وچ انعاماں دا اعلان کیتا گیا جو پنجابی دے ودھا لئی اِک وڈا کم اے تاں جے پنجابیاں دا حوصلہ ودھے تے پنجابی چہ لکھن والیاں دی حوصلہ افزائی دے نال نال ہور لکھن والیاں نوں پریرنا مِلے۔ایہ کم پہلی وار ہویا جو حکومت ولوں پنجابیاں نوں اینی وڈی رقم دِتی جا رہی اے ایس تے سانوں رجواں خُشی دا اظہار کرنا چاہیدا اے تے ایس کم دی جِنی وی سلاہنا کیتی جائے گھٹ اے
پر ساڈے کُجھ پنجابی ویراں نوں جہدے چہ سرائیکی ویراں دی گنتی چوکھی اے
پورا پورا اپھرے ہو گیا تے طراح طراح دیاں گلاں شروع تےہیرو بنن دے اعلان ۔کسے حقیقت جانن دی کوشش نہیں کیتی
اج ایہ ایوارڈ جہڑے متراں نوں مِل رہے نیں اوہناں نوں مبارکاں دین دی لوڑ اے
کیوں جے کل نوں ساڈے چوں کوئی وی لے سکدا اے
ساڈے لئی سارے پنجابی مان جوگ نیں اوہ مرکزی ہوون سرائیکی ہوون پوٹھوہاری ہوون یا دوجے سارے بھرا نیں سارے ویر نیں ساری پنجابی نیں
اسیں ونڈاں پان دے کُجھ چوکھے ای عادی ہو گئے آں تے ساڈیاں ایہناں ونڈاں نیں ای اج تک کُجھ نہیں ہون دِتا ساڈے ایہناں رولیاں نیں پنجابی دا بہتا نقصان کیتا
اک دوجے دیاں لتاں کچھن نال کُجھ نہیں ہونا اے۔ جو ہونا اے ایکتا نال ہونا اے آپسی پیار نال ہونااے
پہلے نمبر تے جیس پنجابی بھرا نوں وی ایوارڈ ملیا اے اوہ سارے پنجابیاں نوں ای ملیا اے سگوں سارے پنجاب نوں مِلیا اے
رفعت عباس ہووے اشو لال ہووے یا شاکر شجاع آبادی سارے محترم نیں سارے عظیم نیں پر دُکھ ہویا عجیب قسم دے شوشے ون سونے دعوے تے گلاں ۔
جو کرن دی لوڑ اے اوہ اسی کر نہیں رہے
جے لہجیاں نال ای پنجاب نوں ونڈنا اے تے فر پنجاب نوں ٹوٹے ٹوٹے چا کریے نہ پنجاب رہووے تے نہ پنجابی
اج سرائکستاں دا دعویٰ تے کل پوٹھو ہارستان تے پرسوں جھنگوچستان تے چوتھ پتا نہیں کہڑا
مِٹھی بولی دے وارث اینے کوڑے گل جچدی نہیں یار
خورے کدوں سانوں ہوش آؤنی اے
کدی فرقے دا رولا تے پایا پر فرقے بازی چہ کدی رشتے داریاں تے نہیں چھڈیا ساڈے کنے ای رشتے دار سُنی وہابی شعیہ ہوندے نیں اوہناں نوں تے اسیں نہیں چھڈدے
انج پورے پنجاب دا حال مرکزی سرائیکی، پوٹھو ہاری کنے ای دوجے لہجیاں دے لوک آپس وچ رشتے دار نیں کیہ اسیں اوہناں نوں چھڈ دتا اے
ونڈ ونڈ اِکو رٹ پہلی ونڈ توں کیہ لبھا اے
جو ہور ونڈ دے رولے پنجاب جنا کو بچیا اے اوہنوں تے سنبھال لوو
جدوں اسیں انج کردے رہواں گے دُشمن ساتھوں فیدا وی چُکدا رہووے گا
کِتے اسیں دُشمن دے ہتھے چڑھ تے نہیں گئے
جو اج ایڈے چنگے تے سوہنے کم تے
وی اِک نہ رہے
ایوارڈ دی واپسی دا شوشا چھڈ کے رفعت عباس جی نوں ہیرو بنان دی کوشش فر جی اشو لال تے پتہ نہیں کہڑے کہڑے دعوے ہیرو کماں نال تے بن سکدے نیں بھراواں نوں ونڈن والے ہیرو نہیں ہُندے
ایہ پنجاب تے پنجابی نال محبت اے یا دُشمنی ایہ پنجاب دے سجن نین دُشمن
خواہ مخواہ انج دے ایشو بناکے پنجابی تے پنجاب نال کہڑی محبت دا اظہار ہو رہیا اے
اسیں روندے ساں کوئی کم ہووے جے محترمہ صُغریٰ صدف جی دیاں محنتاں تے کوششاں نال اِک وڈے کم دا آغاز ہو ای گیا اے اوہنوں سلاہن دی تھاں لترو لِتری ہون نال پنجابی دا ودھا ہووے
اج کوئی ہیرو بن رہیا اے کل نوں کوئی ہور
سانوں ہیرو نہیں پنجابی دے سانجھے خادم بنن دی لوڑ اے پنجاب تے پنجابی دی نوکر دی لوڑ
بہتر ایہ سی جو فیصلہ ہویا اوہنوں تسلیم کیتا جاندا
اج نہیں تے فر کیہ ہویا کل سہی چنگے بھلک دی آس نال اک مُٹھ ہون دی لوڑ
سارے پنجابیاں اگے ہتھ بنھ کے بینتی اے
محترمہ صغریٰ صدف جی پنجابی لئی بڑی محنت کر رہے نیں سانوں ساریاں نوں اک مُٹھ ہو کے اوہناں دا ساتھ دین دی لوڑ اے جتھے تے جہڑا وی پنجابی لئی چنگا کم
ہو رہیاں اے اوہدی سلاہنا کریے ۔کم کراں گے تے ہیرو اپنے آپ بن جاں گے انج پنجابی نال دُشمنی کما کے ہیرو بنن دی کوشش اک دن سانو لے بہ گی
آو مرکزی سرائیکی تے دوجے ویرو اک دوجے نوں جپھیاں پاکے ایوارڈ ونڈن والے دِن رل کے لُڈیاں پائیے تے پورے جگ نوں دس دیے بھراواں چہ غلط فہمیاں تے ہو جاندیاں نیں بھرا کدی وکھ نہیں ہوندے سرائیکی بھرا وی اپڑن پوٹھوہاری وی جھنگووی مرکزی تے دوجے وی
وکھا دیے اسیں اک آں اسیں اک آں
اللہ سارے پنجابیاں نوں اک ہوون دی توفیق دے آمین
اِک تھاں رَل کے چوگاں چُگدے ڈار نہ مُڑ مُڑ ونڈو
اِس دھرتی دے پُتراں نوں سرکار نہ مُڑ مُڑ ونڈو
ونڈنے جے تے آپس دے وِچ دُکھ سُکھ اپنے ونڈو
چُلھے چونکے ویڑھے تے گھر بار نہ مُڑ مُڑ ونڈو
پہلاں وی اِس ونڈ نے سانوں لہو دے اتھرو دِتے
پہلاں ونڈی شے نوں ای ہر وار نہ مُڑ مُڑ ونڈو
ایہ پنجاب تے دِل سی ساڈا جو بچیا اے ادھا
بچیا کُھچیا ادھا دِل تے یار نہ مُڑ مُڑ ونڈو
ساڈے وِیراں ورگے پنج دریاواں دی لج رکھو
ٹھنڈاں پاؤندے پانی ٹھنڈے ٹھار نہ مُڑ مُڑ ونڈو
ایہ دھرتی تے ساڈے پیراں ولیاں دی اے دھرتی
ساڈے پیراں ولیاں دے دربار نہ مُڑ مُڑ ونڈو
لونگاں دےلشکار نے سانجھے، ونگاں دے چھنکارے
ساڈے ایہ لشکار تے ایہ چھنکار نہ مُڑ مُڑ ونڈو
رہتل، بولی وانگوں فن وی، سانجھا اے سرمایا
سندھو ورگے ساڈے ایہ فنکار نہ مُڑ مُڑ ونڈو
یہ کالم فیس بُک کے اس پیج سے لیا گیا ہے۔
