کسی نامور شخصیت، ادیب۔ شاعر، اداکارہ۔ رقاص، کرکٹر، سیاستدان پہ لکھنا بہت آسان ہوتا ہے۔ اس کی ساری زندگی آپ کے سامنے ہوتی ہے بلکہ ان کی زندگی کے وہ گوشے بھی جو دنیا سے اوجل ہوتے ہیں لکھنے والے وہ بھی لکھ دیتے ہیں تاکہ پڑھنے والے لکھنے والے سے مرعوب ہو سکیں۔ مگر کسی ایسی نامور شخصیت جس کے آپ بہت قریب رہے ہوں اس پہ لکھنا بہت مشکل ہوتا ہے، لکھنے والا فیصلہ نہیں کر پاتا کہ اس شخصیت کا کونسا گوشہ لکھنا ہے اور کونسا گوشہ جو اس کا بلکل ذاتی ہے اس کی تمام جزیات جانتے ہوئے بھی نہیں لکھنا۔
اداکارہ فردوس میری بڑی بہن ہیں مجھے ماں کی طرح عزیز ہیں، انہوں نے جو مجھے محبت پیار دیا ہے کوئی خونی رشتے والی بہن بھی شاید نہیں دے سکتی۔
میں جب بھی پاکستان جاتا اور لاہور جاتا تو انہی کے گھر رہتا۔ وہ میرے کھانے کا خاص خیال رکھتی۔ میں ان کا بیٹا شنو(رضا) باسو اور ساری فیملی ساری ساری رات باتیں کرتے رہتے مگر فردوس بہن کو علم تھا میں صبح بہت جلد جاگ جاتا ہوں لہذا انہوں نے کام کرنے والی کو خاص ہدائیت دی ہوئی تھی کہ مجھے ہر حال میں صبح کی چائے دینی ہے۔
وہ دو دفعہ جب سویڈن اپنے بھائی کی بیٹی کو ملنے آئیں تو کئی بار وہ صبح بارہ ایک بجے ہی میرے گھر آجاتیں اور رات گئے واپس جاتیں۔
ابھی اسی ماہ کی بات ہے جب ایک اچانک فوتگی کی وجہ سے مجھے پاکستان جانا پڑا تو میں خصوصی طور پہ ان سے ملنے کے لیے لاہور گیا۔ بظاہر وہ ہشاش بشاش نظر آ رہی تھیں۔ مگر مجھے ان کے چہرے پہ ایک خاص تھکاوٹ سی نظر آئی۔ میرے بار بار پوچھنے پہ بھی وہ ہنس کر کہہ رہی تھیں
"نہیں میں ٹھیک ہوں"
(یہ بات ان کی شخصیت کی کا ایک خاص وسف تھا کہ وہ اپنا دکھ ، درد، گلہ، شکائیت کسی سے ظاہر نہیں کرتی تھیں میں نے کبھی ان کو کسی کی برائی کرتے نہیں سنا۔ انہوں نے کبھی ان کی بھی برائی نہیں جنہوں نے ان کو برباد کرنے کی کوشش کی۔ چاہے وہ کوئی رشتے دار ہو یا کوئی باہر کا آدمی)
میں ان سے اگلے دن آنے کا کہہ کر اور ان کے گھٹنوں کو ہاتھ لگا کر چل پڑا مگر اس رات میری اپنی حالت اتنی خراب ہو گی کہ مجھے ہسپتال داخل ہونا پڑا۔ کیا علم تھا میں ان کے گھٹنوں کو آخری بار چھو رہا ہوں ۔
فردوس صاحبہ کا گھریلو نام پروین تھا، ان کا خاندان نے بھی 1947 کی تقسیم پہ دوسرے خاندانوں سمیت اپنا سب کچھ لٹا کے خالی ہاتھ سرحد کو پار کیا تھا جو اب نئی مملکت پاکستان کے نام سے جانی جاتی تھی۔
فردوس صاحبہ کے خاندان نے بھی دوسرے لوگوں کی طرح اس نئے ملک میں خود کو زندہ رکھنے کے لیے محنت مزدوری کے پیشے کو اپنایا۔
فردوس صاحبہ کو فلموں میں کام کرنے کا رتی بھی شوق نہیں تھا یہ ان کی پھوپھی جان تھی جن کی یہ خواہش تھی کہ کوثر پروین فلموں میں کام کرے اور کوثر پروین اپنی پھوپھو جی کو ماں کا درجہ دیتی ہیں اور پھر فردوس صاحبہ فلم سکرین پہ ایسی آئیں کہ ملک کے کسی نا کسی شہر کے کسی نا کسی سینما کی سکرین پہ ان کی فلم چل رہی ہوتی تھی۔
اخبارات میں کام کرنے کی وجہ سے مجھے بہت سی شوبزنس میں کام کرنے والی شخصیات کو قریب سے دیکھنے کے مواقعے میسر آئے ہیں۔ میں نے دیکھا ہے جیسے ہی کسی کے چار ڈرامے پانچ گانے یا دو تین فلمیں کامیاب ہوتیں ہیں سب سے پہلے وہ اپنے قریبی جتاکہ خونی رشتوں سے تعلق توڑ لیتے ہیں ان سے بھی جنہوں نے ان کو اس مقام تک پہنچایا ہوتا ہے، مگر فرودس بہن نے جس طرح شہرت کی بلندیوں پہ پہنچ کے بھی اہنے بہن بھائیوں اور ان کے بچوں کے بچوں کو بھی ساتھ رکھا ہے بہت کم فنکار ایسا کرتے ہیں۔ اگر کوئی روٹھ کر چلا گیا تو فردوس بہن ان کو منا کر واپس خاندان میں لے آتیں۔ کبھی کسی سے گلہ نہیں کیا۔ اور خاص طور پہ فردوس بہن نے اپنے بچوں کے اوپر تمام آسائش وار دیں۔ جو کسی نے چاہ اسے دے دیا مگر اپنے بچوں کا اپنے سے جدا نہیں کیا۔ دوسری بات میں نے فنکاروں کے بچے بھی اتنے با تمیز اور ماں کے تعبدار نہیں دیکھے۔ جتنے فردوس صاحبہ کے بچے ہیں۔ ماں جب کوئی کام کہتی تو رضا اورباسو صرف ایک بار ہی دلیل دیتے مگر دوسری بار کہنے پہ ہنسی ہنسی وہی کرتے جو ماں جی نے کہہ دیا ہے۔
چلتے چلتے ایک بات۔ جس طرح انڈیا میں بننے والی فلم "غالب" میں نصیرایدین شاہ نے اپنے فن اداکاری سے غالب کے کردار کو امر کر دیا ہے اسی طرح فرودس صاحبہ نے پاکستانی فلم "ہیر رانجھا" میں ہیر کے کردار کو امر کر دیا ہے۔
مگر دونوں میں ایک فرق ہے۔ غالب کو جسمانی طور پہ جدا ہوئے ابھی کوئی بہت لمبا عرصہ نہیں گزرا ابھی کچھ لوگ ہیں جن کے داد نانا نے غالب کو پڑھتے۔ پیتے۔ مشاعروں میں جاتے دیکھا تھا۔ غالب کے لباس کا انداز ان کے بات کرنے، کسی پہ طنز کرنے، چوکڑی کھیلنے کے انداز سے واقف تھے فلم کے ہدئیت کا گلزار نے ان سب سے مل کر اور ان سب کو نصیر ایدین شاہ سے ملوایا تاکہ نصیرایدین شاہ ویسا ہی کر پائے جیسا غالب کرتے تھے۔
مگر فردوس کو ایسی کوئی سہولت میسر نہیں تھی
ہیر رانجھے کی کہانی اگر حقیقی ہے بھی تو یہ صدیوں پرانی بات ہے ۔ جو اب ایک شاعر کے ذرئیعے سامنے ارہی ہے۔ فلم کے ہدائیت کار نے زندہ لوگوں سے نہیں یہ سب ایک شاعر کی کتاب سے لیا اور آگے فردوس صاحبہ کو پیش کیا۔ جس کو فردوس صاحبہ نے اس طرح پیش کیا کہ آج تک کوئی ایسا ہیر کو پیش نہیں کر سکا ۔
جس طرح بہت سے شاعروں نے ہیر رانجھے کے قصے کو لکھا مگر جو وارث شاہ موتی پرو گیا کوئی اور نہیں پرو سکا۔ اسی طرح ہندوستان پاکستان کی بہت سے اداکاروں نے ہیر کا کردار ادا کیا مگر ہیر کا کردار جو فردوس جی نے ادا کیا، مجھے یہ کہنے کی اجازت دی جائے کہ اگر کوئی حقیقت میں ہیر کے کدرار کے لڑکی تھی تو وہ فردوس سے زیادہ خوبصورت نہیں تھی اور نا کوئی اداکارہ فردوس سا کردار ادا کر سکی ہے۔
