نئی نسل کے نمایاں شاعر تہذیب حافیؔ کا یومِ ولادت

آج – 5/دسمبر 1989

نئی نسل کے نمایاں شاعر” تہذیب حافیؔ صاحب “ کا یومِ ولادت…

اصل نام تہذیب الحسن قلمی نام تہذیب حافیؔ ۔ نئے انداز سے بھرپور، جدید اور خوبصورت لب و لہجے کے نوجوان شاعر تہذیب حافی 5 دسمبر 1989ء کو تونسہ شریف(ضلع ڈیرہ غازی خان ) میں پیدا ہوئے۔ مہران یونیورسٹی سے سافٹ وئیر انجینئرنگ کرنے کے بعد بہاولپور یونیورسٹی سے ایم اے اردو کیا۔ آج کل لاہور میں قیام پذیر ہیں۔

پیشکش : اعجاز زیڈ ایچ

✦•───┈┈┈┄┄╌╌╌┄┄┈┈┈───•✦

معروف شاعر تہذیب حافیؔ کے یوم ولادت پر منتخب اشعار بطور اظہار عقیدت…

میں کہ کاغذ کی ایک کشتی ہوں
پہلی بارش ہی آخری ہے مجھے

—

تیرا چپ رہنا مرے ذہن میں کیا بیٹھ گیا
اتنی آوازیں تجھے دیں کہ گلا بیٹھ گیا

—

یہ ایک بات سمجھنے میں رات ہو گئی ہے
میں اس سے جیت گیا ہوں کہ مات ہو گئی ہے

—

داستاں ہوں میں اک طویل مگر
تو جو سن لے تو مختصر بھی ہوں

—

تمام ناخدا ساحل سے دور ہو جائیں
سمندروں سے اکیلے میں بات کرنی ہے

—

اپنی مستی میں بہتا دریا ہوں
میں کنارہ بھی ہوں بھنور بھی ہوں

—

اک ترا ہجر دائمی ہے مجھے
ورنہ ہر چیز عارضی ہے مجھے

—

بتا اے ابر مساوات کیوں نہیں کرتا
ہمارے گاؤں میں برسات کیوں نہیں کرتا

—

میں سخن میں ہوں اس جگہ کہ جہاں
سانس لینا بھی شاعری ہے مجھے

—

صحرا سے ہو کے باغ میں آیا ہوں سیر کو
ہاتھوں میں پھول ہیں مرے پاؤں میں ریت ہے

—

اس نے ہمارے گاؤں سے جانے کی بات کی
اور سارے پیڑ شہر کے رستوں میں گر گئے

—

اشک گرنے سے کوئی لفظ نہ مٹ جائے کہیں
اُس کی تحریر کو عجلت میں پڑھا جاتا ہے

—

اب ترے راز سنبھالے نہیں جاتے مجھ سے
میں کسی روز امانت میں خیانت کروں گا

—

ہزاروں لوگ اس کو چاہتے ہونگے ہمیں کیا
کہ ہم اس گیت میں سے اپنا حصہ گارہے ہیں

—

مجھے تو جان سے بڑھ کر عزیز ہوگیا ہے
تو میرے ساتھ کوئی بات کیوں نہیں کرتا

—

‏اک آستیں چڑھانے کی عادت کو چھوڑ کر
حافیؔ تم آدمی تو بہت شاندار ہو

●•●┄─┅━━━★✰★━━━┅─●•●

تہذیب حافیؔ 

انتخاب : اعجاز زیڈ ایچ