نعتِ رسولِ مقبول ﷺ قرآن و احادیث کے آئینے میں

(Last Updated On: )

سب جہانوں پرمِرے مولاہے رحمت آپ ﷺ کی
مدح نگار:سَیّد عارف معین بَلّے

ہے اِدھر رحمت ، اُدھرمولا شفاعت آپ ﷺ کی
دین و دُنیا میں مُسلّم ہے قیادت آپ ﷺ کی

اِک مہینے کی مسافت تک ہے سطوت آپ ﷺ کی
صدیوں سے دِل دِل پہ ہے ،مولا حکومت آپ ﷺ کی

ہے درود ِ پاک لب پہ ،دل میں چاہت آپ ﷺ کی
زندگی کیا ہے ؟ محبّت ہی محبّت آپ ﷺ کی

کرتی ہے دل کی زباں یوں بھی تلاوت آپ ﷺ کی
جب کھلا قرآں تو دیکھی ہم نے صورت آپ ﷺ کی

بھیجتا ہے آپ پر خود رب ِ عز و جَلّ درود
شان ہے سب سے الگ ناز ِ مشیّت آپ ﷺ کی

نبیوں نے آکر دکھائے ہیں محاسن آپ ﷺ کے
جھلکیاں تھیں وہ،بتاتی ہے یہ سیرت آپ ﷺ کی

وہ تھا اِک مخفی خزانہ ،کُھل گیا یہ راز بھی
رب کو پہچانا گیا،جب دیکھی صورت آپ ﷺ کی

ربّ ِ عِزو جَل کے دل کی دھڑکنیں کہنے لگیں
دین کی جاں، روح ِ ایماں ہے محبّت آپ ﷺ کی

آپ ﷺ ہیں سورج کبھی جو ڈوب ہی سکتا نہیں
دل کو گرماتی ہے ایمانی حرارت آپ ﷺ کی

سارے انسانوں کی خاطر بن کے آئے تھے رسول
سب جہانوں پرمِرے مولاہے رحمت آپ ﷺ کی

حُسن یوسف کا بِکا ، پر آپ ﷺ تو انمول ہیں
دوجہانوں سے ہے بڑھ کر قدرو قیمت آپ ﷺ کی

آپ ﷺ نےدیدار رب کا کرلیا اسریٰ کی شب
انبیاء و مرسلیں نے کی زیارت آپ ﷺ کی

آنکھیں سو جاتی تھیں،دل پر آپ ﷺ کا سوتا نہ تھا
دنیا والوں سے الگ تھی اِستراحت آپ ﷺ کی

سرپہ ہے بادل کا ٹکڑا ،جسم کا سایہ نہیں
یہ نشانی ہے نبوت کی یا نُدرت آپ ﷺ کی

اُس کی مرضی جس کو چاہے،جتنا علم ِ غیب دے
کم نہیں ہے یہ بھی دولت ،شہر ِ حکمت آپ ﷺ کی

ہے اگر رب سے محبت پیروی میری کرو
نقش دل پر ہوگئی ،ہے کیا نصیحت آپ ﷺ کی؟

آپ ﷺ کی ہر بات میں معنوں کی ہے اِک کائنات
دیکھ کرحیراں ہے دنیا جامعیت آپ ﷺ کی

کُنجیاں سارے خزائن کی عطا کردی گئیں
دوجہاں میں جتنی بھی ہے،ساری دولت آپ ﷺ کی
حشر میں سب پر کُھلیں گے معنی ء خیرالامم
جائے گی جنّت میں مولا ساری امت آپ ﷺ کی

دیکھئے قرآن و سنت دونوں ہم آہنگ ہیں
ایک ہے مولا شریعت اور طریقت آپ ﷺ کی

قدر کی شب اُتراہے قرآں پہ قرآن ِ حکیم
رنگ لائی غار میں مولا سکونت آپ ﷺ کی

گود میں لائے تھے جب دادا دِکھانے کو حرم
کعبے نے خود سرجھکا کر،کی زیارت آپ ﷺ کی

تجربوں میں پڑ گئے ہم جاننے کے باوجود
ہے مثالی پہلی اسلامی ریاست آپ ﷺ کی

سرپرست ِ ہردوعالم کون ہے؟ دُرّ ِ یتیم
اللہ اللہ ،سب جہانوں پر ہے رحمت آپ ﷺ کی

آپ ﷺ کی خاطر بنی ساری زمیں مسجد حضور
رہتی دنیا تک یقیناً ہے حکومت آپ ﷺ کی

تاقیامت ہوگا کیا کچھ ؟کھول کر سب رکھ دیا
اللہ اللہ کیا نظر ہے ؟ کیا بصیرت آپ ﷺ کی

جنتّی چالیس مردوں کی تھی قوت آپ ﷺ میں
چار ہزار افراد سے بڑھ کر تھی طاقت آپ ﷺ کی

فرش پر بھی عرش کی آہٹ کوسُن لیتے ہیں آپ
پوچھتے کیاہو کہ تھی کیسی سماعت آپ ﷺ کی؟

پیٹھ پیچھے بھی دکھائی دے رہا ہے آپ ﷺ کو
اللہ اللہ ہے بصیرت زا بصارت آپ ﷺ کی

مرحبا ، اقوام ِعالم کے محمد ﷺ ہیں رسول
رہنی ہےدنیایہ جب تک ، ہے رسالت آپ ﷺ کی

آپ ﷺ اُمّی ہوکے بھی ہیں صاحب ِ اُمّ الکتاب
مان لی اہل ِ عرب نے بھی فصاحت آپ ﷺ کی

آپ ﷺ پر رب نے کیا، مال ِ غنیمت کو حلال
انبیاء پر ایک یہ بھی ہے فضیلت آپ ﷺ کی

روز ِ محشر ہرتعلق ٹوٹ جائے گا مگر
سچ ہے یہ باقی رہے گی، صرف نسبت آپ ﷺ کی

اتباع ِ سرور ِ کونین ﷺ ہے دین ِ مبیں
ہوگئی اللہ کی ،جب کی اطاعت آپ ﷺ کی

آگے آگے ہوگی سب سے اُمّت ِختم الُرسل
شان ہوگی دیدنی روز ِ قیامت آپ ﷺ کی

اُس کے پہلو میں بھی اِک جنت کاٹکڑا رکھ دیا
تھی مدینے میں جہاں مولا اقامت آپ ﷺ کی

سورہء کوثر گواہی دے رہی ہے آج بھی
ہوگی جملہ انبیاء سے دُگنی امت آپ ﷺ کی

دو مہینے ہوگئے ہیں گھر کا چولہا سرد ہے
فقرو فاقے میں بھی کم ہے کب؟ سخاوت آپ ﷺ کی

صرف مولا آپ ﷺ ہی کو زیب دے صوم ِوصال
روزوں میں کرتا ہے بے شک رب ضیافت آپ ﷺ کی

بُوالارامل کا ہے،بے شک بیوگاں کے سر پہ ہاتھ
مشکلوں میں کام آجانا ہے عادت آپ ﷺ کی

ہے اُسی کے ذمے قرآں کی نگہبانی حضور ﷺ
جس نے کی ہے عمر بھر مولا حفاظت آپ ﷺ کی

مرحبا تخلیق ِ آدم سے بھی تھے پہلے حضور ﷺ
جانتا ہے رب مِرا،مولا قدامت آپ ﷺ کی

وہ گزرجاتے جہاں سےبھی ،مہک اُٹھتی فضا
مشک و عنبر سے بہت بڑھ کے تھی نکہت آپ ﷺ کی

امن سے برپا کیا ہے آپ ﷺ نے اِک انقلاب
ساری دنیا اس لئے کرتی ہے مِدحت آپ ﷺ کی

مرحبا بدلاہے قبلہ دنیا بھر کا آپ ﷺ نے
آرہی ہے دنیا بھر کے کام سیرت آپ ﷺ کی

سب سے پہلے آپ ﷺ ہی جنت میں جائیں گے حضور
مرحبا، صّل علی ٰ مولا، ہے جنّت آپ ﷺ کی

یا شفیع المذنبیں ﷺ ، یا رحمۃ للعالمیں ﷺ
آخرت میں کام آئے گی شفاعت آپ ﷺ کی

ہاتھوں کوباندھے کھڑے ہیں انبیاء و مرسلیں
مسجد ِ اقصیٰ نے دیکھی ہے امامت آپ ﷺ کی

چاند تارے آپ ﷺ کے رستے میں سب بِچھ بِچھ گئے
اسری ٰ کی شب رب نے خود کی ہے ضیافت آپ ﷺ کی

پلٹا ہے مغرب سے سورج، چاند دو ٹکڑے ہوا
کارفرماہے ،بس انگشت ِ شہادت آپ ﷺ کی

رکھ دیا رب نے بدل کر قبلہ دوران ِ نماز
دل میں ہے اللہ کے کتنی محبت آپ ﷺ کی

عہدہے نبیوں کاجب ہوگا محمد ﷺ کا ظہور
لانا ہے ایمان ، پھر کرنی ہے نصرت آپ ﷺ کی

جن پہاڑوں نے قدم چومے، ہوئے وہ سرفراز
اللہ ُ اکبر، ہے رفعت بخش نسبت آپ ﷺ کی

تھام کر دو چیزوں کو رکھنا ،بھٹک سکتے نہیں
جاں فزا ہے ہادی ء عالم ہدایت آپ ﷺ کی

غورسے دیکھوتو قرآں ،نعتوں کا دیوان ہے
اللہ اللہ، ہے لب ِ یزداں پہ مِدحت آپ ﷺ کی

رب کو پہچانا جہاں نے آپ ﷺ ہی کے نور سے
مظہر ِ شان ِ الہیٰ شخصیّت ہےآپ ﷺ کی

ہوگئے دنیا سے رخصت، پھر بھی زندہ ہیں حضور ﷺ
ہرزمانے کیلئےبے شک رسالت آپ ﷺ کی

ہے قیام اللیل سے پیروں پہ مولا ﷺ کے وَرَم
المزمّل مرحبا ،کملی ہے خِلعت آپ ﷺ کی

ایسا کوئی اور ہو تو نام بتلا دو مجھے
مان لی سب دشمنوں نے بھی صداقت آپ ﷺ کی

مرحبا عرش ِ بریں ہے آپ ﷺ کے قدموں تلے
پست ہیں ہفت آسماں،مولا یہ رفعت آپ ﷺ کی

اینٹ کے تکیے پہ تکیہ کررکھا ہے آپ ﷺ نے
فقر پر ہے فخر، ہے ایمان دولت آپ ﷺ کی

ہیں فرشتوں کے بھی لشکر پیچھے پیچھے آپ ﷺ کے
فرش پر ہے عرش ساماں جاہ و حشمت آپ ﷺ کی

بند ہے باب ِ نبوت آپ ﷺ کے آنے کے بعد
تاج ِ ختم المرسلیں مولا ہے زینت آپ ﷺ کی

نقش ِ اول آپ ﷺ مولا، حرف ِ آخر آپ ﷺ ہیں
نبیوں میں ہے یہ جداگانہ فضیلت آپ ﷺ کی

ساری مخلوقات سے بالا و برتر آپ ﷺ ہیں
دین و دنیا میں خدا کے بعد عزت آپ ﷺ کی

آپ ﷺ پرلائے ہیں ایماں انبیاء و مرسلیں
حسب ِ میثاق ِ نبوت ، کی ہے نصرت آپ ﷺ کی

بولتا قرآن ہیں یہ، صاحب ِ خُلق ِ عظیم
مرحبا صّل ِ علی ٰ ،بے مثل سیرت آپ ﷺ کی

تخت ہے نَے تاج ،پر سرتاج ِ دوعالم ہیں آپ ﷺ
مرحبا ،ہردو جہاں پر ہے حکومت آپ ﷺ کی

کلمہ ہو، خطبہ ہو،چاہےہوں نمازیں یا اذاں
ذکر رب کے ساتھ ہردَم ،ہےیہ عظمت آپ ﷺ کی

آپ ﷺ کے روضے پہ دے کر حاضری میرے حضور
اب میں کہہ سکتاہوں ،میں نے کی زیارت آپ ﷺ کی

سرجھکا رکھا ہے مکّہ فتح کرلینے کے بعد
مولاعفو و درگزربے شک ہے عادت آپ ﷺ کی
آپ ﷺ ہی کے ہاتھ میں ہوگا لوائے حمد بھی
کنجی ء ابواب ِ جنت ہے شفاعت آپ ﷺ کی

دشمنوں کی بھی نظر میں آپ ﷺ صادق اور امیں
آفریں صد آفریں مولا صداقت آپ ﷺ کی

ہم اگر چاہیں محبّت بھی خدا ہم سے کرے
کچھ نہیں، کافی ہےبس مولا اطاعت آپ ﷺ کی

انبیاء روشن ستارے ،آپ ﷺ ہیں ماہ ِ تمام
فخرِآدم۔ دِی ہے عیسیٰ نے بشارت آپ ﷺ کی

بھیجتا ہے رب درود ِ پاک ہردم آپ ﷺ پر
اِس عمل سے ہم طلب کرتے ہیں رحمت آپ ﷺ کی

حاضری روضے پہ دے کےروبرو ہیں آپ ﷺ کے
ہوگئی حاصل ہمیں بھی مولا صحبت آپ ﷺ کی

جان، مال ،اولاد کیا ؟ ہے آپ ﷺ پر سب کچھ نثار
زندگی کیا ہے؟ محبّت ہی محبّت آپ ﷺ کی

آپ ﷺ نےدیدار رب کا کرلیا اسریٰ کی شب
انبیاء و مرسلیں نے کی زیارت آپ ﷺ کی

آنکھیں سو جاتی تھیں،دل پر آپ ﷺ کا سوتا نہ تھا
دنیا والوں سے الگ تھی اِستراحت آپ ﷺ کی

سارے انسانوں کی خاطر بن کے آئے تھے رسول ﷺ
سب جہانوں کیلئے بے شک ہے رحمت آپ ﷺ کی

ہے اگر رب سے محبت پیروی میری کرو
نقش دل پر ہوگئی ،ہے کیا نصیحت آپ ﷺ کی