کچھ عرصہ پہلے اپنے ہی جیسے گھر کی ایک بیٹی کا جہیز دیکھا _ ایک محتاط اندازے کے مطابق چھ سات کمروں والے گھر میں وہ سامان پورا نہیں آئے گا _ کچھ قیمتی سامان صحن میں رکھنا پڑے گا _
حیرانگی ہوئی کہ اتنا کچھ وہ بیٹی استعمال کیسے کرے گی اور یا لڑکے والے رکھیں گے کہاں پر _ سُنا ہے کہ جہیز میں چالیس تولے سونا بھی تھا _
آج سے تقریباً تیس سال پہلے مُجھے میری ایک کزن کا فون آیا کہ بھائی _ سپیشل آپ کو فون کرنے گاؤں سے شہر پی سی او پر آئی ہوں _ فلاں تاریخ کو میری شادی ہے اور آپ نے شادی پر ضرور آنا_ کوئی بہانہ نا کر دینا _ میں نے کہا بہن _ تسلی رکھو _ ہر صورت پہنچوں گا _
شادی والے دن پُوچھتا پُچھاتا ایک گاؤں میں کزن صاحبہ کے گھر پہنچا _ گھر کے نام پر ایک بڑا سا صحن تھا جس کے تین اطراف کچے کمرے _ اُن سات آٹھ کمروں میں سے ایک کمرے میں کزن صاحبہ کی رہائش تھی _ کُل ملا کر اُن کمروں میں پانچ چھ علیحدہ علیحدہ فیملیز رہتی ہوں گی جبکہ صحن سب کا سانجھا تھا _
میں کوئی گفٹ وغیرہ تو لے کر نا گیا _ یہ ہی سوچا تھا کہ کزن سے پوچھوں گا اور جس چیز کی اُسے ضرورت ہو گی ، وہ لے دوں گا _ اُسے سائیڈ پہ کر کہ پوچھا _ بہن بتاؤ کیا لینا _ وہ بیچاری کچھ گڑ بڑا سی گئی _ بہت منت سے اور لَجا کر بولی بھائی آپ وعدہ کریں کہ لے کے ضرور دیں گے _ میں نے کہا _ بہن پکا وعدہ _ ضرور لے دوں گا _
بولی بھائی سونے کی آئٹم ہے اور برات آنے سے پہلے ابھی لینا ہے _ بہت شوق ہے کہ میرے پاس بھی سونا ہو _ دیکھنا ، وعدہ توڑ نا دینا _ ؟
انیس ، بیس ہزار میری پاکٹ میں تھا اور تب فی تولہ سونے کا ریٹ شاید سات ہزار ہو گا _ میں کچھ سوچ میں پڑ گیا لیکن وعدہ کر لیا کہ ضرور لے دوں گا تم بے فکر ہو کر بتاؤ _
کزن بولی کہ بھائی تین چار سال کی تھی تو اماں نے میرا ناک چِھدوایا _ آج تک ناک میں تنکا ڈال کر کام چلا رہی ہوں _ تو بہت شوق ہے ناک میں سونے کا کوکا ہو _ آپ لے دیں گے نا _ ؟
کوکے کے نام پر اپنی کزن کی آنکھوں میں جو حسرت دیکھی اُس پر ہزاروں حسرتیں قربان _ میں نے اُسی وقت اپنی اُس بہن کو پک اپ میں ساتھ بٹھایا _ صرافہ بازار گیا اور اُسے بولا کہ بیٹی _ جو بھی کوکا لینا ہے خود سے پسند کرو _ اور ایک نا لو بیشک دس لے لو _ وہ بولی کہ نا بھائی ایک ہی کافی ہے _
کزن صاحبہ نے کوکا پسند کیا _ تب وہ نوز پِن اسی روپے کی ملی تھی اور جہیز کے نام پر یہ واحد چیز تھی جو میری وہ تیرہ چودہ سالہ پیاری بہن ساتھ لے کر گئی _
