چائے کی اک پیالی پر تم مجھ سے ملنے آجائو تو
بیٹھیں گے کچھ یادیں لے کر بیتی سی کچھ باتیں لے کر
کل ہم وہ سب یاد کرینگے جو کچھ ہم سے روٹھ گیا ہے
وہ سب کچھ جو کل تھا اپنا ہاتھوں سے جو چھوٹ گیا ہے
لیکن کیا تم آپاوُ گی کیا تم کو فرصت بھی ہوگی
کیا میں تم کو یاد ہوں اب تک یا تم مجھ کو بھول گئی ہو
چائے کی یہ پیالی مجھ کو کیا کیا سپنے دکھلاتی ہے
میں کن خوابوں میں ہوں اب تک میں کیونکر مایوس نہیں ہوں
یہ کیسی امید مجھے ہے یہ کیسا دھوکا ہے مجھ کو
میں ایسا کیوں سوچ رہا ہوں شاید میں کچھ پاگل سا ہوں
ہم میں کیا کچھ ایسا بھی تھا کیا ہم دونوں اک جیسے تھے
کیا تم کو بھی جان جاناں مجھ سے تھوڑی سی چاہت تھی
یا پھر جو میرے دل میں تھا وہ سب کچھ اک پاگل پن تھا
لیکن جو بھی ہے اتنا ہے تم اب تک میری یادوں میں
روشن ہو جگنو کی مانند اور میں تم کو سوچ رہا ہوں
دیکھو گر تم سن پاوُ تو بس اتنی سی بات ہے جاناں
اور نہیں کچھ میں مانگوں گا اور نہیں کچھ میری چاہت
چائے کی اک پیالی پر تم مجھ سے ملنے آجاوٰ تو
بس اتنی سی بات جاناں بس اتنی سی ہی خواہش ہے
دیکھو میں کل راہ تکوں گا دیکھو تم مایوس نہ کرنا
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
چائے کی اک پیالی پر میں تم سے ملنے آجائوں تو
ڈر لگتا ہے بیتی یادیں شاید میرے پیر پکڑ لیں
ڈر لگتا ہے شاید میں پھر دور نہ تم سے جا پاوُنگی
ڈر لگتا ہے خود سے مجھ کو میں اتنی مضبوط نہیں ہوں
چائے کی اک پیالی کیا ہے یہ تو بیتا کل ہے میرا
اب میرے پیروں میں کتنی زنجیروں کا طوق سجا ہے
اب میرے ہاتھوں میں جاناں اور کسی کا نام لکھا ہے
چائے کی اک پیالی پر میں تم سے ملنے آجاوُں تو
تم نے کیسے سوچ لیا یہ ہم دونوں انجان کبھی تھے
تم نے کیسے سوچ لیا یہ ہم دونوں انجان ابھی ہیں
گو ہم دونوں دور بہت ہیں لیکن دل کے پاس ابھی تک
یادوں کی بارات سجی ہے ہاں اک لمبی رات سجی ہے
لیکن یہ ناکام محبت ہم دونوں کے ساتھ چلے گی
کل جب میں بھی مر جاوُنگی کل جب تم بھی مر جاوُگے
چائے کی اک پیالی پر میں تم سے ملنے آجاوں تو
چھوڑو اب یہ باتیں چھوڑو ان باتوں میں کیا رکھا ہے
اب وہ یادیں بھول بھی جاوُ ان یادوں میں کیا رکھا ہے
اب ہم دونوں اک دوجے سے بالکل ہی انجان ہیں جاناں
اب ہم دونوں اور کوئی ہیں اب ہم دونوں وہ تو نہیں ہیں
چائے کی اک پیالی میں اب کیا رکھا ہے کیا رکھا ہے
بس جب پت جھڑ کا موسم ہو بس جب بارش کا موسم ہو
پھر تم بارش کے پردے میں آنکھوں کو بھی بہنے دینا
اور کہیں میں دور کے گاوُں تم کو تنہائٰٰی میں جاناں
یاد کرونگی رو بھی لونگی ہاں دنیا سے چھپ چھپ کر میں
جاناں تم سے پیار کرونگی ہاں میں تم کو یاد رکھونگی
چائے کی اک پیالی پر میں تم سے ملنے آجاوُں تو.
