(Last Updated On: )
آسیبِ اجل میرے سر پر سوار ہے
بحرِ اشک رواں ہے آنکھوں سے میری
اور محوِ حیرت ہوں
مجھے شاہکار قرار دینے والا میرا تخلیق کار
میری بے بسی پر کتنا شکیب آموز ہے
قفس میں ڈال کر مجھے نام دیا گلشن کا
اور صیاد کا پہرا بٹھا دیا
سوچ ہی سوچ پر غالب آئی
اشک بھرا قہقہہ صورِ اسرافیل کی طرح فضا کو چیر گیا
وہ ڈرتا ہے ان اشرف المخلوقات سے
کہ اس کی خدائی ختم نہ ہو جائے
وہ ڈرتا ہے
جبھی بارہا مشرک کو تنور میں پھینکنے کی دھمکی دیتا ہے
لیکن خالق تو مخلوق سے ڈرا نہیں کرتے
سوچ لیا ہے میں نے
ڈھونڈ لوں گا موت کا تریاق بھی
آہ ! آسیب ِ اجل نے دُرا مارا
میں اشکوں کو دامن میں لپیٹ کر بے بسی سے سو گیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
“
