میری بیگم شک نئیں کردی
خدمت شام سویرے کردی
اے ہے رونق میرے گھر دی
میریاں جنگیاں ماڑیاں جھلدی
میری بیگم شک نئیں کردی
جگ توں دور ہٹا کے رکھدی
گھر وِچ تھلّے لا کے رکھدی
بی پی روز ودھا کے رکھدی
مخبر پچھے لا کے رکھدی
آپ او ریندی پچھے ڈردی
میری بیگم شک نئیں کردی
اُتوں آ کے پھڑ لیندی اے
پھڑ کے میسج پڑھ لیندی اے
مِس کالاں توں لڑ لیندی اے
اندروں اندری سڑ لیندی اے
گالاں کڈدی ہوکے بھردی
میری بیگم شک نئیں کردی
تھوڑا وی نئیں گھبراندی میتھوں
کپڑے روز تواندی میتھوں
ترلے وی کڈھواندی میتھوں
لتّاں فیر کٹواندی میتھوں
نہ کوئی عہدہ نہ کوئی وردی
میری بیگم شک نئیں کردی
بُڑ بُڑ کردی گُن گُن لیندی
توڑ کے پانڈے چُن چُن لیندی
میریاں گالاں سُن سُن لیندی
ماواں بہیناں پُن پُن لیندی
رج کے کردی گُنڈا گردی
میری بیگم شک نئیں کردی
گھر وچ رو ہنگاما کردی
سیریل وائز ڈرامہ کردی
ہتّک وانگ اوباما کردی
پھردی ماما ماما کردی
گرمی ہووے یا فیر سردی
میری بیگم شک نئیں کردی
شک کرے تے وسّے نہ فیر
میریاں مُشکاں کسّے نہ فیر
کُٹ کے مینوں ہسّے نہ فیر
آنڈ گوانڈ نوں دسّے نہ فیر
کُٹ کُٹ فیر ٹکوراں کردی
میری بیگم شک نئیں کردی
تے باہر کسے نوں کہہ نئیں سکدا
سٹّاں پاروں بہہ نئیں سکدا
درد وچھوڑا سہہ نئیں سکدا
بیگم بھاجوں رہ نئیں سکدا
بیگم بھاجوں نئیں گزردی
میری بیگم شک نئیں کردی
