(Last Updated On: )
میرا ناں دُلّا نہ رکھدئیوں
رکھدیندیوں کجھ ہور
میں پُتر آں بگے شیر دا
میرے شیراں ورگے طور
میں بھنّاں دِلّی دے کِنگرے
دیواں شکر وانگر بھور
ــــــ
لوہڑی شپیشل
دُلّے دی وار
کجھ وِرلیاں وِرلیاں قبراں تے کجھ درختاں دی وِرلی وِرلی چھاں تھلے ورہیاں دی کالک وچ رنگی اکلّی قبر
لاگے سرناویں دے مکھڑے اتےاک اعلان جنگ ’میں بھنّاں دِلّی دے کِنگرے‘
ایہہ کہیڑا اے جو لہوروں سدھا دلی ڈھاؤن نو ں پھردا اے
فیرسرخ انقلابی رنگ وچ رنگیا اک ناواں دُلّا بھٹی شہید
اج توں دس باراں ورہے پہلے دی اوس دوپہرمیں میانی صاحب دے کتبے کھنگالدا پھرولدا دُلّے بھٹی نوں آن ملیا
ایہہ ساندل باردےگھبرواں دے وارث نال اک حادثاتی میل سی
ساندل بھٹی داپوتا اتےفریدبھٹی تےماتا لدھی دا نورنظر عبداللہ بھٹی جنہوں اکبربادشاہ دا دربارتے دنیا دُلّا بھٹی کرکے سنجاندی اے ساندل بار دےبتّی پنڈاں دےسردارپنڈی بھٹیاں دےبگےشیرساندل تےاوہدادلیرپت فریدبھٹی مغلاں نوں ہک دےزورتےڈکیاتے باغی تےڈکیت دالقب پایا
سرکارےدربارےباغیاں دی دھون لاہ لیندےنیں تےاوہی دوواں بھٹیاں دےنال ہویا
تیراساندل داداماریا
دِتّابورےوچ پا
مغلاں پُٹھیاں کھلّاں لاہ کے
بھریاں نال ہوا
پر ہالے ایہہ بولی فرید بھٹی دے قتل توں گیارہ دن بعد جمّے دُلّے دےکن پاؤن وچ اجے دیر سی کہ ماتا لدھی نوں اپنےپتر دے چاء تے لاڈ پورے کرن دی ریجھ سی
سجنو تے مترو ایہو کرکے دُلّے دی وار دی شروعات اوہو گھوڑیاں تے گاؤن نیں جیہڑے دُلّے دی بھیناں نے گودیاں ویر کھڈاؤندے گائے
ججمان جی ججمان جی
میرا دُلّا ویر سلطان جی
نال ہاتھی نال گھوڑے
لیاوے گا ساڈی بھابھی جان جی
ویڈیو لنک
تارے تارے تارے
ویرمیراگھوڑی چڑھیا
کوئی بری نظرنہ لاوے
لدھی نوں دُلّا کل جہان سی کہ ہن اوہ اکبر بادشاہ نوں لگان دین تے وی راضی سی۔ ہن ایتھے کچھ کہاوتاں ایہہ وی کیہندیاں نیں کہ ماتا لدھی نوں اکبردے دربارے شہزادہ شیخو دی رضاعی ماں بنن دا سدا آیا
پنجابی بولی دا لاڈلا بابو رجب علی سانوں دسدا اے
کسے دسّ پاتی بادشاہ سیانے نوں
اپڑے نہ کوئی پنڈی دے گھرانے نوں
سروں ننگی عورت فرید خان دی
گدڑاں توں چترے بناؤن جاندی
کڈھ کے تے وٹّ پچھلے کرودھ دے
لے لیا شہزادہ شیخو وچّ گود دے
دناں وچّ دودھ دی نہر وگّ پئی
سجا ‘مما’ شیخو نوں چنگھون لگّ پئی
ایس حسابے دُلّا تے شیخو دُدھ شریک بھراہوئے تے کہن آلے کہندے نیں کہ لدھی وی بڑی راضی سی ۔ ہن رجب علی تے سانوں دسدا اے کہ لدھی نوں جگاؤن واسطے خواب وچ وڈکے بھٹی آئے، پر ہور ڈھولے تے واراں دسدیاں ہن کہ ساندل دا بیلی محمد دین جیہندی دھشت مغلاں دےدرباروچ گلاب دین دے ناں نال سی
جدوں قیدوں چھُٹ کےآیا تےبقول ساڈےلوک فنکارفضل جٹ ماتا لدھی نوں کہن لگا
دُلّا بھٹی بگےشیرداپتراےایہنے بھبھک مارن توں بازنئیں آؤنڑا
تےلدھی وی پنجاب دی شیرجٹی کوئی شےبُھلّی نئیں سی
دُلّےنےپچھیا کہ ماں مینوں گُڑتی کس چیزدی دتّی سی تےکہن لگّی
سان چڑھی تلوارداپانی تیرےمنہ لایاسی دُلّیا
سان چڑھی تلوار دا پانی پین والےنیں فیر رتّی پنڈی وچ اپنےوڈکیاں دےقاتل بگّےملکیرے دا تن تنہا سر وڈھ کےاکبردےدربارگھلادتا
میدا کھتری ملکیرے دا سِرلےکےاکبردےدربار جا کوُکیا
ویڈیو لنک
ایک جمیا پنڈی دے وچ سورما
مائی لدھی دے گھر لعل اوئے
اوہنے گن گن ماریاں کاہنڑیاں
بھٹی کھو کے لے گیا مال اوئے
کہن آلےکہندےنیں کہ پنڈی بھٹیاں اک اُچّا ٹیلہ اے
ایتھےدُلّےدےاو ساتھی دفن نےجیہڑےمغلاں دی فوج نےمارے سی
دُلّے بھٹی دا گھلایا بگّےملکیرے دا سِر اکبردے درباروچ طبل جنگ سی۔ مغل بادشاہ دی بڑھکاں تے جو فوجداردُلّے دے خلاف کھلتا اوہدا ناں نظام دین سی
بابا بلھے شاہ دےقصورشہردا نظام دین
جد نظام دین دی فوج پنڈی بھٹیاں اپڑی تے دُلّا مامیاں ول گیا ہویا سی۔ یاردلدار گیڑے وچ آگئے تے ماں لدھی، دُلّے دی ووہٹی، بھیناں تے پنڈی بھٹیاں دیاں مٹیاراں فوج نے بنھ کے تخت لہورول ٹوریاں
سجنوپنجاب دے شیردی وار دا راوی مہرو پوستی ایتھے ہتھیارچکدااے تےنال دُلّے نو ں میہنا ماردا اے
پارلے پنجاب دے کلدیپ مانک نے ایہہ شبد گائےنیں تے کیا کمال گائےنیں !
ویڈیو لنک
غصے وچ دُلّے نوں مہرو مارے بولیاں اوئے اِجّتاں تَیں رولیاں
پنڈی دے دوالے چلدیاں گولیاں اوئے کندھاں ہوئیاں پولیاں
آپ تاں توں آکے سوں گیاں اے نانکی اُتّے لے کے چادراں
مغلاں نے تیرا سبھ کجھ لُٹیا او وڈّیا بہادرا !
پنڈی بھٹیاں دیاں بنھیاں رانیاں جد لہوردے راہے اگلے پنڈ رتّی پنڈی اپڑیاں تے آپس دی دشمنی بھلاکے پنڈدے بُڈھڑے لعل خان نے نظام دین دی فوج نوں پنڈ وسنیکاں دے نال ہک تے ڈکّیا کہ دھیاں بھیناں تے سانجھیاں ہوندیاں نیں
ایتھے دُلّا وی آ اپّڑیا تے نظام دین دی دھون تے تلواررکھ دتی
نظام جد ماتا لدھی دے اگے نیواں ہومعافی منگن لگیاتے ماں دے کہن تے دُلّے نے جاں بخشی کردتی
نظام لاہور دے دربار جد دُلّے دی بہادری دی داستان سناوے گا تے بادشاہ دُلّے نوں سدّا گھلّے گا۔ دُلّا پیش ہووے گا پر اک باغی دے روپ وچ۔ ہن ایہہ قصہ ساڈے فضل جٹ تون چنگا کون سنائےگا؟
ویڈیو لنک
ویڈیو لنک
اگلا منظردِلّی دروازے دے باہر نخاس دااے جتھے دُلّے نوں پھانسی لایا جائے گا
ایک مجمع اکٹھا ہویا اےتے دُلّا ہک تان کےاکبر بادشاہ تےمغلاں دے دربارنوں ‘گالاں’ کڈھدا ہویا پھاہے والا جھونٹا لے گیا
ایک موئے دُلّے توں وی ڈرے اکبردے دربارنے اوہدی لاش گھروالیاں نوں نہیں موڑی بلکہ میانی دےقبرستان دے باغیاں لئی مخصوص ٹکڑے وچ دب دتی
دِلّی دروازے دی نخاس وچ مجمع اندرکھڑے شاہ حسین وی ہیگے سن
کہندے نیں کہ آخردم تک ہک تان کے کھڑے دُلّے نوں ویکھ کے اونہاں نے پنجاب دے سوُرمے دی نظر ایہہ شعر کہیا
کہےحسین فقیر سائیں دا
تخت نہ ملدے منگے
اج وی چڑھدے ماگھ نوں جد لہندے تےچڑھدےپنجاب دیاں راتاں اگ بال کے نِگیاں ہوندیاں نیں تےجواک لوہڑی منگن جاندےنیں تے جوڑی سلامت رہن دی دعادےنال کہ
سانوں دےدےلوہڑی
وےتیری جیوےجوڑی
او پنجاب دی سندریاں تے مندریاں دےسر ڈھکن والےسورمےنوں وی یادکردےنیں جنھیں دھی ویاہی تے سیر شکر پائی سی
سُندرمُندریے
تیرا کون وچارا
دُلّا بھٹی والا
دُلّے دی دھی ویاہی
سیر شکر پائی
کڑی دا لال پٹاکا
کڑی دا سالُو پاٹا
سالوُ کون سمیٹے
مامے چوُری کُٹّی
زمینداراں لُٹّی
زمیندار سدھائے
گِن گِن بھولے آئے
اک بھولا رہ گیا
سپاہی پھڑکے لے گیا
سپاہی نے ماری اِٹّ
بھانویں رو تے بھانویں پِٹّ
سانوں دے دے لوہڑی
وے تیری جیوے جوڑی …
ایس تھریڈ وچ دُلّے بھٹی دی قبر دی جیہڑی حالیہ تصویر اے اوہ ایس سال لوہڑی دی اے
تصویروچ ساڈے متراحمدرضاوٹو دُلّے بھٹی دی قبرتے پھُل رکھ رہے نیں
Dulley di Vaar links
Fazal Matt on ATV >>
