(Last Updated On: )
سوہنیاں اکھاں دی نذر
مینوں اوکھے ڈنگ ٹپانے پے گئے نیں
رشتے دشمن نال نبھانے پے گئے نیں
اکھاں دی بے خوابی ویکھ کے مینوں وی
پھلاں کولوں خواب چرانے پے گئے نیں
جٹاں نے وی کدوں رعایت کیتی سی
جے اوہناں نوں اج ٹوانے پے گئے نیں
ہو کے فر مجبور غریبی دے پاروں
ماں نوں پکھے بال سوانے پے گئے نیں
ویلا ایہہ کی بنیا شاہ دی ملکہ تے
کمییاں دے وی بال کھڈانے پے گئے نیں
فیصلے جہیڑے حق تے سی پنچیتاں دے
ہورے کاہنوں او لمکانے پے گئے نیں
اجے تے ستے لوک جگا کے ستا ساں
اٹھ کے مینوں فیر جگانے پے گئے نیں
ایس دھرتی دا قرض بڑا سی میرے تے
دے کے خون تے فرض نبھانے پے گئے نیں
تابشِ کاہدا گلہ جے تینوں گل پا کے
لیکھاں والے ڈھول وجانے پے گئے نیں
