ہمارا معاشرہ عورت کو کوٹھا چلانے کی اجازت تو دیتا ہے مگر اسے ٹانگا چلانے کی اجازت نہیں دیتا
یہ مشہور قول افسانوں کی دنیا کے نامور اپنے وکھرے پن اور بغیر کسی لگی لپٹی کے بولنے اور لکھنے والے لکھاری سعادت حسن منٹو کا ہے جن کو فحش نگار اور فحاشی پھیلانے کے الزامات، مقدمات اور جیل کا سامنا بھی کرنا پڑا ۔
سعادت حسن منٹو 11 مئی 1912کو بھارت کے شہر لدھیانہ میں پیدا ہوا اور 18 جنوری 1955کو لاہور میں انتقال کر گئے ۔
ان کے مشہور افسانوں میں، ٹھنڈا گوشت، ٹوبہ ٹیک سنگھ، اللہ دتہ،اور الو کا پٹھا و دیگر شامل ہیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہمیشہ غیر کی عزت تیری محفل میں ہوئی
ترے کوچے میں جا کر ذلیل و خوار ہوئے
اس دلچسپ شعر کے خالق شوکت تھانوی ہیں ۔ شوکت تھانوی 12 فروری 1904 کو بھات کے ضلع متھرا میں پیدا ہوئے اور 4 مئی 1963کو لاہور میں انتقال کر گئے ۔ وہ مزاحیہ شاعر اور صحافی تھے ۔ وہ روزنامہ جنگ راولپنڈی کے ایڈیٹر رہے اور جنگ میں وغیرہ وغیرہ کے عنوان سے کالم بھی لکھتے رہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سید ضمیر جعفری کا ایک مشہور شعر ہے
ہم نے کتنے دھوکے میں سب جیون کی بربادی کی
گال پہ اک تل دیکھ کے ان کے سارے جسم سے شادی کی
سید ضمیر جعفری بھی ایک مزاحیہ شاعر ،ادیب اور صحافی تھے ۔ وہ یکم جنوری 1914کو ضلع جہلم میں پیدا ہوئے اور 12مئی 1999کو نیو یارک امریکہ میں انتقال کر گئے اور ضلع راولپنڈی میں ان کی تدفین ہوئی ۔ وہ پاک فوج میں میجر کے عہدے سے رٹائر ہوئے ۔ انہوں نے راولپنڈی سے روزنامہ باد شمال کا اجراء کیا ۔ ان کو صدارتی تمغہ حسن کارکردگی کے اعزاز سے نوازا گیا ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خرد کا نام جنوں پڑ گیا جنوں کا نام خرد
جو چاہے آپ کا حسن کرشمہ ساز کرے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چپکے چپکے رات دن آنسو بہانا یاد ہے
ہم کو اب تک عاشقی کا وہ زمانہ یاد ہے
مندرجہ بالا دونوں مشہور اشعار حسرت موہانی کے ہیں ۔ حسرت موہانی یکم جنوری 1875کو بھارت کے شہر موہان میں پیدا ہوئے اور 13مئی 1951کو لکھنو میں ان انتقال ہوا ۔ وہ شاعر ،ادیب اور صحافی تھے ۔ ان کا ایک اور بہترین شعر ہے
نہیں آتی تو ان کی یاد برسوں تک نہیں آتی
مگر جب یاد آتے ہیں تو اکثر یاد آتے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سبط علی صبا کا ایک ضرب المثل شعر ہے
دیوار کیا گری مرے خستہ مکان کی
لوگوں نے میرے صحن سے رستے بنا دیئے
سبط علی صبا 11 نومبر 1925 کو سیالکوٹ میں پیدا ہوئے اور 14مئی 1980کو واہ کینٹ میں انتقال کر گئے ان کے 2 مزید اشعار ملاحظہ ہوں
لوگوں کی چادروں پہ بناتی رہی وہ پھول
پیوند اس نے اپنی قبا میں سجا لیے
ہر حرملہ کے دوش پہ ترکش کو دیکھ کر
مائوں نے اپنی گود میں بچے سجا لیے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عبیداللہ علیم کا ایک خوبصورت شعر ہے
محبتیں بھی عجیب اس کی نفرتیں بھی کمال
مری ہی طرح کا مجھ میں سما گیا اک شخص
عبیداللہ علیم 12 جون 1939 کو بھوپال ہندوستان میں پیدا ہوئے اور 18 مئی 1998 کو کراچی میں انتقال کر گئے ۔ ان کا ایک اور شعر ملاحظہ ہو
میں یہ کس کے نام لکھوں جو الم گزر رہے ہیں
میرے شہر جل رہے ہیں میرے لوگ مر رہے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اب تو دروازے سے اپنے نام کی تختی اتار
لفظ ننگے ہو گئے شہرت بھی گالی ہو گئی
تلخیوں سے بھرا یہ شعر اقبال ساجد کا ہے ۔ وہ 1932 کو بھارت کے شہر لنڈھو سہارنپور میں پیدا ہوئے اور 18مئی 1988کو لاہور میں انتقال کر گئے ۔ اس بہترین شاعر کی تمام زندگی غربت اور فاقہ کشی میں گزر گئی ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گیدڑ کی سو سالکی زندگی سے شیر کی ایک دن کی زندگی بہتر ہوتی ہے
یہ مشہور قول ٹیپو سلطان شہید کا ہے ۔ وہ 20 نومبر 1750 کو میسور کے حکمران حیدر علی کے گھر میں پیدا ہوئے اور 4 مئی 1799 کو سرنگا پٹم کے میدان میں برطانوی فوج سے بہادری کے ساتھ لڑتے ہوئے شہید ہو گئے ۔
ٹیپو سلطان شہید کا اصل نام فتح علی خان تھا وہ اپنوں کی غداری کی وجہ سے دشمن کے ہاتھوں شہید ہوئے ۔ شاعر مشرق علامہ اقبال نے ٹیپو سلطان کی نصیحت کے عنوان سے ایک نظم لکھی جس سے چند اشعار آپ کی سماعتوں کی نذر
تو رہ نورد شوق ہے منزل نہ کر قبول
لیلی بھی ہم نشیں ہو تو محمل نہ کر قبول
اے جوئے آب بڑھ کر ہو جا دریائے تند و تیز
ساحل تجھے عطا ہو تو ساحل نہ کر قبول
باطل دوئی پسند ہے حق لا شریک ہے
شرکت میانہ حق و باطل نہ کر قبول
