تھوڑا تھوڑا یاد اے، شام دا ویلاسی میں گیمز توں پرتیا ای سی کہ میجرنقوی دےکمرےوچ پیشی دے آرڈر آگئے
اندراوس ویلے دے کپتان تے ماشأاللہ اج دے بریگیڈیئر ظلِّ حسنین قالین اتے آلتی پالتی مارے بیٹھے سی
ماحول تے طبیعت دونویں زوراں تے سن میجرصاحب نے اشارہ کیتا تے ساریاں توں جونیئر افسر یعنی میں کیسٹ پھڑکے وی سی آردےاڈّے منہ وچ پا دتی
ایس گل نوں کنےای ورہےہو گئےپر ڈرامےدا ناں اج تک یاد اے سونےدی چڑیا
تے اوہدا پہلاسین وی، سہیل احمد سیٹھ بنیا صوفے تے بیٹھا اے تے ایدھروں دونویں نوکرشوکی خان تے مستانہ انٹری دیندے نیں فیر ایک پرانی دلاں وچ کھب جان والی ہاک
ٹانگے ٹیشن تےآئےہوئےنیں،اوئے
ایہہ عباسیہ وچ بلکہ میری فوجی زندگی داپہلا پنجابی ڈرامہ سی
رجمنٹ کچھ مہینےپہلےسیاچن دیاں برفاں توں تھلےاتری سی تے نگھ آون توں پہلاں ای مینوں نویں افسرنوں توپخانےدا پہلا سبق یاد کران لئی نوشہرہ گھل دتا سی واپس اگوکی پرتےنوں ہالےدوجا دن سی جدوں افسراں نےمینوں ’ڈرامہ اِن ‘ کیتا
لوکیں ڈائین انِ ہوندےنیں تے میں ڈرامہ اِن ہویا
ہن تسیں کہووگے کہ چنگی یونٹ سی تے میں کہہ دواں گا کہ اسیں سارے افسر تے جوان اپنی ذات وچ اک ڈرامہ سی
جنگجوطبیعت وچ اک توں ودھ کے دوجا پر شغل میلےدا وکھرا ای رنگ ڈرامہ ویکھنا ہووے یا یونٹ نے سالانہ ایونٹ تے ڈرامہ کرنا ہووے ایک توں ایک وڈا اداکار تے موسیقار تے واجے والا موجود
اور انہا ں دے ہدایتکار میجر ریٹائرڈ زاہد چشتی ملتانی رحمتہ اللہ علیہ بقلم خود
لئو جی گل نکل گئی تے ویکھو کیہڑے پاسے چلی گئی عباسیہ ایک سوہنڑا گلدستہ سی جیہدے پھُل اج وی اوہو ای خوشبو دیندے نیں ، ایہہ تے تسیں آپ ویکھ لیا
تے اس گلدستے وچ یو ای ٹی توں نسّیا، لہور دے ہوسٹلاں دا کھلارو سکینڈ لفٹین عمران اپڑیا تے گل تے آپ اگےّ ودھنی سی
اگوکی دی اس شام سنہری چڑیا وچ مستانے نو ں میں پہلی واری نہیں ویکھیا سی ڈرامےداچسکاپرانا سی
یوای ٹی وچ ہوندیاں تھیٹر جاکے تےشاید بوہتےڈرامےناویکھےہون پر پنجابی ڈرامےدی سمجھ لہوررہندیاں آگئی سی
تے سجنو میچ فیر سمجھ آون توں بعد ای پیندا اے
شیبا حسن ببوبرال البیلا تےشوکی خان دی جوڑی ویکھی
سہیل احمد امانت چن انجم نواز دے جوڑی دارویکھے تے انہاں وچ ایک وکھرے رنگ وچ رلدا مرتضیٰ حسن
مرتضیٰ حسن دی ایس توں ودھ وڈیائی کی ہوئے گی کہ انہوں کوئ اوہدے اصل ناں دےنال نہیں جاندا۔ پنجابی سٹیج تے اوہدی شناخت مستانہ بنی تے اوہ ساری عمر مستانہ ہی رہیا سہیل احمد دا کوئی ڈرامہ مستانےتوں بغیرنئیں سی بندا تے مستان دا ناں گارنٹی ہوندا سی کہ لافٹروی آئےگا تے ڈرامہ وی چلّے گا
لافٹردی سن لوو مستانہ ہالے سٹیج تے آوندا ای سی کہ لوکاں دے ہاسے ڈُلنےشروع ہوجاندےسی ایتھےتک کہ مستانےنو ں کہنا پے جاندا سی
یار ایہدے وچ ہسّن والی کیہڑی گل اے!
اوہ سٹیج دے اتے پائی بوکاٹا والی دھمال ہووےکہ جھنگ چھکا جھنگ چھکا کرد ا جنگلی ڈانس
جانگلی لہجےوچ مکالمیاں دی ادائیگی ہووےکہ طارق ٹیڈی والی شناختی نشان جگت ’اؤتری ماں دا فائنل بچہ‘
یا فیر کوٹھا دا اوہ لہکدا تے مہکدا ڈائیلاگ ’ایہہ سب شعاواں دا چکر اے‘
مستانہ ہاسیاں دا دوسرا ناں سی فیرجس طرحاں جگ دی ریت اے ہسان والے وچھوڑیاں دا دکھ دے کے ٹُر جاندے نیں ، مرتضیٰ حسن وی اک دن ٹُر گیا
رونا ایس گل دا اےکہ مرتضیٰ حسن دے جان توں بہت پہلاں مستانہ مرگیا سی
لہوروں کراچی جاندیاں جد میں گڈّی بہاولپورول موڑی تے اوہ آپ ہی آپ محلہ عام خاص قبرستان ول ٹُر دی گئی سجنو تےمترو! اوتھے ساڈا مستان دلبرجان دفن اے
جدوں اوہ حیات سی تے لوکاں وچ ہاسے کھلاردا سی ، تھکے ہاریاں دا دل شاد کرداسی
اج مستانے دی برسی اے۔ رب سوہنا اوہدے کھلارے ہاسیاں دے صدقے اوہنوں جنتاں وچ سوہناجیہا گھر دیوے
آمین
