خود لٹا کر چھوڑ آئے جس کی خاطر کارواں
رہزنوں کے ساتھ وہ رہبر ہمارا مل گیا
ناصرہ زبیری
تاریخ پیدائش: 6 ستمبر 1969
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آغا نیاز مگسی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
معروف پاکستانی شاعرہ اور صحافی ناصرہ زبیری 6 ستمبر 1969 میں لاہور میں پیدا ہوئیں۔ انہوں نے اپنے آبائی شہر لاہور میں ابتدائی تعلیلم کے بعد پنجاب یونیورسٹی لاہور سے اکنامکس میں ماسٹر ڈگری حاصل کی ۔ 1988 میں شعبہ صحافت سے وابستگی اختیار کی جس کی ابتدا انہوں نے پاکستان میں بزنس کے پہلے روزنامہ ” بزنس ریکارڈر ” سے کی ۔ انہوں نے پارلیمنٹ کے دونوں ایوانوں ، ایوان زیریں اور ایوان بالا میں معاشیات کے تناظر میں بھرپور کوریج اور رپورٹنگ کی۔ 1999 میں انہوں نے عصری اور جدید تقاضوں کے تحت الیکٹرانک میڈیا کا رخ کیا جس کا میں اپنے نئے کیریئر کا آغاز پی ٹی وی ورلڈ سے کیا۔ ناصرہ کو پاکستان کے 3 بڑے نیوز چینلز کی لانچنگ کی ٹیم کا حصہ بننے کا اعزاز حاصل رہا ہے جن میں 2002 جیو نیوز اور 2005 آج نیوز اوراس کے بعد نیوز ون شامل ہیں۔
ناصرہ زبیری صحافی کے ساتھ ساتھ ایک بہترین شاعرہ بھی ہیں جن کی شاعری کی تعریف ممتاز شعرا انور شعور، احمد ندیم قاسمی، احمد فراز ، پیرزادہ قاسم اور محمد علی صدیقی جیسی ادبی شخصیات نے بھی کی ہے۔ ناصرہ زبیری کے ابت کے تین شعری مجموعے شاٹع ہو چکے ہیں جن میں ‘شگون’ ، ‘کانچ کا چراغ’ اور ‘ تیسرا قدم’ شامل ہیں۔ وہ ایک اچھی ناول نگار بھی ہیں ۔ وہ مشاعروں میں بھی اکثر شرکت کرتی ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ناصرہ زبیری کی شاعری سے انتخاب
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کاغذی کشتی کی آمد کا اشارہ مل گیا
ڈوبنے والے کو تنکے کا سہارا مل گیا
ہو گیا شامل غرض کا رنگ موج عشق میں
جھیل کے نتھرے ہوئے پانی میں گارا مل گیا
گھل گئی بیتابیٔ دل وقت کے محلول میں
ضبط کے ٹھہرے ہوئے پانی میں پارہ مل گیا
دل کے کاروبار میں حاصل کی کوئی شرط ہے
مل گیا اس راہ میں جس کو خسارہ مل گیا
نا مکمل خواہشوں کا درد کھو دینے کے بعد
یوں ہوا پھر وہ مجھے سارے کا سارا مل گیا
رکھ چکا ہے رہن وہ پہلے ہی اپنی روشنی
کس ستارے سے مرے دل کا ستارہ مل گیا
خود لٹا کر چھوڑ آئے جس کی خاطر کارواں
رہزنوں کے ساتھ وہ رہبر ہمارا مل گیا
کھو گیا وہ کس طرح جس کو کبھی پایا نہیں
جس کو پایا ہی نہیں کیسے دوبارہ مل گیا
سبز پرچم کو ملی آزاد موسم کی ہوا
ہم کو اپنی سر زمیں کا چاند تارہ مل گیا
…
لہو میں گرچہ بدن تر بہ تر حسین کا ہے
رضاۓ رب ہے تو سجدے میں سر حسین کا ہے
بُجھے چراغ میں چاہے جو رہ بدل جاۓ
کٹھن بہت ہے جو آگے سفر حسین کا ہے
اُجڑ چُکا ہے جو دربار ، وہ یزید کا تھا
جہاں سلام ہیں حاضر وہ در حسین کا ہے
تمیز کرنا مرے دل! تُو حق و باطل میں
منافقت پہ نہ چلنا ، اگر حسین کا ہے
غضب کے مرثیے لکھیں ، بلا کے سوز و سلام
ہمارے شعروں پہ کتنا اثر حسین کا ہے
۔…………………………………………………
مدت سے پنپتی ہوئی سازش نے ڈبو دیا
کہنے کو مرے شہر کو بارش نے ڈبو دیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہم سوچتے ہی رہ گئے بدلیں گے ایک دن
وہ دیکھتے ہی دیکھتے کیسا بدل گیا
