لگیاں وت وساکھیاں جھومری جھم ٹرے

لگیاں وت وساکھیاں جھومری جھم ٹرے۔
"یار ہنڑ او ویلے نہیں رہے گئے جڈاں وساخ اچ گاہ گہیندے ہن، لوگ ہک بئے کوں ونگار ڈینڈے ہن ، ڈانداں دیاں جوڑیاں ہوندیاں ہن سب پکھی اپنڑا رزق کھا ویندے ہن، ہنڑ تاں مہور مرے اے تھریشر آ گئی ہے مل ملاپ مکا چھوڑا ہس" اے اتے ایں طرح دے جملے جہڑے ہک پروقار ماضی نال جڑے ہووے ہن ہمیش نانے آحمد بخش کوں مونجھا کریندن، اتے سچ وی تاں ہے جتھے میلے لگدے ہن آج اتھے کالونیاں بنڑ گئی ہن۔ جتھے ڈاند بھجدے ہن اتھے پکی سڑک ہے اتے جتھے کھوہ ہن اتھے واٹر پلانٹ ہن، نا میلے تے میل ہے نا کھوہ تے پانڑی دے بہانے کوئی ملنڑ آ سگدے۔

جے قوماں آپنڑے ماضی نال تڑٹی ہوئی تند جوڑ گھنن تاں ول 
اوہے ساری گالہیں جو ہنڑ یاد آندن تاں چنگی لگدی ہے ہر "بدتمیزی"
میڈا اوکوں آکھنڑ شمی نکمی ، اوندا ول چہڑاونڑ عزیزی گزیزی
خوش بخت ہے سرائیکی قوم جئیں اپنڑی سنجڑان دی جنگ بندوخ نال نہیں جھمر نال جیتی ہے۔ آج بغیر لڑے ریاست ایں قوم کوں ہر سطح تے تسلیم کر گدے ، اتے یونیورسٹی دی سطح تئیں سرائیکی زبان و ادب پڑھیندا پئے تے ریسرچ تھیندی پئی ہے۔ 
بہاوالدین زکریا یونیورسٹی ملتان اچ جڈاں " سرائیکی ایریا سٹڈی سنڑ " بنڑایا گیا تاں وسیب ہک بئے کوں گل لا مبارخاں ڈتیاں جتھے میوزیم اچ سرائیکی آرکائیوز دی سانبھ سنبھال تھیونڑ لگ گئی ، وسوں دی امیداں بہوں ہن اتے اللہ جانڑے ادارے دیاں کوئی مجبوریاں ہوسن ہک وتھ رہے گئی جئیں رج مونجھا کیتا، ول ہک ڈیہاڑے خبر ملی جو سنڑ دا ڈایریکٹر ڈاکٹر ممتاز خان کلیانی بنڑ گئے ہن ایویں لگے بقول شاعر اشکر فروقی
کاک ندی دی کندھ تے..
ڈٹھم خواب ایانڑاں..
گھاگھرا واہندا ڈٹھم..

ممتاز خان کلیانی سئیں کوں محبت دا ڈوجھا ناں آکھوں تاں سچ ہے، سامنڑے آلے کوں ہمیش آدر ڈیڈن اتے پورے وجود نال اوکوں ایں سنڑندن جیویں کوئی مراقبے اچ بیٹھا ہووے۔ ہک آس امید جاگ پئی، ہر ہک کوں خود اطلاع ڈیتونے کہ آؤ اپنڑے شعبے اچ آو لوک آئے اتے گل لا کے اپنڑا ڈکھ سنڑایا
انڑ سونہی سوہنوانڑی 
انڑ ڈھٹی ہنڈاونڑی
جاگ جاگ لاونڑی 
کہیں کوں کیا ڈساونڑی
رات کیویں کٹی اے
بدلے اچ انہاں پروفیسر نسیم اختر صاحبہ پروفیسر عارف رجوانہ صاحب پروفیسرحافظ فیاض نائچ صاحب، پروفیسر عمار یاسر کھاکھی کوں نال لایا اتے خواجہ غلام فرید کوں سورا کانفرنس اچ اعلان کیتونے ایں واری اساں وساخی منیسو، ول اوہا تھیا آج 13 وساخ کوں ہک میلہ ہئی ، کنڑک کوں ہتھ لا کے افتتاح تھیا، ول جھمر لگ گئی ، اجرک پوا کے سواگت کیتونے، ساگ مسی روتی تے کسی نال نرھان کروایا ۔ مرشد شمیم عارف قریشی وساخی انداز اچ اجرک ولائی ودے ہن ، اکرم میرانی سئیں دے مکھ تے ہک اعتماد ہئی، ملک فرید خوشی توں ہتھ نہن آندے، عبد الطیف بھٹی اپنڑی کہانڑی دے جادو کریندے بیٹھے ہن ایویں لگا جیویں فرید دا خاب پورا تھیا ہووے " جھوکاں ول آباد تھی گئیاں" آج میں نانے کوں ڈسنڑ جوگا تھی پیا جو میں او ویلا ڈیکھ آیا ہاں۔ 
مرشد ممتاز خان کلیانی سئیں میکوں میڈے نانے نال تڑٹی گال جوڑواونڑ دا شکریہ۔ تہاکوں اتے تہاڈی پوری ٹیم کوں نو لکھ مبارک، آج تہاڈی جھمر اچ پورا وسیب تہاڈے نال کھیڈا کھڑے اے وتھ جھمر ہی مکا سگدی ہئی۔ 
اللہ او اللہ

ایہہ تحریر فیس بُک دے ایس پیج توں لئی گئی اے۔

“