61:اسحاق وردگ
سید محمد اسحاق شاہ گل 24 اپریل 1978 میں کوچہِ رسالدار قصہ خوانی پشاور پیدا ہوئے
میٹرک ایڈورڈز ہائی اسکول پشاور ، ایم.اے اردو، پشاور یونی ورسٹی.
ایم.فل اردو، پشاور یونیورسٹی
پی.ایچ ڈی اردو ادب،پشاور یونیورسٹی سے کی ۔
وہ صدر شعبہءاردو/اسسٹنٹ پروفیسر فیڈرل گورنمنٹ کالج نوشہرہ کینٹ اور وزیٹنگ پروفیسر، شعبہءاردو سرحد یونی ورسٹی پشاور ہیں
خیبر پختونخوا کی جدید اردو شاعری کے اہم تخلیق کار اسحاق وردگ کو ساتویں جماعت میں بچوں کے ادبی رسائل پڑھنے سے لکھنے کی تحریک ملی. اور دیکھتے ہی دیکھتے ان کی کہانیاں,نظمیں بچوں کے ادبی رسالوں ماہنامہ پھول, تعلیم و تربیت,انوکھی کہانیاں,آنکھ مچولی اور بچوں کے ادبی صفحات میں شائع ہونے لگیں.
“بچوں کے ادب میں دعوت اکیڈمی” سے نشان اعزاز حاصل کرنے والے خیبر پختونخوا کے واحد مصنف کالج تک پہنچتے پہنچتے اسحاق وردگ کے نام سے اپنی ادبی پہچان بنا چکے تھے۔
اس دوران مختلف ادبی صفحات کی ادارت کے فرائض نبھاتے رہے۔ 2007 سے 20111 تک حلقہءارباب ذوق پشاور کے سیکرٹری رہے ہیں۔مسلسل پانچ سال تک ریڈیو پاکستان پشاور کے اردو ادبی پروگرام بزم ادب کی نظامت کرتے رہے ہیں.
ان دنوں ادبی تنظیم انجمن جدت پسند مصنفین کے مرکزی صدر ہیں ۔
اسحاق وردگ کا نام شعری منظر نامےکا معتبر حوالہ ہے ۔
آئیے ان کے کچھ اشعار دیکھتے ہیں
۔۔۔۔۔۔۔۔۔۔۔۔۔۔۔۔
میں خالی گھر میں بھی تنہا نہیں تھا
کہ جب تک آئینہ ٹوٹا نہیں تھا
جہاں سیراب ہوتی تھی مری روح
وہ صحرا تھا کوئی دریا نہیں تھا
۔۔۔۔۔۔۔۔۔۔۔۔۔۔۔۔۔۔۔۔۔۔
کاغذ کے بنے پھول جو گلدان میں رکھنا
تتلی کی اداسی کو بھی امکان میں رکھنا
ایک فتوی’ ہمارے فرقے پر!
ہم محبت کو دین کہتے ہیں
۔۔۔۔۔۔۔۔۔۔۔۔۔ ۔ ۔ ۔۔۔۔۔۔۔
اس پار کا ہو کے بھی میں اس پار گیا ہوں
اک اسم کی برکت سے کئی بار گیا ہوں
۔۔۔۔۔۔۔۔۔۔۔۔۔۔۔۔۔۔۔۔۔۔۔
خیرات میں دے آیا ہوں جیتی ہوئی بازی
دنیا یہ سمجھتی ہےکہ میں ہار گیا ہوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تھامے ہوئے اک روشنی کے ہاتھ کو ہر شب
پانی پہ قدم رکھ کے میں اس پار گیا ہوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مشکل ہے تجھے آگ کے دریا سے بچا لوں
اے شہرِ پشاور میں تجھے ہار گیا ہوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دروازے کو اوقات میں لانے کے لیے میں
دیوار کے اندر سے کئی بار گیا ہوں
…………………………
میں نے بھی راہِ محبت میں قدم رکھّا ہے..
قیس کو آخری معیار نہ سمجھا جائے…
۔۔۔۔۔۔۔۔
ہماری خاک ہی میں مسئلہ ہے۔،
شکایت کچھ نہیں کوزہ گروں سے
۔۔۔۔۔۔۔۔۔۔۔۔۔۔۔۔۔
فلک کے راز سارے کھول دوں گا
ابھی میں وجد میں آیا نہیں ہوں
۔۔۔۔۔۔۔۔۔۔۔۔۔۔۔۔۔
سمندر کو بھی پی لوں گا کسی دن
میں صحرا ہوں کوئی دریا نہیں ہوں
۔۔۔۔۔۔۔۔۔۔۔۔۔۔۔۔
عجب کردار ہوں میں زندگی کا
کہانی میں کبھی آیا نہیں ہوں
۔۔۔۔۔۔۔۔۔۔۔۔۔۔۔۔
مجھے گم نام ہی مرنا پڑے گا
کسی کے دل پہ میں لکھا نہیں ہوں
۔۔۔۔۔۔۔۔۔۔۔۔۔۔
میں اس سے خواب کے رستے پہ ملنے والا ہوں
مگر وہ نیند سے بیدار ہونے والا ہے
۔۔۔۔۔۔۔۔۔۔۔۔
طوفاں کی طرح دشت کے منظر سے اٹھا ہے
وہ شخص جو ہارے ہوئے لشکر سے اٹھا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سائے کو موت سے جو بچانا پڑا مجھے
سورج کے ساتھ ڈوب کے جانا پڑا مجھے
دل اس کے التفات پہ مائل نہیں رہا
وہ آگیا تو موڈ بنانا پڑا مجھے
۔۔۔۔۔۔۔۔۔۔۔۔۔۔۔۔۔۔۔
ہمارے ساتھ اٹھتا بیٹھتا تھا
وہ اک بندہ خدا ہونے سے پہلے
………………………
بہت مضبوط سی دیوار تھا میں
کسی کا راستہ ہونے سے پہلے
…………………….
دیوانوں کے مانند مرے شہر کے سب لوگ
دستار کے قابل کوءی سر ڈھونڈ رہے ہیں
…………………
اب شام ہے تو شہر میں گاوءں کے پرندے
رہنے کے لیے کوءی شجر ڈھونڈ رہے ہیں
………………
یہ کالم فیس بُک کے اس پیج سے لیا گیا ہے۔
