اقبال میلہ پاکستان کے رنگ وسیب کے سنگ

بہاولپور شہر میں یوم اقبال کے حوالے سے تقریبات سجائی جارہی ہیں۔ اسلامیہ یونیورسٹی اور دیگر کئی اداروں کے اشتراک و تعاون سے وسیب میں تین روزہ میلے کی تیاریاں جوبن پر ہیں۔ان تقریبات میں پاکستان کے تمام صوبوں اور علاقوں کے ثقافتی اور تہذیبی رنگ دکھائی دیں گے۔ معروف شاعر سید عارف معین بلے نے اس حوالے سے اپنے تاثرات کو شعری زبان بخشی ہے ۔ بہاولپور کے وَاسی بھی جی اٹھے ہیں۔ قارئین کرام کو وسیب میں سجنے والے رنگ دکھانے کیلئے سید عارف معین بلے کی خوبصورت نظم کو زینت بنایا جارہا ہے۔اس نظم میں آپ کو پاکستانیت بھی دھڑکتی اور سانس لیتی نظر آئے گی۔اب آپ ملاحظہ فرمائیے پاکستان کےحوالے سے معروف اور قادرالکلام شاعر سید عارف معین بلے کی شعری کاوش،جو محبان وطن کے دلوں کے تار ہلا سکتی ہے۔ آزمائش شرط ہے۔
پاکستان کے رنگ ۔ وسیب کے سنگ
نظم نگار: سید عارف معین بلے
*************************
سندھ اور پنجاب ، کے پی کے ، بلوچستان کے
رنگ ہیں ستلج کنارے پورے پاکستان کے
*************************
سج رہا ہے ایک دُلہن کی طرح بے شک وسیب
دیکھئے ، دلکش نظارے روہی چولستان کے
*************************
اِک نئی دُنیا میں رکھیں، آئیے ہم بھی قَدَم
آئیے ، رَل مِل کے کھولیں بارہ دَر اَیوان کے
*************************
یکجا ہیں تسبیح کے دانوں کی طرح دیکھو قوم
ایماں کی بنیاد پر رشتے ہیں جسم و جان کے
*************************
جوہر قابل سے مالا مال ہے یہ ارض پاک
ڈھونڈنے ہوں گے خزائن یہ بھی پاکستان کے
*************************
اتحاد ، ایمان اور تنظیم تھا ، اپنا شعار
سوچو اب تابع ہیں کیاقائدکےہم فرمان کے
*************************
ہاکڑہ تہذیب کی اقدار مِٹ سکتی نہیں
جب تلک زندہ ہیں وَاسی یارو چولستان کے
*************************
ہے حقوق و فرض ہی کا کھیل ساری زندگی
رکھنے ہوں گے اب برابر پاٹ بھی میزان کے
*************************
ہے دُعا قسمت کی طرح اب چمکتے ہی رہیں
آسماں کے تارے ہوں یا ذرّے ریگستان کے
*************************
زرد رُت بھی موسم گُل ہی کی تو تمہید ہے
لگتاہے کہ پھول کھل سکتے ہیں ،اَب ارمان کے
*************************
جتنے بھی مثبت ہیں پہلو ساری دُنیا دیکھ لے
نقش رَل مِل کر اجاگر کیجے پاکستان کے
*************************
جنگ رَل مِل کر کرو ہر اِک برائی کے خلاف
آؤ میدان عمل میں اپنا سینہ تان کے
*************************
سیکھ لیں اپنی خطاؤں سے اگر اب بھی سبق
فائدے ہم بھی اُٹھاسکتے ہیں ہر نقصان کے
*************************
ہے سمیع اللہ ، کلیم اللہ پہ نازاں اب بھی قوم
روہی کی پہچان ، یہ چہرے ہیں پاکستان کے
*************************
اللہ اللہ ، عشق و ایماں کی چھڑِ ی ہے خوب بات
نغمے گونج اُٹھّے فضاؤں میں پٹھانے خان کے
*************************
بیٹھنا ہوگا بڑے لوگوں کو اَب سر جوڑ کر
آج پوری قوم دیکھو زد میں ہے بحران کے
*************************
ہے یہ کوشش قوم کو بیدار کرنے کےلئے
پورے ہوں مقصد سبھی ، تحریک پاکستان کے
*************************