عِلم کی چِلم

“How do you know so much?”
(’’تُم اِتنا زیادہ کیسے جانتے ہو؟‘‘)
ویسے میَں نے دنیا میں کیا دیکھا ہے
تم کہتےہو تو پھر اچھا ، دیکھا ہے
زندگی میں کئی اُتار چڑھاؤ آنے کے باوجود میَں کبھی تصور بھی نہیں کر سکتاتھا کہ ایک دِن میری آنکھوں پر پَٹّی باندھ کر مُجھ سے انگریزی میں ایسا احمقانہ سوال بھی کیا جائے گا۔ کیا عِلم کی زیادتی بھی خطرناک سمجھ کر کسی کے خلاف استعمال کی جا سکتی ہے؟ محض اِس لئے کہ کہ دونوں کانوں کے درمیان میری کھوپڑی کے اندر یہ عِلم تھا کہ ہمارے پیارے وطن میں ٹیکنالوجی کی کیا صورتِ حال تھی ، کہ لوگ مُجھ پراِتنااعتماد کر سکتے ہیں کہ کِسی بھی دفاعی ادارے نے مُجھ سے کُچھ بھی خریدنے کے لئے میری اور میری کمپنی کی سیکیورٹی کلیئرنس نہ مانگی نہ کروانے کی زُحمت گوارا کی تھی اِس معاملے میں میرا قصور کیا تھا؟
’’یہ چلتا پِھرتا ایٹم بم کب سے اِسلام آباد میں گھوم رہا ہے؟ اِس کو بند ہی کرنا پڑے گا‘‘
بند آنکھوں اور کُھلے کانوں سے میَں ایک اَن دیکھے تفتیشی حضرت کا اپنے ساتھیوں سے کیا گیا طنزیہ سوال اور فیصلہ سُن رہا تھا۔
میَں تو لب کھول کے پابندِ سلاسل ٹھہرا
تیری بات اور ہے تُو صاحبِ محفل ٹھہرا
کسی کے سوال پر کہ میَں نے اپنی زندگی کے لئے فزکس کا مضمون کیوں چُنا میَں نے اُسے یہ قِصہ بتایا تھا۔
آئن سٹائن نے امریکہ کی ایک یونیورسٹی میں فزکس کا ایک امتحان لیا۔ ایک دوست نے پچھلے سال کے امتحانی پیپر سے موازنہ کے بعد حیرانی سے آئین سٹائن سے پوچھا ’’حالیہ سال اور پچھلے سال کے پیپر دونوں کے سوالات ایک جیسے ہی ہیں! وہ کیوں؟‘‘
آئن سٹائن نے جواب دیا، ’’اسلئے کہ پچھلے ایک سال میں جوابات بدل گئے ہیں!‘‘
کئی بار اس کی خاطر ذرّے ذرّے کا جِگر چیرا
مگر یہ چشمِ حیراں، جِس کی حیرانی نہیں جاتی
میَں بھی ماضی کی فرسودہ دقیانوسی روایات کو رٹّا لگانے کی بجائے ایسا عِلم سیکھنا چاہتا تھا جس میں سوال تو ہمیشہ وہی رہیں لیکن جواب ہر سال بدل جائیں۔ میَں ایسا اُستاد نہیں بننا چاہتا تھا جس نے کِسی میٹنگ میں بڑے فخر سے اپنے اکیس سالہ تجربے کا دعویٰ کیا تھا لیکن کسی نے اُس کو یہ کہتے ہوئے چُپ کروا دیا تھا ’’ نہیں! تم نے پہلے سال کے تجربے کو بیس دفعہ دُہرایا ہے!‘‘
اب یہ لکھتے ہوئے میَں سوچتا ہوں۔ ہماری قوم کی پسماندگی کا بنیادی مسئلہ یہی لگتا ہے۔ ہم سمجھتے ہیں کہ جس عِلم سے ہم یہاں تک پہنچے ہیں وہی عِلم ہمیں وہاں تک لے جائے گا۔ کیا ہم سب اشفاق احمد کے ریڈیو ڈرامے تلقین شاہ کے کردار ہدائیت اللہ کی مانند ہیں؟ ’’ہدایت اللہ تیَں ترقی نہیں کرنی!! تیَں بے ہدائیتا ہی رہنا‘‘۔
ایک مشہور فلاسفر ٹی ایچ ہَکسلی نے لکھاتھا،’’جو ہم جانتے ہیں وہ محدود ہے، جو نہیں جانتے وہ لا محدود۔ عقلی طور پر ہم ایک چھوٹے سے جزیرے پر کھڑے ہیں جو چاروں طرف سے ایک لا محدود نا قابلِ تفہیم سمندر سے گھرا ہوا ہے۔ہماری ہر نئی نسل کا کام یہ ہے کہ وہ اس سمندر کو پیچھے دھکیل کر جزیرے کو ذرا اور بڑا کرتی جائے ‘‘۔
اپنے پیارے وطن میں اگلی نسلوں سے میَں بھی یہی اُمید رکھتا ہوں۔۔۔۔
رات کو سونے سے پہلے اپنے والد صاحب باؔجی کے ساتھ کہانی سننے لیٹا تو یاد آیا میَں نے کچھ پوچھنا تھا۔’’باؔجی! آج اسکول میں ہیڈ ماسٹر صاحب ہم سب کو زور زور سےکوئی حدیث سنا رہے تھے، ’’ بَچو! علم حاصل کرو خواہ چِین جانا پڑے‘‘۔ اسکول جانا تو مجھے سمجھ آ گیا کہ وہاں لکھنا پڑھنا سکھاتے ہیں۔ یہ چِین والا علم کون سا ہوتا ہے ‘‘؟
باؔجی نے جواب دیا ، ’’میاں باگی!دو باتیں کہوں گا۔ایک تو یہ کہ اس حدیث کو صحیح نہیں مانا جاتا یعنی ضعیف یا من گھڑت کہاوت کہا جاتا ہے۔ دوسری یہ کہ اُس زمانے میں موٹر گاڑیاں اور ہوائی جہاز تو ہوتے نہیں تھے۔ لوگ گھوڑوں اور اونٹوں پر سفر کرتے تھے اور لمبا فاصلہ طَے کرنے میں کئی مہینے لگ جاتے تھے۔ چین کو دنیا کا سب سے دُور درازعلاقہ سمجھا جاتا تھا۔ میرے خیال میں اس کہاوت کا مطلب ہے کہ علم بہت اہم چیز ہے اوراسکو حاصل کرنے کے لئے جتنی بھی محنت کی ضرورت ہو کرنی چاہئے‘‘
میرے نو سالہ دماغ نے پلٹی کھائی۔ ’’ اگر اتنی محنت کرنی پڑتی ہے تو پھر یہ کیسے معلوم ہو گا کون سا عِلم ضروری ہےورنہ ہم خواہ مخواہ فضول عِلم سیکھنے میں اپنا وقت ضائع کریں گے؟‘‘
’’تم نے بہت اچھا سوال کیا ہے!‘‘، باؔجی خوش ہو کر بولے
’’لیکن میَں تمہیں صرف اتنا کچھ بتا سکتا ہوں جو میری سمجھ میں آیا ہے۔ علمی قابلیت میں میَں صرف پانچ جماعتیں پاس ہوں، نہ میَں عربی فاضل ہوں نہ میَں منشی فاضل۔ انگریزی زبان میَں نے لاہور پرنٹنگ پریس میَں سِیسے کے حروف کو جوڑ جوڑ کر صفحات کی کمپوزنگ کرتے، اُن کتابوں کو پڑھ پڑھ کر اور برٹش انڈین آرمی میں اپنے انگریز افسروں سے سیکھی۔ گاؤں کے مولوی صاحب سے نماز اور قران پڑھنے کے لیےعربی اور ترجمے کے لئے اُردو سیکھی۔ خدا اُنکو جنت نصیب کرے، کہا کرتے تھے،
’’بیٹا اپنی زبان میں عربی کا ترجمہ سیکھنے کا مزا بھی کچھ اور ہی ہے، نماز میں عربی کے ساتھ ساتھ اپنی زبان میں ترجمہ بھی ذہن میں رکھا کرو۔ ہمیشہ ایسا قران رکھو اور پڑھوجس میں ترجمہ بھی ہوتا ہے تاکہ تمہاری سمجھ میں آتا رہے۔ عربی پڑھنے کا ثواب آخرت میں ضرورملے گا لیکن ترجمہ سمجھنے کا فائدہ تمہاری زندگی میں ہی تمہیں نظر آ جائے گا‘‘۔
میَں نے مولوی صاحب کی نصیحت پلے باندھ لی اور تمام عُمر اس پہ عمل کیا۔
میَں تمہیں صرف وہ سکھا سکتا ہوں جو میں نے پڑھا ہے‘ تجربہ کر کے خود سیکھا ہے لیکن میری ایک بات ہمیشہ یاد رکھنا۔ میَں ایک معمولی سا انسان ہوں۔ میرا عِلم‘ میرا تجربہ‘ میری سمجھ اور سوچ غلط بھی ہو سکتے ہیں۔ باقی تم نے خود سوچنا ہے ‘ دیکھنا ہے ‘ سیکھنا ہے۔ کسی عالم نے کہا تھا کہ دانشمند دوسروں کے تجربے سے سیکھتا ہے اور بے وقوف صرف اپنے تجربے سے۔ لیکن میرے خیال میں یہ پورا سچ نہیں۔
تمام علموں میں سب سے فائدہ مندعِلم یہ سوچنا سیکھنا چاہیے کہ ’’چیزیں کیسے کام کرتی ہیں‘‘۔ ایک لفظ ’ظاہر‘ ہو تا ہے اور ایک لفظ ’باطن‘۔ ایک لفظ ’آگہی‘ ہوتا ہے اور ایک لفظ ’گہرائی‘۔ انکو اچھی طرح سمجھو۔ جیسے تم نے ابھی ابھی سائیکل چلانا سیکھا ہے۔ یہ ظاہر ی عِلم ہے، مہارت ہے۔ لیکن جب تم یہ بھی سیکھ لو گے کہ سائیکل کے ایک ایک پُرزے کو علیحدہ کیسے کیا جاتا ہے کون سے اوزار کیسے استعمال کیے جاتے ہیں، گھومنے والے پُرزوں میں تیل اور گریس کیوں ہوتا ہے، ٹائر اور ٹیوب ربڑ سے کیوں بنے ہوتے ہیں، پنکچر کیسے لگایا جاتا ہے، ٹیڑھے پہیے کو سیدھا کیسے کیا جاتا ہے، سب پُرزوں کو دوبارہ کیسے جوڑا جاتا ہے اور کن باتوں کا خیال رکھا جاتا ہے تاکہ سائیکل چلانے والے کو کوئی مشکل پیش نہ آئے اور سائیکل کی بھی عُمر دراز ہو، وغیرہ وغیرہ، تو اِس کو سائیکل کاباطنی عِلم یا ہُنر کہہ سکتے ہیں۔ انتہائی گہرائی کا فرق ہوتا ہے عام ظاہری علم میں اور باطنی آگہی میں، رَٹّا لگانے میں اور ہُنر سیکھنے میں! ہُنر کو اپنا ایک مستقل اثاثہ سمجھ لو۔ اگر سمندری سفر کے دوران جہاز تباہ ہوجائے اور تُم بچ جاؤ تو تمہارے پاس صرف تمہارا ہُنر ہی رہ جائے گا۔‘‘
اپنے ہاتھوں کو لہراتے، اشارہ کرتے بآجی بولے، ’’زندگی میں جو بھی کام کرو کوشش کرو کہ تمہیں چیزوں کے ظاہر اور باطن، آگہی اور گہرائی دونوں کا عِلم اچھی طرح حاصل ہو جائے۔ چیزوں کا مطلب کچھ بھی ہو سکتا ہے۔ سائیکل بھی چیز ہے۔ گاڑی بھی چیز ہے۔ اسکول کا نصاب بھی چیز ہے۔ زندگی بھی چیز ہے اور موت بھی۔ سوال کیسے کرنا ہے۔ جواب دینا کیسے سیکھنا ہے۔ پودے کیسے اُگتے ہیں۔ جاندار کیسے زندہ رہتے ہیں۔ کائنات میں بھی مختلف چیزیں ہیں۔ دن کے وقت آسمان نیلا کیوں ہو تا ہے اور شام کے وقت سُرخ کیوں؟ کہکشاں، سورج، ستارے اور چاند کیسے چمکتے ہیں؟ دنیا سورج کے گرد کیسے اور کیوں گھوم رہی ہے؟ زمین پر واپس آ جاؤ اپنے ارد گرد ہی دیکھو۔ لوگ بات کیسے کرتے ہیں؟ ہم کیا محسوس کرتے ہیں کیا سوچتے ہیں اور کیوں؟انسانوں میں باہمی تعلق اور رشتے بھی چیزیں ہیں۔۔۔‘‘
’’لیکن باؔجی! اسکول تو میَں جاتا ہوں عِلم حاصل کرنے۔ کیا وہ کافی نہیں؟‘‘ میَں نے اپنی طرف سے بڑی منطق لگائی۔
باؔجی مسکرائے’’ تُم نے اچھا کیا ، کافی کا لفظ استعمال کیا۔ تھوڑا سا سوچو۔ بہت سارے لوگ صرف اتنا ہی کام کرتے ہیں جتنا وہ کافی سمجھتے ہیں۔ لیکن کافی کا مطلب بہترین نہیں ہوتا۔اسی طرح تین اور لفظ ہیں۔ کارکردگی، معمولی، غیر معمولی۔ ان میں فرق سیکھو۔ کارکردگی کسی کام کے نتیجہ کو کہتے ہیں۔ معمولی کا لفظ عام سے نکلا ہے جس کو انگریزی میں نارمل کہتے ہیں۔ نارمل کا مطلب ہے کہ معاشرے میں اکثر لوگ یہی کچھ کرتے ہیں لیکن ضروری نہیں کہ وہ صحیح بھی ہو۔ سائنس دانوں نے اندازہ لگایا ہے کہ اکثریت کی کارکردگی معمولی ہوتی ہے صرف چند لوگوں کی کارکردگی غیر معمولی ہو تی ہے۔ مثلاً امتحان میں پہلی، دوسری، تیسری پوزیشن لینے والوں کی کاردکرگی باقی کلاس کی نسبت غیر معمولی ہوتی ہے۔ یہ تو اسکول کالج کے حوالے کی بات ہے لیکن دُنیا میں یہ بھی ہوتا ہے کہ چند لوگ اعلیٰ تعلیم یافتہ نہ ہونے کے باوجود غیر معمولی کارکردگی دکھاتے ہیں۔ کیا یہ عجیب بات ہے کہ معمولی کارکردگی والی اکثریت اُن چند غیر معمولی کارکردگی والے لوگوں کے لئے کام کرتی ہے؟ تم خود سوچنا کہ کسی بھی کام میں تمہاری کارکردگی کیا ہونی چاہئے، معمولی یا غیر معمولی؟ پھر اندازہ لگانا کہ اس کے مطابق تمہاری محنت، عِلم اور آگہی بھی معمولی ہونی چاہئے یا غیر معمولی ‘‘۔
’’اگر میَں غیر معمولی کارکردگی دکھانا چاہوں تو پھر اسکول کے علاوہ میَں ٖ غیر معمولی عِلم کیسے حاصل کر سکتا ہوں؟‘‘، مجھے نسیم حجازی کی کتابوں کے پسندیدہ ہیرو اور ان کی غیر معمولی کارکردگی یاد آئی۔ابھی مجھے ادبی فِکشن کا عِلم نہیں تھا۔ میں جو بھی پڑھتا تھا اُسے سچ ہی سمجھتا تھا۔
رات گہری ہو رہی تھی۔ باؔجی ایک نو سال کے معمولی بچے کے غیر معمولی سوال کے غیر معمولی جواب کے لئے اپنے خیالات کو اکٹھا کرتے، مناسب معمولی الفاظ ڈھونڈتے شاید ہار مان کر بولے
’’میَں بہت تھک گیا ہوں۔ ابھی صرف اتنا کہوں گا، شاید سمجھ آ جائے جب تم بڑے ہو جاؤ گے۔کوئی بھی علم حاصل کرنے کے مختلف طریقوں کے خاص نام ہوتے ہیں۔جیسے بیرونی ماحول کو محسوس کرنے کے لیے ہمارے جسم میں حواسِ خمسہ ہیں، دیکھنے کی قوتِ بصیرت، سونگھنے کی قوتِ شامہ، چکھنے کی قوتِ ذائقہ، سُننے کی قوتِ سماعت، چھوُنے کی قوتِ لامسہ۔ اسی طرح لِکھی ہوئی بات پڑھنے کومطالعہ، اپنی آنکھوں دیکھی اور اپنے کانوں سے سُنی بات کو مشاہدہ ، ذاتی تجربہ اور کوشش کو مجاہدہ، اپنے خیالات اور اعمال کو جانچنا اوراُن پر عبور حاصل کرنے کی کوشش کرنے کو محاسبہ، دوسروں کے ساتھ تبادلۂ خیالات کو مکالمہ، ان سب سے حاصل شدہ علم کو اکٹھا کرنا، یاد رکھنا، سمجھنا اور اس پرغور کرنے کو مراقبہ کہتے ہیں۔ ان طریقوں سےباطنی آگہی اور خیال کی گہرائی بڑھتی ہے تو سوتے یا جاگتے انسان کے ذہن میں خودبخود غیر معمولی، نیا اور اچھوتا خیال، تصور، ایجاد، اور نئے معنی پیدا ہوتے ہیں ایسے تجربے کومکاشفہ یا وجدان کا نام بھی دیتے ہیں۔
لیکن تم جو کچھ بھی پڑھو،سیکھو، سوچو یا کرو، اس کو ناپنے تولنے جانچنے کا ایک ہی پیمانہ رکھو۔ کارکردگی والی بات یاد رکھو، صحیح علم کا ثبوت یہ ہوتا ہےکہ وہ کام کرتا ہے۔ معمولی عِلم کا نتیجہ معمولی ہو گا۔ بہترین عِلم کا نتیجہ بہترین ہو گا۔ لیکن معمولی سے بہترین تک کے سفر میں درپیش کئی ناکامیوں کا سامنا کرنا آسان نہیں۔اسکے لئے غیر معمولی کوشش کی عادت کی ضرورت ہوتی ہے۔ ایک مشہور مؤجد تھامس ایڈیسن سے کسی نے پوچھا کہ اسکے تجربات کے کیا نتائج نکلے۔ اُس نے جواب دیا ۔ ’’ نتائج؟مجھے بہت سے نتائج ملے۔ مجھے تو یہ معلوم ہے کہ میرے کئی ہزار تجربوں نے کام نہیں کیا ‘‘۔
باقی جو کچھ تم پڑھو یا سُنو، سب الفاظ کے کھیل ہوتے ہیں۔ایسے الفاظ پر اعتبار کرنے سے پہلےاپنے آپ سے یہ پُوچھ لینا، یہ جان لینا، کسِ نے لکھا ہے، کسِ نے کہا ہے اور کیوں؟ لیکن ہر وقت یہ یاد رکھو کہ تمہارا عِلم ناقص بھی ہو سکتا ہے اسطرح تکبّر سے بچنے کی کوشش کرو۔ تکبّر کئی قسم کا ہو سکتا ہے۔ عِلم کا تکبّر، نیکی کا تکبّر، دولت کا تکبّر، اچھی صحت کا تکبّر، ذات اور قوم کا تکبّر، اپنی ظاہری خوبصورتی کا تکبّر، معاشرے میں اونچی حیثیت کا تکبّر۔ اسکو سمجھنے کا طریقہ بہت آسان ہے۔ اگر تُم نے ان میں سے کسی ایک یا زیادہ باتوں کی وجہ سے کسی انسان کو حقیر سمجھا تو تم نے اپنے دل اور ذہن میں تکبّر کو جگہ دے دی۔ لوگوں کی عزت کرو، تم سے عُمر میں چھوٹا ہو یا بڑا، پڑھا لکھا ہو یا جاہل، دولت مند ہو یا غریب، اخلاق سے پیش آؤ گے تو لوگ بھی تمہاری عزت کریں گے۔۔ ۔ بس اب جاؤ اپنی چارپائی پر اور سو جاؤ۔ صبح فجر کے لئے بھی اٹھنا ہے۔‘‘
ایسے موٹے موٹے الفاظ تو میَں واقعی نہ سمجھا۔ باؔجی کے الفاظ کانوں سے دماغ میں داخل ہو گئے۔ میَں جا کر اپنی چارپائی پر سو گیا اورمیرے لاشعور میں کھچڑی پکنی شروع ہو گئی۔
اگلے دِن اسکول سے گھر آنے کے بعد امّی جان کی حسبِ معمول بار بار تاکید کے باوجود اسکول کا دیا ہوا ہوم ورک کرنے کی بجائے میَں صحن میں اکڑوں بیٹھا، کمہار کے چاک پر بنا مَٹّی کا لٹّو ہتھیلی پر گھما کر، کنکریٹ پر گھِسا کر، پھر ہتھیلی پر گھما کر آنکھوں کے سامنے لا کراسکا وھیل بیلنس چیک کر رہا تھا۔ میری بڑی ہمشیرہ آپا گُلو نے ایم ایس سی کیمسٹری کرنے کے بعد کالج میں پڑھانا شروع کیا تھا۔ ہمارے گھر کی کفالت کرنے اور اپنے سے چھوٹے دو بہنوں اور دو بھائیوں کی مناسب تعلیم و تربیت کے بارے میں متواتر فکر مند رہنے کی وجہ سے ہمیں ڈانٹ ڈپٹ کرتی رہتی تھیں۔ اُنہوں نے میری ظاہری نافرمانی لیکن غو رو خوض میں مرتکز توجہ دیکھی تو ذرا صبر کر کے مجھ سے پوچھا، ’’یہ تم کیا کر رہے ہو؟‘‘
میَں نے اپنی آگہی کی وضاحت کرنے کی کوشش کی ’’ باہر گلیوں میں پانی کے پائپ بچھا دینے کے بعد خندقیں مَٹی سے بھر دی گئی ہیں لیکن ابھی سڑک کو پکا کرنے کے لئے اسٹیم رولر سے بجری اور تارکول نہیں بچھائی گئی۔ اس کچی زمین پر ہم بچے لٹو گھمانے کے مقابلے کرتے ہیں۔ جو لٹو زیادہ دیر گھومے وہ جیت جاتا ہے۔ بھاری لٹّو لمبا عرصہ گھومتا ہے۔خراد مشین پر بنا لکڑی کا لٹّو صحیح گھومتا ہے لیکن مہنگا اور ہلکا ہوتا ہے۔ کمہار کے ہاتھوں سے چاک پر بنا اندر سے کھوکھلا مَٹی کا لٹّو بھاری تو ہوتا ہے مگر چاروں طرف سے ایک جیسا نہیں بنا ہوتا، کہیں موٹا کہیں پتلا۔ میَں نئےلٹو کے گرد رسی لپیٹ کر،لٹو کو کچی زمین پر پھینک کر، رسی کھینچ کر جب گھماتا ہوں تو لمبے عرصے تک گھومنے کی بجائے لٹو ڈگمگا کر جلد ہی گر جاتا ہے اور ہار جاتا ہے۔ اسکو ٹھیک کرنے کے واسطے میں ہتھیلی پر گھما کر اسکا ڈگمگانا غور سے دیکھتا ہوں۔ جدھر موٹائی زیادہ ہوتی ہے اسکو کم کرنے کے لئے لٹّو کو کنکریٹ پر رگڑتا ہوں ساتھ ساتھ گھما کر اسکا توازن چیک کرتا جاتا ہوں۔ بعض دفعہ جدھر وزن کم ہوتاہے اُدھر لفافے پر مہر لگانے والی سُرخ لاکھ کو پگھلا کر جماتا ہوں پھر ضرورت ہو تو اسکو بھی رگڑتا ہوں‘‘۔
اُس وقت آپا گُلو کو میَں نےیہ یاد کرانا نہ چاہا کہ ابھی چند دِن پہلے گھر میں جوایک آتشزدگی کی واردات ہوئی تھی اُس میں میرےلَٹُو کا کیا قصور تھا۔ گلی میں کُھلنے والی ہماری بیٹھک اور سونے والے بڑے کمرے کے درمیان کھانے کا لمبا کمرہ تھا جس کی لمبائی کے رُخ آمنے سامنے دیواروں میں شیشے کے دروازوں والی الماریاں تھیں۔ اِن الماریوں کو بآجی کی لائبریری اور باقی کمرے کواسٹور کی طرح استعمال کیا جاتا تھا۔ کمرے کی دیواروں کے ساتھ چاروں طرف فرش پر اور بیٹھک کا دروازہ بند کرکے اُس پرموٹا بھاری پردہ ڈال کر پردے کے آگے بھی دو آہنی ٹرنک اوپر نیچے کر کےرکھے ہوئے تھے۔ میَں کمہار سے خرید کر مَٹی کانیا لڑکھڑاتا ڈگمگاتا (unbalanced) لَٹُّو لے کرآیا۔ لَٹو کی وھیل بیلنسنگ کی دُھن میں باورچی خانے سے ماچس کی ڈِبیا کھسکائی، جیب سے سُرخ لاکھ موم کی بتی نکالی اور کھانے والے کمرے میں فرش پر اکڑوں بیٹھ کر یکے بعد دیگرے ماچس کی تِیلی جلا جلاکر لاکھ کو پگھلا کر حسبِ ضرورت لَٹو پر لگاتا گیا، فرش پر رگڑتاگِھساتا گیا اور کبھی ہتھیلی کبھی فرش پر گھماتا لَٹُّو کا وھیل بیلنس چیک کرتا گیا۔