ہمیشہ آتے رہنا تم
مِرے پہلو میں بیٹھے
بند شیشوں سے پرے
سردی کی بارش دیکھتے رہتے ہوخوش ہو کر
بہت یخ بستہ شاموں میں
مرا تم ہاتھ تھامے
دھند کے رومانس میں گم راستے پر
دور تک چلتے ہی جاتے ہو
اوڑھاکے شال ،شانوں سے پکڑ کے
آتش دان کے آگے بٹھاتے ہو
کبھی تم فیضؔ کی نظمیں،کبھی جگجیتؔ کی غزلیں سناتے ہو
جو مجھ کو بھول بیٹھا ہے
حقیقت میں اسی جیسے سبھی انداز رکھتے ہو
مجھے اپنے سے لگتے ہو
دسمبر پھر بھی آنا تم
وہ آئے یا نہ آئے،پر
ہمیشہ آتے رہنا تم!
۔۔۔۔۔۔۔۔۔۔۔۔۔۔۔۔۔۔۔۔
۲۰۱۴ء کے آخری دنوں میں لکھی گئی چند اور نظمیں
ایک فیصلہ
بادل ،بارش،تیز ہوائیں
خوشبو،موسم،شام ،ستارے
سب سے میں نے
تیری کتنی باتیں کی ہیں
کتنے ہی سندیسے بھیجے تیرے نام
ان گزرے سالوں میں
اور جواب میں خاموشی ہے
خاموشی کے معنی خود سے اخذ کروں تو
دل افسردہ ہو جاتا ہے
بادل،بارش،تیز ہوا سے
اب نہ تیری بات کروں گی
نہ کوئی سندیسہ دوں گی
آخر میں نے سوچ لیا ہے!
۔۔۔۔۔۔۔۔۔۔۔۔۔۔۔۔۔۔۔۔۔
ایک مشکل
میں اب بونس پہ زندہ ہوں
تو کیوں نہ وائنڈ اپ کرلوں
ضروری کام سب اپنے
وصیت سب سے پہلے لکھ کے رکھتی ہوں
اُسی لاکر میں
جس میں میرے زیور ہیں
ڈریسز،شوز،شولڈر بیگ،میچنگ پرس،
ساری کاسمیٹکس
میں اپنے ہاتھ سے تقسیم کرتی ہوں!
سٹوڈنٹ لائف کی
اور ابتدائے جاب کی فوٹو سبھی
اچھی ،بُری یادیں
ابھی ڈسکارڈ کرتی ہوں
ادب کی سب کتابوں کو
(مری ساتھی کتابوں کو)
میں ڈیڈیکیٹ کرتی ہوں
ایک پبلک لائبریری کو
اثاثہ تو ابھی کچھ اوربھی محفوظ رکھا ہے
بہت سی قیمتی چیزیں
جو تم نے تحفتاً دی تھیں
بہت ہی خوبصورت
کانچ کا نازک سا ماڈل
آگرہ کے قصرِ مرمر کا
کئی وش کارڈ،لیٹرز،
ڈائری ہر سالِ نَو کی
کتابیں شاعری کی
اور افسانوں کے مجموعے
کئی کیسٹس گیتوں اور غزلوں کے
مِری تصویریں جو تم نے بنائی تھیں
یہ سب کچھ اب جلا دوں گی
تمہارے ساتھ جو گزرے
وہ لمحے سب بھلا دوں گی
مگر اک مرحلہ درپیش ہے پھر بھی
تمہارا لمس جو اس جان و دل پر
آج بھی ایگزسٹ کرتا ہے
اُسے کیسے کروں ڈسپوز آف۔۔۔!.
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کیوں بضد ہو!
کیوں بضد ہو
تمہاری نظر سے
میں منظر کو دیکھوں
ضروری نہیں
جس کو تم نے ہرا کہہ دیا
میں بھی اس کو ہرا ہی کہوں
میری آنکھیں ہیں نعمت مجھے
کیوں میں
کفرانِ نعمت کروں!
۔۔۔۔۔۔۔۔۔۔۔۔۔۔۔۔۔۔۔۔۔۔۔
نا انصافی
میں نصف اپناکب کا
اسے دے چکی ہوں
میرے پاس ہے نصف باقی مرا
جسے اپنی مرضی سے جینے کا حق ہے مجھے
مگر بات یہ بھی نہیں مانتاوہ
۔۔۔۔۔۔۔۔۔۔۔۔۔۔۔۔۔۔۔۔۔۔
بساط
وزیر،بادشاہ،پیادہ ،فیل،میں
کوئی بھی مہرہ نہیں
نہ جیتنے کی آس ہوں
میں صرف اک بساط ہوں
اور وہ ماہر کھلاڑی
چاہے جب
بازی سجے
میری بساطِ ذات پر
۔۔۔۔۔۔۔۔۔۔۔۔۔۔۔۔۔۔۔۔
مجھے معلوم تھا
وہی جذبہ محبت کا
وہ سارے لفظ
وہ قسمیں،وہ وعدے
سب پرانے تھے
مگر لہجہ نیا تھا
ایک جادو تھا
میرے سر چڑھ کے جو بولا
۔۔۔۔۔۔۔۔۔۔۔۔۔۔۔۔۔۔۔۔۔
رات پھر
رات پھر
دبے پاؤںآکر
میرے بستر میں سو گئی ہے
اور میں تنہا بیٹھی جاگ رہی ہوں
سوچ رہی ہوں
آج کی شب میں
ساتھ تمہارے گزرے دنوں کو یاد کروں
یا صرف تمہیں۔۔۔۔۔۔۔؟.
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
