پنجاب کی سرزمین ضلع چنیوٹ کے قصبہ رجوعہ سادات میں غلام سرور صاحب کے گھر جنم لینے والے حیدر عباس کو بچپن سے ہی شاعری کا شوق تھا اور گویا یہ شوق ان کو اپنی والدہ محترمہ سے ورثے میں ملا ۔ ان کا کہنا ہے کہ میری والدہ محترمہ کو سید محسن نقوی صاحب کی شاعری بہت پسند تھی وہ جب بھی گھر کے کام کاج میں مصروف ہوتیں تو محسن نقوی کے اشعار پڑھتی جاتیں اور مجھے وہیں سے شاعری کا شوق پیدا ہوا ۔ حیدر صاحب کا کہنا ہے کہ میرے شاعری کے شوق کا یہ عالم تھا کہ میں جب بھی نئی کلاس میں داخل ہوتا تو پہلی ہی فرصت میں اردو کی کتاب میں سے نظم اور گیت یا غزل وغیرہ پڑھ کر زبانی یاد کر لیتا ۔
حیدر عباس نے بتایا کہ میں نے اپنی والدہ محترمہ سے اپنے لیئے شاعر بننے کی دعا کی درخواست کی تھی ۔ شاید میں والدہ محترمہ کی دعا کے طفیل شاعر بن گیا ۔ حیدر عباس صاحب نے ایم بی اے فنانس میں کیا انہوں نے شاعری میں پروفیسر شجاعت رجوی کی شاگردی اختیار کی اور تخلص عباس اختیار کیا ۔ انہوں نے 2007 میں 17 سال کی عمر میں شاعری شروع کی حمد، نعت ،سلام ، منقبت ، نوحہ ،غزل اور نظم کی صنف میں طبع آزمائی کی ہے ۔ انہوں نے اپنی تعارفی گفتگو میں کہا کہ دہشتگردی اور خوف کی فضاء سے پاک، پرامن ماحول کے لئے شاعری اور شعور ایک دوسرے کیلئے لازم اور ملزوم ہیں ۔ اس سلسلے میں شاعر بھرپور کردار ادا کر سکتے ہیں ۔ حیدر عباس کی 2 کتابیں اشاعت کے مرحلے میں ہیں ۔ جن میں " دشت احساس " شعری مجموعہ ہے جبکہ مذبہی عقائد پر مبنی ایک کتاب " تقدیس قلم " ہے۔ حیدر عباس صاحب کی شاعری سے ایک نمونہ کلام آور چند منتخب اشعار آپ کی بصارتوں کی نذر
خزاں کے دور میں کر اعتبار لفظوں کا
بھرم رکھے گی کسی دن بہار لفظوں کا
زباں کا حسن قلم کا کمال بکنے لگا
چمک رہا ہے بہت کاروبار لفظوں کا
مرے یقین کے اوراق بے نشاں نہ رہیں
کچھ اس طرح سے ذخیرہ اتار لفظوں کا
سماعتوں میں سلگتا ہے کس لیے بارود
اگا ہوا ہے سبھی انتشار لفظوں کا
بدن کے واسطے کافی ہے ضربت۔شمشیر
برائے روح ضروری ہے وار لفظوں کا
لکھوں گا ایک صحیفہ تری وفاؤں پر
کبھی ملا جو مجھے اختیار لفظوں کا
فضا میں پھیلتا جاتا ہے جبر۔خاموشی
کرے گا کون بھلا اب شمار لفظوں کا
میں ایک روز بتاؤں گا دل کی بات اسے
زباں سے بوجھ اتاروں گا چار لفظوں کا
پھٹا ہوا ہے گریبان۔آبرو عباس !
نجانے کون ہوا ہے شکار لفظوں کا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میرے سچ کو بھی یہاں جھوٹ بنا ڈالیں گے
وہ اگر جھوٹ بھی بولے گا تو سچ نکلے گا
کثرت زر سے مزیں ہیں عدالت کے کواڑ
مجھ کو معلوم ہے قاتل مرا بچ نکلے گا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بس شام تک سہوں گا عذاب برہنگی
پھر جسم ڈھانپ لوں گا اندھیرے کے شال سے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آگ، پانی اور ہوا نے خاک تک پہنچا دیا
دیکھیئے تو ارتقائی مرحلے انسان کے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قہقہے تیز ہواؤں کے سنائی دیں گے
اڑتے اڑتے جو پرندے کبھی تھک جائیں گے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مجھے امن موسم عزیز ہیں مرا ظلم سے نہیں واسطہ
میں حسینیت کا پیام ہوں مجھے کربلا میں تلاش کر
حیدر عباس
