اوہ نوکر ای بندا سی۔انٹری دیندیاں ہی فرنیچر تے کپڑا مار صافے وانگ موہڈے تے رکھ اوہنے پہلی جُگت اپنی ماڑی صحت نوں ہی مارنی تے نال کہنا، مینوں ویکھ سوہنیاں کُڑیاں ہوکے بھردیاں نیں
ہائے نی، مر جائیے، اے ہجے جیوندا اے!
تے ساڈے دل وچوں دعا نکلنی
ویڈیو لنک
کہ شوکی خان رب تینوں جیوندا ای رکھے، خوش پیا وسیں تے ہاسے کھلاریں
شوکی خان نے تھیٹر دے بڑے نامی گرامی فنکاراں دے درمیان کم کرے اپنی وکھری شناخت بنائی۔ ببوبرال تے شیبا حسن دے نال اوہدی جوڑی واہوا پھبّی۔ تےکیتی اوہدے نال البیلے نے وی گھٹ نئیں
بڑا تیرا برفانی گھیس ورگا منہ اے
ویڈیو لنک
آہو جی ہیگی میں برفانی گھیس آں، انج میری کوئی کھُڈ بند کرگیا اے
تے پت جیہدی کُھڈ بند ہوئی ہووے او اینا آکڑ کے تے نئیں تُردا
سٹیج ڈرامیاں وچوں چونویاں قوالیاں جیہڑیاں مینوں پسند نیں اونہاں وچوں ہر کسے وچ شوکی خان ضرور اے۔ سونے دی چڑیا دی بُلھے لُٹ لوو ہووے
یا فیر ’راجا تُو اب تو آجا‘ وچ سُریلے سنگتاں نال میڈم دا گانا سانوں نہر والے پُل تے بُلا کے، شوکی خان نے اپنے وکھرے انداز دا رنگ جمایا
ویڈیو لنک
ایک ڈرامے وچ ببو برال دے نال شوکی خان دی قوالی دا سیکوئنس ہٹ ہوگیا تے اوہنوں کئی ڈرامیاں وچ پرفارم کیتا۔ اوہ ببو برال دے جان جان دے دن سی
ضلع ہجر نگر، تحصیل جفا اتے ڈاکخانہ رسوائی دا عاشق بیٹھا سی تے اوہنے درداں دی محفل لائی سی
ویڈیو لنک
فیر شوکی خان اک دن اچانک ٹُرگیا۔ لاہوروں ایک ڈرامے واسطے اپنے سنگیاں دے نال قصور جاندیاں للیانی دے لاگے اک روڈ ایکسیڈنٹ وچ غیاث الدین عرف شوکی رب نوں پیارا ہوگیا
کئی ورہیاں پہلے غیاث الدین جد ساڈے لوک گائک شوکت علی کول شاگرد ہویا تے استاد ہوراں نے اوہدا ناں شوکی خان رکھیا سی
ساندہ دے ہمسائے گلشنِ راوی دے قبرستان وچ اک کچی مٹی دے لیپ والی قبر ساڈے غیاث الدین عرف شوکی خان دی اے۔ اسیں اوس دیہاڑے دُعا کرن آئے تے کجھ پُھلاں دیاں پتیاں کھلار گئے۔
کتبے اتے تاریخِ وفات 22 فروری 2003 بروز ہفتہ دے اُتے اوہی سطراں درج نیں جیہڑیاں شوکی خان ببو برال دے نال
قوالی وچ گاؤندا ہوندا سی
مٹی تیری زندگی بندیا، مٹی موت دا گہنا
مٹی توں انمول ہیں بھانویں، مٹی مول نئیں پینا
آخر مٹی او مٹی ہوکے مٹی دے وچ رہنا
ویڈیو لنک
نوکر بنیا جد او صافہ جھاڑ کے موہڈے تے پا ٹھوڈی اتے دو انگلاں رکھ کے کہندا سی ’ہائے نی مرجائیے اجے جیوندا اے!‘ تے اسیں دُعا دیندے سی کہ شوکی خان رب تینوں جیوندا وسدا رکھے
پر سوہنیو لوکو ٹیم آن تے ایس سراں توں سارے ٹُرجاندے نیں
آخر مٹی او مٹی ہوکے مٹی دے وچ رہنا
