بھارت کی معروف شاعرہ محترمہ گوہر سیما صاحبہ کی شاعری کا محور اور مقصد امن و انسانیت سے محبت اور ایسے پر امن انقلاب کی خواہش ہے جس میں ان کا وطن ہندوستان اور کشمیر سمیت دنیا بھر میں امن و امان قائم ہو سکے ،کشمیر میں جس طرح انسانیت سسک رہی ہے جہاں مصائب اور مشکلات ہیں وہاں امن و امان کی بحالی اور انسانیت کا تحفظ ان کی اولین خواہش اور دنیا کی سچائیوں کو روشناس کرانا اور خواتین کے حقوق کے لیئے آواز بلند کرنا ہے ۔ ان کی شاعری ہجر و فراق اور وصال کی روایتی شاعری سے ہٹ کر ایک بامقصد اور فلاح انسانیت کے لئے ہے ۔ وہ والدین کی قدر و قیمت کا بھی بھرپور احساس اور ادراک رکھتی ہیں اور ماں کی ہستی کی عظمت کی دل کی گہرائیوں سے قائل ہیں اس لیئے وہ ماں کی عزت اور احترام کے حوالے سے دل کھول کر اپنے جذبات اور دلی کیفیت کا اظہار کرتی ہیں ۔ وہ خواتین کے جائز مقام اور عزت و احترام کے لیئے بھی اپنی توانائیاں وقف کرنا چاہتی ہیں ۔ ان کی شاعری اول تا آخر امن، انسانیت اور کشمیر سمیت دنیا بھر کے انسانوں کی فلاح و بہبود اور امن وامان کی خواہش اور آرزو پر مبنی ہے ۔ تاہم ان کی شاعری میں کہیں کہیں رومانس بھی ہے جس میں چاہت کے دیپ بھی جلتے رہتے ہیں ۔
گوہر سیما صاحبہ 14 مارچ 1968 کو بھارت کے شہر رام پور میں پیدا ہوئیں ان کے والد صاحب کا نام سید گوہر علی اور والدہ محترمہ کا نام سیدہ انیسہ صاحبہ ہیں ۔ ان کا اصل نام سیما گوہر ہے جبکہ ان کا تخلص اور قلمی نام گوہر ہے ۔ وہ 4 بہنیں اور ان کے 2 بھائی ہیں اور سب کے سب کو ادب سے دلی لگاو ہے ۔ ادبی ماحول ان کو ورثے میں ملا ہے ۔ ان کے والدین کو شعر و شاعری سے گہری دلچسپی تھی اس لیے وہ اپنے گھر میں ادبی نشستوں کا انعقاد بھی کرتے رہتےتھے ۔ ان کے والد صاحب نے گھر میں بہت سی علمی اور ادبی کتابیں جمع کر رکھی تھیں ۔ چناں چہ وہ اپنے گھر کے ادبی ماحول سے متاثر ہوئے بغیر نہ رہ سکیں ۔ انہوں نے ایم اے انگلش اور بی ٹی سی کی ڈگریاں حاصل کر رکھی ہیں اور درس و تدریس سے وابستہ ہو کر ٹیچر کی حیثیت سے اپنے فرائض سرانجام دے رہی ہیں ۔ انہوں نے 15 سال کی عمر میں پہلا شعر اور پہلی آزاد نظم لکھ کر شاعری کا آغاز کر دیا ۔
شاعری کے حوالے سے ان کا کہنا ہے کہ انہوں نے فیس بک پر شاعری کے ایک پیج کو جوائن کیا جس کی سربراہی اور سرپرستی اسد نظامی صاحب کر رہے تھے ۔ گوہر صاحبہ نے کہا کہ بعض اوقات میرے دل میں عجیب قسم کی بے چینی محسوس ہوا کرتی تھی اور اسی کیفیت کے دوران اشعار کی صورت میں الفاظ کا ذخیرہ جمع ہو جاتا تھا جس سے میں نے محسوس کیا کہ میرے باطن میں ایک شاعر موجود ہے جو مجھے شاعری کے اظہار کے لئے اکسا رہا ہے وہیں سے میں نے شاعری کی ابتدا کر دی ۔
گوہر سیما صاحبہ کی شادی 1989میں ذاکر علی خان سے ہوئی جو والدین کی مرضی کے مطابق تھی ۔ ذاکر صاحب پیشے کے لحاظ سے سول انجنیئر ہیں ۔ ماشااللہ ازدواجی زندگی خوشگوار گزر رہی ہے مگر دونوں کے شوق الگ ہیں اہلیہ شاعرہ ہیں تو خاوند گائیکی اور موسیقی کا ذوق رکھنے والے ۔ ماشااللہ وہ 2 بچوں کی ماں ہیں ۔ ایک بیٹا یوسف علی خان ہے جس نے جو علی گڑھ میں الیکٹرک انجنیئرنگ کے دوسرے سال میں ہے جبکہ بیٹی ہدی خان Huda Khan نے 12Thکیا ہے اور اب وہ بھی علی گڑھ میں فائن آرٹس کے شعبے میں داخلہ لینے کا ارداہ رکھتی ہے وہ ایک بہترین آرٹسٹ اور کیلیگرافی کی ماہر ہے اس کے والد صاحب بھی ایک بہترین آرٹسٹ تھے اور وہ قومی سطح کے ایوارڈ یافتہ تھے ۔
گوہر صاحبہ کی شاعری کے اب تک 2 مجموعے شایع ہو چکے ہیں جن میں پہلا مجموعہ گوہر نایاب 2016 میں جبکہ دوسرا مجموعہ قطرہ قطرہ زندگی 2019 میں شایع ہوا جس کی رسم اجراء کا خصوصی اہتمام ان کے بھائی محمود علی جوہر صاحب نے کیا ان کی شاعری کا تیسرا مجموعہ بھی تیار ہو چکا ہے جس کی اشاعت بھی جلد متوقع ہے ۔ اردو زبان و ادب کے حوالے سے ان کا کہنا ہے کہ ہندوستان میں اردو کو پسند کیا جاتا ہے اور اس کا مستقبل روشن ہے ۔ انہوں نے اس کی وجہ یہ بتائی کہ انڈیا کی نئی نسل غزل اور موسیقی کی شوقین ہے اس لیئے ان کا یہ ذوق اور شوق اردو کے بغیر پورا ہونا ممکن نہیں ہے ۔ آخر میں گوہر سیما صاحبہ کی شاعری سے کچھ نمونہ کلام اور چند منتخب اشعار آپ کی سماعتوں کی نذر
کشمیر کے حوالے سے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لٹ رہی ہے بہار کون سنے
خشک ہیں آبشار کون سنے
گل و بلبل بھی اب پریشاں ہیں
انکی لیل و نہار کون سنے
روٹھی روٹھی ہے وادیوں کی فضا
درد ہیں بیشمار کون سنے
وحشتیں ہر نفس ہوئیں برپا
دل ہوا زار زار کون سنے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عنوان کشمیر
وحشتوں کا آج پھر چرچا رہا
آج پھر یہ دل میرا ٹھہرا رہا
وادیوں میں زندگی مرتی رہی
درد آنکھوں سے میری بہتا رہا
زندگی اپنا سفر کرتی رہی
ہر نفس ایک خوف سا برپا رہا
گل و بلبل کھو گئے اس دھندھ میں
کرب سے آلود ہر چہرہ رہا
مسئلے شمع بجھا کر تھک گئے
شوق کا سورج مگر جلتا رہا
پتھروں کے وار وہ سہتے گئے
آئینوں کے ساتھ یہ قصّہ رہا
زخم دے کر تھک گی یہ زندگی
خواب آنکھوں میں مگر پلتا رہا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
زندگی تیرے یہ آزار کہاں تک دیکھوں
کرب ہی کرب کا انبار کہاں تک دیکھوں
اپنی ہی دھن میں یہ گم انساں کا
روز گرتا ہوا معیار کہاں تک دیکھوں
سرخ آنکھوں کی چبھن اپنی چھپائوں کب تک
خون آلود یہ اخبار کہاں تک دیکھوں
نفرتیں تو ختم کر دے میرے مولا اب تو
ہر نفس شعلے و انگار کہاں تک دیکھوں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بہت اندھیرا ہے اب آفتاب آئے گا
ضرور اب کوئی انقلاب آئے گا
سمجھتا نہیں انسان یہ حقیقت ہے
گناہ جب بھی بڑھے گا عتاب آئے گا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رشتے، خلوص ،پیار محبت فریب ہے
چہرے پہ جو سجی ہے شرافت فریب ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاس ہے پھر بھی دور لگتا ہے
آسمان وہ میرے خوابوں کا لگتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سحر کا روشن ستارہ بھیج دے
کوئی خوش کن سا نظارہ بھیج دے
جس سے روشن ہو یہ ساری کائنات
امن کا ایسا شرارہ بھیج دے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اب حقیقت درد دیتی ہے بہت
خواب آنکھوں میں سنہرا بھیج دے
گوہر سیما رام پور انڈدیا
