کورونا وا‏ئرس کے خلاف جنگ کا طاقتور اسلحہ جراثیم کش اجزاء

دوستو، وائرس کے خلاف جنگ میں "مستند معلومات" سب سے موثر ہتھیار ثابت ہو سکتی ہیں۔
اس جنگ میں ہمارے پاس نہ تو ویکسین ہے اور نہ ہی کوئی دوا۔
۔۔۔لیکن پھر بھی ہم بالکل نہتے نہیں ہیں۔ ہمارے پاس دو ہتھیار ایسے ہیں جو انتہائی طاقتور بھی ہیں اور موثر بھی۔
ان میں سے پہلا ہتھیار، "سماجی فاصلہ" ہے۔ جو ہم سب قائم رکھ رہے ہیں۔
اور دوسرا ہتھیار "جراثیم کش اجزاء" کا درست استعمال ہے، اور بدقسمتی سے بہت سے افراد اس ہتھیار کے درست اور بروقت استعمال سے کم ہی واقف ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اس مضمون میں ہم جراثیم کش اجزاء کے بارے میں وہ سب کچھ جانیں گے جو جاننا ضروری ہیں۔
(میری گزارش ہے کہ اس آرٹیکل کا مکمل اور بغور مطالعہ کریں اور معلومات کے اسلحے سے لیس ہو جائیں)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جراثیم کش اجزاء
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایسے اجزاء جو جرثوموں کو ہلاک یا غیر فعال بنا دیتے ہیں، جراثیم کش کہلاتے ہیں۔ ان کی دو بنیادی اقسام ہیں۔
1۔ اینٹی سیپٹک Antiseptic
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ تمام اجزاء جو جراثیموں کے خاتمے کے لئے جاندار ٹشوز پر استعمال ہوتے ہیں، اینٹی سیپٹک کہلاتے ہیں۔ عام دستیاب ہونے والے اینٹی سیپٹک یہ ہیں:
صابن اور ڈٹرجنٹ
سینیٹائزرز
ٹنکچر آئیوڈین
پائیو ڈین
سپرٹ
ڈیٹول
2۔ ڈس انفیکٹینٹ Disinfectants
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وہ تمام اجزاء جو غیر جاندار اشیاء مثلاً آلاتِ جراحی، دستانوں اور ماسک وغیرہ کو جراثیموں سے پاک کرنے کے لئے استعمال ہوتے ہیں، ڈس انفیکٹینٹ کہلاتے ہیں۔
تیزاب، فینائل، سوڈا بلیچ، کلورین، فینول وغیرہ عام ڈس انفیکٹینٹ ہیں۔ ان کا استعمال انسانی جلد وغیرہ پہ نہیں کیا جا سکتا۔
روز مرہ امور اور انفرادی و گھریلو سطح پہ اینٹی سیپٹک کا کردار زیادہ اہم ہے کیونکہ سب سے زیادہ ضروری ہاتھوں کو محفوظ رکھنا ہے۔
کورونا وائرس کھانسی سے تو پھیلتا ہی ہے مگر سب سے زیادہ خطرہ مریض کے ہاتھوں اور ان تمام اشیاء سے ہوتا ہے جسے مریض نے چھوا ہوتا ہے، چاہے وہ دروازے کا ہینڈل ہو، کرنسی نوٹ ہوں یا شاپنگ بیگز۔ اس لئے ہاتھوں پر اینٹی سیپٹک کا استعمال کورونا سے بچنے کی ضمانت ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اینٹی سیپٹک کیسے کام کرتا ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مختلف اقسام کے انٹی سیپٹک اجزاء تین میں سے کسی ایک یا سب طریقے سے کام کرتے ہیں۔
1۔ پروٹوپلازم کی آکسیڈیشن:
Oxidation of Protoplasm
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آکسیڈیشن ایک ایسا طریقہ ہے جس میں مالیکیولوں سے الیکٹرانوں کا اخراج ہوتا ہے اور ان کی ساخت ٹوٹ پھوٹ جاتی ہے۔ عموماً یہ طریقہ بیکٹیریا یا فنجائی کے لئے موثر ہوتا ہے۔
2۔ پروٹین کی ڈی نیچوریشن
Denaturation of protein
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ عمل بہت موثر ہے اور بیکٹیریا کے ساتھ ساتھ وائرس کا بھی قلع قمع کر دیتا ہے۔
3۔ میمبرین کی توڑ پھوڑ
Destruction of Membrane
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بیکٹیریا میں تو پلازمہ میمبرین ہوتی ہی ہے مگر کورونا سمیت بہت سے وائرسز میں بھی بیرونی میمبرین پائی جاتی ہے۔ کئی اینٹی سیپٹک اس میمبرین کو تباہ کر دیتے ہیں یا اس کی نفوذ پذیری (permeability) میں اضافہ کر دیتے ہیں۔
۔۔۔۔۔۔۔۔۔۔۔۔۔۔۔۔۔۔۔۔