سرکس اور جھوٹے پھول

سرکس اور جھوٹے پھول

سرکس میں کرتب دکھانے والی لڑکی

آج پھر کھڑکی میں دکھائی دی

اس سفاک لڑکی کو

میں نے کہاں دیکھا؟

شاید خواب میں

مگر میں خواب نہیں دیکھتا

مگر مجھے یاد آیا

ایسی ہی لڑکی

میرا دوست

اکثر خواب میں دیکھتا ہے

لڑکی رات بھر اپنے کمرے میں

سگریٹ پیتی ہے

میرا دوست

اس سے کچھ کہنا چاہتا ہے

وہ لڑکی کو جھوٹے پُھول دیتا ہے

وہ ان پُھولوں کو چُھو کر

گلابوں کی تعریف کرتی ہے

چرچ سے

کارول کی آواز آتی ہے

میرا دوست اسے گیت بنا کر

لڑکی کو پیش کرتا ہے

وہ اسے پَرس میں بند کر لیتی ہے

مگر میں نے

اس لڑکی کو کہاں دیکھا؟

میرے ہاتھ میں

عِلم الجُرمیات کا ایک مقالہ ہے

جس میں

عورتوں کے جرائم کے اسباب درج ہیں

یہ ویسی ہی کہانی ہے

جو میرا دوست

اکثر خواب میں دیکھتا ہے

یہ نظم فیس بُک کے اس پیج سے لی گئی ہے۔