چاچا دارا

پچھلے مہِینے مر گیا ساڈے پنڈ دا چاچا دارا

سِدا سادہ پولا پالا بندہ نیکوکارہ

35 سال گزارے اونے کرکے چوکیدارا

نہ کوئی اگے نہ کوئی پچھے بندہ کلم کارا

مرن توں پہلاں سارے پنڈ نوں اوسنے کول بلایا

نال خلوصِ نیت اونے دل دا حال سنایا

میرے بعدوں پایو مینوں ڈھیر ثواب پہچانا

میرےایس مکان نوں ٹاہ کے مسجد تسی بنانا

اوہدے بعدوں لوکاں رل کے اوس مکان نوں ٹایا

ایس تھاں تے ہون مسجد بن سی چٹ علان کرایا

دس دنیا تے ستر آخرت دے کیتی خوب منادی

چندا دیون خاطر اتھے پہنچی کل آبادی

اپنی مدد آپ تو لوکاں کیتی چھتی آپ اراضی

ویکھا ویکھی اتھے آون لگ پئے چار نمازی

ویکھ آبا د مسیت نوں اوتھے کئیاں ٹانگ اڑائی

شعیہ، سنّی، دیوبندی، تے وہابی کرن لڑائی

مرنے والاختم درود تے پیراں نوں سی مندا

سنّی آکھن سنّی سی او حق آ ساڈا بندا

سینے تے ہتھ بندا سی او گِٹےوی سن ننگے

وہابی آکھن وہابی سی او کوئی نہ ایتھے کھنگے

مومن سی او پر کردا سی ماتم کدی کدارے

شیعے آکھن شیعہ سی او نکلو ایتھوں سارے

مرن والا رائےونڈ دے وچ جاندا سی ہر واری

دیوبندی دے ناطے بندی ساڈی ذمےواری

ایسے تُو، تُو ،میں، میں دے وچ وچے رہ گیاں بانگاں

ایس عوامی دنگل دے وچ کُھلیاں چلیاں ڈانگاں

چھ ست پھٹن، اک دو مودے ،دو تین ہوگئے کانے

زخمی پہنچے ہسپتال تے باقی پہنچے تھانے

تھانے چلن کیس، تے ہسپتال ڈرپاں ٹیکے

اتے چاچا دارا پھباں بار ثواب اڈیکے

فرقہ بندی کِتی یارو جندڑی ساڈی اوکھی

رہ گئی وچ مسیت تے اوتھے بن گئی پولیس دی چوکی….