وائرس کیا ہیں

وائرس کا سائز
وائرس کتنا چھوٹا ہوتا ہے؟ اگر کہا جائے کہ یہ اتنا چھوٹا ہوتا ہے کہ ہم اسے دیکھ نہیں سکتے تو یہی بات بیکٹیریا کے لئے بھی کہی جا سکتی ہے۔ جبکہ بیکٹیریا تو وائرس سے کئی گنا بڑا ہوتا ہے پھر بھی نظر نہیں آتا۔
بہتر یہی ہے کہ اس کی پیمائشی یونٹ کا تعین کر لیا جائے۔
کیا آپ نے ایک ملی میٹر دیکھا ہے؟ یقیناً دیکھا ہوگا کیونکہ ہر اسکیل پہ چھوٹے پیمائشی نشانات ملی میٹر کو ظاہر کرتے ہیں۔ اس ملی میٹر کا ہزارواں حصہ مائکرومیٹر کہلاتا ہے جسے دیکھا نہیں جا سکتا۔
اب جسے دیکھا ہی نہیں جا سکتا اس مائکرومیٹر کے بھی ہزار حصے کرلیں۔ ہر حصے کو نینو میٹر کہا جائے گا۔ تو جناب وائرس کی پیمائش ہوگی نینو میٹر میں۔
سب سے چھوٹا وائرس جو اب تک دریافت ہوا ہے، اس کی جسامت 20 نینو میٹر جبکہ سب سے بڑے وائرس کی جسامت 300 نینومیٹر تک دریافت ہوئی ہے۔
یعنی وائرس روشنی کی موجوں کے ویو لینتھ (wave length) سے بھی چھوٹا ہوتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وائرس کی شکل و صورت
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وائرس پانچ قسم کی شکل و صورت میں پایا جاتا ہے۔
1۔ پولی ہیڈرل Polyhedral
2۔ کروی spherical
3۔ دھاگہ نما یا فلامینٹس Filamentous
4۔ پیچیدہ وائرس Complex virus
5۔ بل دار وائرس Helical virus
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وائرس کی ساخت
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وائرس کی ساخت بہت سادہ ہے۔ اس میں پروٹین کا بنا ہوا ایک خول ہوتا ہے جسے کیپسڈ (capsid) کہا جاتا ہے۔ اس کیپسڈ میں DNA یا RNA کا جینوم پایا جاتا ہے۔
ایک وائرس میں ایک ہی قسم کا نیوکلیئک ایسڈ ہوتا ہے۔ ایسا کوئی وائرس نہیں جس میں ڈی این اے اور آر این اے دونوں پائے جاتے ہوں۔
کیپسڈ میں ایک قسم سے لے کر چند اقسام کی پروٹینز پائی جاتی ہیں۔
پورا کیپسڈ، بہت سے ایک جیسے چھوٹے چھوٹے یونٹ سے مل کر بنتا ہے۔ ہر یونٹ، کیپسومیئر (capsomere) کہلاتا ہے۔
بہت سے وائرسز میں کیپسڈ کے اندر اینزائمز بھی پائے جاتے ہیں۔ انفیکشن شروع کرنے میں ان کا بہت اہم کردار ہوتا ہے۔
بعض اوقات وائرس جب اپنے میزبان پر حملہ آور ہوتا ہے تو اسے تباہ کر کے رخصت ہوتے وقت اس کی میمبرین لے اڑتا ہے۔ یہ میمبرین اس وائرس کے کیپسڈ کو غلاف کی طرح چاروں طرف سے گھیر لیتی ہے اور envelope کہلاتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وائرس: منفرد بھی، دلچسپ بھی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وائرس کئی لحاظ سے یکتا و منفرد ہے۔ مثلاً
1۔ یہ ایک ناگزیر پیراسائٹ ہے۔ یعنی یہ کبھی بھی خود مختار زندگی بسر نہیں کر سکتا۔ اسے حملے کے لئے کوئی نہ کوئی میزبان درکار ہوتا ہے۔
2۔ اس کے میزبانوں میں ہر قسم کے جاندار شامل ہیں۔ حتیٰ کہ یہ بیکٹیریا اور دیگر جراثیموں پر بھی حملہ آور ہو سکتا ہے۔
3۔ یہ ہمیشہ سیلز کے اندر جا کر اپنا دورِ حیات مکمل کرتا ہے۔ یعنی یہ انٹراسیلولر پیرا سائٹ ہے۔
4۔ وائرس ایسے فلٹر پیپر سے بھی گزر سکتا ہے جس سے بیکٹیریا نہیں گزر سکتے۔
5۔ یہ اپنے آپ کو خود تقسیم نہیں کر سکتا۔ اس کے لئے اسے میزبان درکار ہوتا ہے۔
6۔ وائرس نہ تو کھاتا پیتا ہے، نہ ہی سانس لیتا ہے اور نہ ہی اس میں کسی قسم کا میٹابولزم ہوتا ہے۔
7۔ اس میں کسی قسم کے سیلز یا آرگنیلز نہیں پائے جاتے۔
8۔ پروٹوپلازم بھی نہیں پایا جاتا۔
9۔ اپنی انہی عجیب و غریب خصوصیات کی بنا پر یہ جاندار اور بے جان اشیاء کے مابین تصور کیا جاتا ہے اور اسے جانداروں کے کسی کنگڈم میں نہیں رکھا جاتا (ویسے یہ وائرس کے ساتھ زیادتی نہیں؟)
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وائرس کب غیر فعال ہوتا ہے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چار چیزوں سے ہر قسم کے وائرس مکمل غیر فعال ہو جاتے ہیں۔
1۔ تیزاب Acid
2۔ ڈٹرجنٹ یا صابن
3۔ خشک ماحول
4۔ حرارت