می رقصم
تمہاری خوشبوؤں کے دائروں میں
تمہاری خوشبوؤں کے دائروں میں
رقص کرنا بھی
عجب اک تجربہ ہے
کہ میرے پاؤں میں بجتے ہوئے
ان گھنگھرؤں کی مستیاں
تھکتی نہیں ہیں
٭٭٭٭
الجھن
مجھے خوف ہے
وہ نباہ کے کسی مرحلے پہ
یہ آ کے کہہ دے کہ اب نہیں
میرے دل کو تیری طلب نہیں
٭٭٭٭
ماورا
ہمیں اس عرصہٗ شام و سحر سے
دور جا کر
تتلیوں کے دیس میں جاناں !
کسی ہلکے گلابی پھول کے دل پر
سنہری حرف لکھنا ہیں
محبت کے !
٭٭٭٭
کیا ملا محبت سے
خواب کی مسافت سے
وصل کی تمازت سے
روز و شب ریاضت سے
کیا ملا محبت سے
ایک ہجر کا صحرا
ایک شام یادوں کی
اک تھکا ہوا آنسو
٭٭٭٭
آخرِ شب
بے یقینی کے سرد موسم میں
جب محبت ہوا کی باہوں میں
پتیوں کی طرح بکھرتی ہے
دل پر گہری لکیر پڑتی ہے
چاندنی کے اُداس رنگوں میں
ایک خاموش رات ڈھلتی ہے
٭٭٭٭
