ہر قوم کی اپنی ثقافت ہوتی ہے جس کی بنا پر وہ قوم دنیا میں پہچانی جاتی ہے بنوں کے پٹھانوں کی بھی کچھ ثقافتی خوبیاں ہیں جن کی وجہ سے وہ پوری دنیا میں مشہور ہیں بنوں کا چوک بازار اور دریائے کرم (د کرمے غاڑہ) تو کافی مشہور ہے۔ بنوں کی ثقافت میں سب سے پہلے مسجد کو اہم حیثیت حاصل ہے۔بنوں میں۹۰ فیصد پٹھان آباد ہیںجس کی وجہ سے پشتو زبان یہاں پر بولی اور سمجھی جاتی ہے۔بنوں کی پشتو خوست اور قندہار(افغانستان) کی پشتو سے بہت زیادہ ملتی جلتی ہے۔بنوں کے لوگ پشتو زبان سے انتہائی عقیدت رکھتے ہیں اور اپنی مادری زبان پشتو کو غیرت کی علامت سمجھتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مسجد
مسجد مسلمانوں کا ایک اہم ثقافتی ورثہ ہے لیکن بنوں میں تو مسجد کو بہت ہی زیادہ اہمیت حاصل ہے ماضی میں بنوں کی ہر بستی بلند و بالا حصاروں میں محصور ہوتی تھی جو دفاعی اغراض کیلئے ضروری تھا مگر نقصان یہ ہوا کہ اب ہر برادری کی اپنی مسجد ہے جس سے اتفاق ختم ہوتا جارہاہے۔ رفتہ رفتہ لوگوں میں دوریاں پیدا ہوتی گئیں اور یوں ہر علاقے میں علیحدہ علیحدہ مساجد تعمیر ہونے لگیں۔مسجد میں معاشرے کے لوگ اپنے مسائل علاقے کے بزرگوں کے سامنے رکھ دیتے ہیں اور امام صاحب اور علاقے کے اہم اور بزرگ لوگ پورے خلوص دل سے ان مسائل کو حل کرنے کی کوشش کرتے ہیں موجودہ دور میں بھی بنوں کے اکثر علاقوں میں علاقائی مسائل مساجد میں ہی حل ہوتے ہیں۔اس کے علاوہ مساجد اللہ تبارک و تعالیٰ کے گھر ہیں یہاں پر لوگ ایک ساتھ نماز باجماعت بھی پڑھتے ہیں جس کی وجہ سے لوگوں میں باہمی اتفاق اور محبت پیدا ہوتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قبرستان
ضلع بنوں کے غیور پٹھان خوشی اور غمی کے وقت یکجا ہوتے ہیں ہر قبیلے کا اپنے لئے ایک علیحدہ قبرستا ن ہوتا ہے اس کے علاوہ ضلع بنوں کا سب سے بڑا قبرستان ترنگ قبرستان ہے جہاں پر ہر کوئی اپنے مردوں کو دفنا سکتا ہے۔ بنوں میں اگر دو فریقین کی آپس میں سخت دشمنی ہو اور کسی ایک فریق کا کوئی آدمی فوت ہو جائے تو دشمنی کے باوجود دسرے فریق کے لوگ اس کے نماز جنازہ اور غم میں شریک ہوتے ہیں البتہ شادی بیاہ اور خوشی کے موقع پر شرکت سے سخت اجتناب کرتے ہیں لیکن اب یہ رواج دم توڑتا نظر آ رہا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پردے کا رواج
بنوں کے غیور عوام اسلامی قوانین کے مطابق زندگی گزارتے ہیں یہی وجہ ہے کہ یہاں پر پردے کا بہت ہی سخت رواج ہے یہاں خاتونِ خانہ ایک مخصوص قسم کا برقعہ استعمال کرتی ہے عورت کو بلا عذر گھر سے باہر جانے کی ہرگز اجازت نہیں ہے۔پشتون معاشرے میں پردے کا اتنا سخت رواج شاید ہی کسی اور معاشرے میں ہو جیسا کہ بنوں میں رائج ہے بنوں میں پردے کا رواج پہلے سے ہی رائج ہے اور ابھی تک قائم ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حجرہ یا چوک
ہر علاقے میں خوشی ،غمی اور شادی بیاہ کیلئے ایک مخصوص جگہ متعین ہوتی ہے جسے بنویان حجرہ یا چوک کہتے ہیں ۔چوک یا حجرہ میں سارے لوگ جمع ہوتے ہیں اگر علاقے کو کوئی مسئلہ درپیش آجائے تو علاقے کے سب لوگ اس چوک یا حجرے میں جمع ہوتے ہیں اور مسئلے کے حل کیلئے یکجا طور پر ایک حل ڈھونڈتے ہیں ۔اکثر رات کے وقت لوگ عشاء کی نماز کے بعد حجرے یا چوک کی طرف جاتے ہیں ۔ماضی میں لوگ بزرگوں سے حجرہ یا چوک میں پرانی کہانیاں اور قصے سنتے اور بزرگ لوگ حقہ پیتے ۔حقہ حجرے یا چوک میں لازمی رکھا جاتا تھا۔لیکن اب خاندانی دشمنیوں کی وجہ سے چوک اور حجرے ختم ہوتے جا رہے ہیں اور اس کی جگہ چھوٹی چھوٹی ذاتی بیٹھک نے لے لی ہے۔
٭٭٭
کلہاڑی اور بندوق
پرانے وقتوں میں ضلع بنوں کے لوگ کلہاڑی،خنجرا ور تلوار اپنے ساتھ رکھنالازمی سمجھتے تھے لیکن وقت گزرنے کے ساتھ ساتھ ان چیزوں کی جگہ دونالی بندوق نے لی یہ بندوق درہ آدم خیل اور بنوں کے گاؤں ہیبک شیرزہ خان سورانی میں بنائی جاتی تھی۔موجودہ دور میں کلاشنکوف نے لی ہے۔شادی بیاہ کے موقع پر رات گئے تک یہاں کے لوگ فائرنگ کرتے رہتے ہیں۔جو ایک معیوب روایت ہے پٹھانوں میں تو ویسے بھی اسلحہ ایک لازمی چیز ہے لیکن بنوں کے لوگ تو اسے فرضِ عین سمجھتے ہیں بنوں کے بزرگ لوگ ایک ضرب المثل پیش کرتے ہیں کہ ،"کہ وسلحہ بو ر دو خو یوے یوے نیمے ورزے تہ پہ کو ر دو" (یعنی اگر اسلحہ ایک بوجھ ہے لیکن کسی نہ کسی دن اس کی ضرورت پڑ ہی جاتی ہے۔دونالی بندوق بنوں کا مقامی ہتھیارہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پیغور یعنی طعنہ دینا
بنوں کی آب و ہوا شدید سخت ہے شاید یہی وجہ ہے کہ یہاں کے لوگ بھی کافی جذباتی ہیں۔ یہاں کے لوگ جب ضد پر اترتے ہیں تو اپنا سب کچھ مٹادیتے ہیںلیکن اپنی بات سے پیچھے نہیں ہٹتے بعض اوقات تو بات قتل و مقاتلے تک جا پہنچتی ہے لیکن انا پرست قتل سے بھی دریغ نہیں کرتے جب تک پیغور یعنی طعنہ دینے والے سے اپنا انتقام نہیں لیتا چین سے نہیں سوتا۔ اسی وجہ سے خاندانوں کے خاندان برباد ہو جاتے ہیں ،بہت سے بچے یتیم ہو جاتے ہیں بنوں کے لوگ پیغور (طعنہ)کو اَنا کا مسئلہ تصور کرتے ہیں یہی وجہ ہے کہ یہاں پیغور (طعنہ) دینے والے کو کبھی معاف نہیں کیا جاتا۔جو طعنہ دیتا ہے اور کوئی دوسرے سے کہتا ہے کہ چلو معاف کرو کوئی بات نہیں تو وہ کہتا ہے کہ نہیں اس نے میری غیرت کو للکارا ہے اس نے مجھے پیغور (طعنہ) دیا ہے میں اس کو نہیں چھوڑ سکتا۔یہ پتہ نہیںکہ یہ جہالت کب ختم ہوگی۔پتہ نہیں کہ یہ جہالت کب ختم ہوگی ؟
بدلہ لینا یا انتقام لینا
پٹھانوں میں انتقام لینا بھی فرض سمجھا جاتا ہے۔ اس بات کی اجازت اسلام نے بھی دی ہے کہ قصاص کا بدلہ قصاص۔پٹھانوں میں اور خاص کر بنوں کے پٹھانوں (پشتونوں) میں اگر کوئی کسی قبیلے کا کوئی فر د کسی دوسرے قبیلے کے فر د کو قتل کرے تو دوسرے قبیلے کے لوگ اس شخص کو قتل کردیتے ہیں۔بعض اوقات یہ جنگ انتہائی خطرناک صورت اختیار کر لیتی ہے۔کیونکہ دونوں خاندان اپنی اپنی اَنا کی تسکین کیلئے ایک دوسرے کو موت کے گھاٹ اتار دیتے ہیں بنوں کے پٹھان جب تک اپنا بدلہ نہیں لیتے تب تک چین سے نہیں بیٹھتے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
صلح(جوڑہ)
بنویان کا ایک اور چیز صلح (جوڑہ)ہے۔ جب کبھی کسی گروہ،طبقہ یا افراد کے درمیان کسی قسم کی کوئی جنگ و جدل یا تنازعہ پیدا ہوتا ہے تو علاقے کے بزرگ اور بااثر پشتون بمعہ مسجد کے مولوی اور پیر فقیر اور ملکان وغیرہ بیچ میں آکر وجہ تنازعہ کو رفع دفع کیا جاتا ہے مگر اب یہ رواج ختم ہو رہا ہے کیونکہ اب مسئلے کے حل کیلئے ثالثان رقم کا مطالبہ کرتے ہیں اور رقم وصول کرتے ہیں بلکہ اب تو باقاعدہ طور پر لوگوں نے اس کیلئے دوکانیں کھولی ہیں بارگینز بنالی ہیں۔بعض اوقات یہ ثالثان مخالف فریق سے ملکر غلط فیصلہ کرتے ہیں جس کی وجہ سے ایک فریق کی حق تلفی ہوجا تی ہے۔صلح کے نام پر یہ ثالثان بے پنا ہ رقم بٹورتے ہیں اس لئے اب یہاں کے لوگ عدالتوں کا رخ کرتے ہیں۔ ماضی میں جو غیرت مند اورخدا ترس پشتون تھے جو صلح کیا کرتے تھے اب وہ مر چکے ہیں اور نئی نسل صرف رقم کو دیکھتی ہے۔خدا ہم پر رحم فرمائے ۔آمین۔ (بحوالہ بن باس ص۔ٖف ۱۹۱)
________________________
پیچھا کرنا(چغہ)
پٹھانوں کے علاقے میں جب کوئی شخص کسی کو قتل کرنے یالٹنے کی غرض سے اس کے علاقے میں گھس جائے اور اس کے پاس اسلحہ اور افرادی قوت کم ہو تو گاؤں کے لوگوں کو جسے ہی اطلاع ملتی ہے سب لوگ ہمدردی کے طور پر اسلحہ کے ساتھ محصور آدمی کے پاس اجتماعی شکل میں جاتے ہیں اور حملہ اور یالٹیرے کا پیچھا کر کے اُسے گرفتار کر کے علاقے کے عمائدین کے سامنے پیش کرتے ہیں پھر یا تو حکومت وقت کو دیا جاتا ہے یا پھر علاقے کے لوگ اجتماعی فیصلہ کر کے اسے سزا دیتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جرگہ سسٹم
پٹھانوں کے تمام قبائل میں جرگہ سسٹم رائج ہے جو مسائل کچہریوں میں حل نہیں ہوتے وہ جرگہ سسٹم کے ذریعے حل ہوتے ہیں جرگہ سسٹم میں دونوں فریقین کو بٹھایا جاتا ہے فریقین اپنا اپنا مدعا یادعویٰ بیان کرتے ہیں اور علاقہ کے مشران اور بزرگ لوگ خوش اسلوبی سے اس مسئلے کو حل کرتے ہیں اس طرح علاقے میں امن و امان برقرار رہتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تربور والی
تربور یا تربیر چچا زاد بھائی کو کہتے ہیں انتقام لینا اور مہمان نوازی اگر بنویان قوم کی ایک پرانی روایت ہے تو تربور والی بھی ایک پرانا لفظ ہے۔ پشتون معاشرے میں تربور کے لفظ کو بہت بڑی اہمیت حاصل ہے۔اگر کہیں پر کسی بھی چیز میں مقابلہ پیش آجائے تو اپنے ہی چچا زاد بھائی ایک دوسرے کو نیچا دکھاتے ہیںاور فخر سے کہتے ہیں کہ تربور میں پنڑ کہ یعنی میں نے چچا زاد بھائی کو شکست دیدی۔ ٭٭٭
ننواتے
پشتونولی میں ننواتے بھی ایک اہم اصول ہے۔ ننواتے اسے کہتے ہیں کہ اگر دو فریق آپس میںلڑپڑیں تو علاقے کے بزرگ ،علماء کرام ،پیر فقیر اور ملکان حجرے میں جمع ہو کردنبوں کے ساتھ نقصان زدہ فریق کے پاس صلح کی نیت سے جاتے ہیں اور وہاں پر دنبوں کو ذبح کیا جاتا ہے اور بالآخر ننواتے کو منظور کیا جاتا ہے اوردونوں خاندان آپس میںشیروشکرہوجاتے ہیں۔یوں دشمنی ختم ہوجاتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
