دل بادشاہ جو ہویا ساڈی کتھے منیدا اِے بارش دے موسماں وچ ریتاں دے گھر بنٹریندا اِے
دل ڈینھ کوں رات آکھے وت وی منیدے رہے آں ڈتیاں ہس جیویں صلاحیں اسے رِت کریندے رہے آں
ہاساں دے مْل اساں کوں جھا جھا ودا وچیندا اِے بارش دے موسماں وچ ریتاں دے گھر بنٹریندا اِے
دل بادشاہ جو ہویا ساڈی کتھے منیدا اِے
گْھٹ کوڑے زندگی دے ہس ہس کے پیندے پئے آں اِے تاں ساڈے حوصلے ہن سر چا کے جیندے پئے آں
نہیں تاں وس توں باہر ہوندن جہیڑے روگ اے پلیندا اِے بارش دے موسماں وچ ریتاں دے گھر بنٹریندا اِے
دل بادشاہ جو ہویا ساڈی کتھے منیدا اِے
کے تائیں محبتاں وچ نواں نت فریب کھاسی جہیڑے شوق پالی پھردا اِیں آخر ڈنگی کے راہسی
سپاں کوں وفا دے ناں تے ہتھاں نال دودھ پلینداں اِے بارش دے موسماں وچ ریتاں دے گھر بنٹریندا اِے
دل بادشاہ جو ہویا ساڈی کتھے منیدا اِے
دل تے دماغ دے وچ مسلہ ہے بہوں پْرانڑاں دل بھولڑا اے ازل توں اْتوں ذہن بہوں سیانڑاں
ذہن اپنی ہیر گاندا اے دل ہو کچھ سنٹریندا اِے بارش دے موسماں وچ ریتاں دے گھر بنٹریندا اِے
دل بادشاہ جو ہویا ساڈی کتھے منیدا اِے
اِے مرضیاں دا مالک ساڈی کہیڑی مجال اِے جیویں دل نذیرؔ آکھے ساڈا اْو ہا خیال اِے
نواں حکم روز جاری ساتھے پیار دا کریندا اِے بارش دے موسماں وچ ریتاں دے گھر بنٹریندا اِے
دل بادشاہ جو ہویا ساڈی کتھے منیدا اِے
