نرم گرم ہوائیں

آ، بڑھتی ہوئی پیاس بُجھانے کے لئے آ
آ، بُجھتی ہوئی شمعیں جلانے کے لئے آ
آ، لوریاں تاروں کو سُنانے کے لئے آ
آ، اونگھتی راتوں کو سُلانے کے لئے آ
آ، غنچۂ نورس سے ٹپکتی ہوئی بجلی
آ، شاخ نشیمن کو جلانے کے لئے آ
آ، تو کہ ہے چارہ گرِ بے چارگیِ شوق
آ، درد کی دیوار گرانے کے لئے آ
آ، ہمت پرواز پر و بال میں بھر دے
آ، حوصلۂ زیست بڑھانے کے لئے آ
آ، تُو تو نہیں وقت، کہ آیا بھی گیا بھی
آنا تو یہی ہے کہ نہ جانے کے لئے آ
آ، جانِ ضیا، حسن غزل، شوخی اظہار
آ، گوہر الفاظ لٹانے کے لئے آ
٭٭٭