اک پرندے کا پرِ پرواز ہے
جی ابھی تک گوش بر آواز ہے
عالم اِمکان کی پہنائیاں
کہہ رہی ہیں صبح کا آغاز ہے
ہے درونِ ذات میں رَس گھولتا
کھل چکا ہے اور پھر بھی راز ہے
جھانجنیں ،پائل ،سبھی خاموش ہیں
سلسلہ در سلسلہ اک ساز ہے
اُڑ رہا ہوں سوچ کا کاسہ لیے
ہے صدا پر کتنی بے آواز ہے
ہے یہ سر زیبائی ٔ دار و رسن
موئے تن ہے اور چشمِ باز ہے
بولتی ہیں راہ کی خاموشیاں
یہ قدم تو آسماں کا ناز ہے
***
تیرے چہرے تک نظر جب بھی گئی
آنسؤوں نے دامنِ تر، تر کیا
جستجو ویرانیٔ خاطر نے کی
دشتِ دل صحرا نظر کو گھر کیا
***
اُنہیں یہ ڈر ہے ستارے نہ گفتگو سن لیں
ہمیں یہ خوف کہ سورج نکلنے والا ہے
***
سبز جسموں پہ خار اُگ آئے
لذّتیں بڑھ گئی ہیں چھالوں میں
***
