مینارِ اُردو جنوری ۲۰۲۲ء

سَرشار ہُوں سَرشار ہے دُنیا مِرے آگے
کونین ہے اِک لرزشِ صِہبا مِرے آگے
ھر نَجم ہے اِک عارِضِ روشَن مِرے نزدیک
ھر ذرّہ ہے اِک دِیدۂ بِیا مِرے آگے
ھر جام ہے نَظارۂ کوثر مِرے حَـق میں
ھر گام ہے گُلگشتِ مُصلّیٰ مِرے آگے
ھر پھُول ہے لعلِ شَکر اَفشاں کی حِکایت
ھر غُنچہ ہے اِک حَرفِ تَمنّا مِرے آگے
اِک مُضحَکہ ہے پُرسشِ عُقبیٰ مِرے نزدیک
اِک وھم ہے اندَیشۂ فَردا مِرے آگے
ھَوں کِتنی ہی تاریک شبِ زِیست کی راھیں
اِک نُور سا رہتا ہے جَھلکتا مِرے آگے
مَیں اور ڈرُوں صَولتِ دُنیائے دَنی سے
خُود لَرزہ بر اندام ہے دُنیا مِرے آگے
جُھکتا ہے بَصد عِجز کَلِیسا مِرے دَر پر
آتا ہے لَرزتا ہوا کعبہ مِرے آگے
پیمانے سےجِس وقت چَھلک جاتی ہے صِہبا
لہراتا ہے اِک حُسن کا دَریا مِرے آگے
جب چاند جَھمکتا ہے مِرے ساغرِ زر میں
چَلتا نہیں خُورشید کا دعویٰ مِرے آگے
جب جُھوم کے مِینا کو اُٹھاتا ہوں گھٹا میں
ہِلتا ہے سر گُنبدِ مِینا مِرے آگے
آتی ہے دُلہن بن کے مشِیّت کی جلُو میں
آوارگیِ آدم و حوّا مِرے آگے
پَیمانے پہ جِس وَقت جُھکاتا ھُوں صُراحی
جُھکتا ہے سر عالمِ بالا مِرے آگے
پہلُو میں ہے اِک زُہرہ جَبِیں ہاتھ میں ساغر
اِس وقت نہ دُنیا ہے نہ عُقبیٰ مِرے آگے
جوش اُٹھتی ہے دُشمن کی نَظر جب مِری جانِب
کُھلتا ہے مُحبَّت کا دَرِیچا مِرے آگے