میرے محرم

کتنے ہی دن مزید گزر گیۓ ۔۔۔۔۔۔

وہ شخص, وہ ظالم شہزادہ۔۔۔ دوبارہ نہیں آ یا تھا۔۔۔۔

اب تو جیسے اس کے آ نسو بھی خشک ہو چکے تھے۔۔۔ وہ رو رو کر تھک چکی تھی۔۔۔۔

وہ از حد حیران تھی۔۔۔۔ بے یقین تھی۔۔۔ کیا یہ حادثہ اس کے ساتھ ہوا تھا۔۔۔۔ ؟

اور کیوں۔۔۔ ؟ کیوں ہوا تھا۔۔۔۔۔ ؟

اب بس سکوت تھا ہر طرف۔۔۔۔۔ اس کے اندر بھی اور باہر بھی۔۔۔۔۔

اور پھر ایک دن۔۔۔۔

اچانک وہ پھر سے آ گیا ۔۔۔۔

اسی دستک , اسی وجاہت اور خوبصورتی کے ساتھ۔۔۔۔۔۔۔

مہر بس خاموشی سے انہیں دیکھتی رہی۔۔۔۔۔

انہوں نے اسے اپنے ساتھ چلنے کیلیۓ کہا۔۔۔۔۔

وہ خاموشی سے اٹھی اور ان کے پیچھے کمرے سے باہر چل دی۔۔۔۔۔ باہر قدم نکالتے ہی ایکدم رکی۔۔۔ وہ روشنی اور کھلی ہوا میں۔۔۔۔ بہت دنوں بعد نکلی تھی۔۔۔۔ آ نکھوں کو کچھ وقت لگا, سامنے والے منظر سے مانوس ہونے میں۔۔۔۔

وہ حیرت کا مجسمہ بنی آ نکھیں پھاڑے باہر دیکھ رہی تھی۔۔۔۔

وہ بہت بڑی عالیشان حویلی کی ایک راہداری میں کھڑی تھی۔۔۔۔

"مہر۔۔۔۔۔۔ " سامنے کھڑے شخص نے اسے پکارا۔۔۔۔ وہ چونکی۔۔۔۔

"آؤ۔۔۔۔ " وہ اسے بلا رہا تھا۔۔۔۔۔ مہر نے قدم آ گے بڑھاۓ۔۔۔۔۔

ہر چیز جیسے سلو موشن میں چل رہی تھی۔۔۔

ارد گرد نظر آ تے ملازم ان کے قریب سے گزرنے پر رک کر سر جھکا لیتے۔۔۔۔۔

ٹھنڈی ہوا۔۔۔۔ عجیب سا سکوت, خاموشی اور مسحور کر دینے والا سماں۔۔۔۔۔

وہ ایک کمرے میں داخل ہوۓ۔۔۔۔۔

وہ کمرے کے دروازے پر رکی۔۔۔۔ جھجھکی۔۔۔ ٹھٹھکی۔۔۔۔

"آ جاؤ مہرسلیمان ۔۔۔۔۔ اندر آؤ ۔۔۔۔۔۔"

سامنے کھڑے شخص کی آ نکھوں میں کوئ جادو سا تھا۔۔۔ وہ مسحور سی اس کے پیچھے کمرے میں داخل ہوئ۔۔۔۔۔

وہ پر تعیش۔۔۔ شاہانہ سا بیڈروم ۔۔۔۔ خوابوں جیسا۔۔۔۔

وہ اردگرد نظریں دوڑا رہی تھی جب۔۔۔۔ ایکدم اس کی نظریں, دیوار پر جم سی گئیں ۔۔۔

اسے جھٹکا لگا تھا۔۔۔ جیسے کوئ ناقابل یقین سی چیز دیکھ لی ہو۔۔۔ وہ شاکڈ اور پھٹی پھٹی سی آ نکھوں سے سامنے دیکھے جا رہی تھی۔۔۔۔۔

اور ایسے, جیسے اس کی سانس بند ہو چکی ہو۔۔۔۔

"مہر۔۔۔۔! "

اس شہزادوں جیسے شخص کی مسحور کر دینے والی آ واز سنائ دی۔۔۔۔۔

اس نے بے یقین نظروں سے ان کی طرف دیکھا۔۔۔۔

"یہ۔۔۔ یہ۔۔۔۔ ؟" اس کے حلق سے آ واز نہیں نکل رہی تھی۔۔۔ اس نے انگلی اٹھائ اور دیوار کی طرف اشارہ کیا۔۔۔۔۔

"یہ۔۔۔ کیا ہے۔۔۔ ؟"

وہ خاموش رہا۔۔ خاموشی سے اس کی طرف دیکھتا رہا۔۔۔

وہ ٹرانس کی کیفیت میں قدم اٹھاتی دیوار کے پاس گئ۔۔۔۔ اس دیوار پر لگی بے شمار چھوٹی بڑی تصاویر میں نظر آ تے ایک مسکراتے ہوۓ چہرے کے ایک ایک نقش کو اس نے انگلی کی پوروں سے چھوا۔۔۔۔

ہر گزرتے پل کے ساتھ بے یقینی بڑھتی گئ۔۔۔۔

ہر تصویر میں ایک ہی چہرہ تھا۔۔۔ بے انتہا خوبصورت, بے انتہا خوش, کھلکھلاتا ہوا چہرہ۔۔۔۔۔۔

ہاں۔۔۔۔ ہر تصویر میں اسی کا چہرہ تھا۔۔۔۔۔ مہر سلیمان کا۔۔۔۔۔

وہ مہر سلیمان کا چہرہ تھا۔۔۔ اس کا ایک ایک نقش, اس کی مسکراہٹ, اس کی آ نکھیں, اس کے ہونٹ۔۔۔۔۔۔ سب میر سلیمان کے تھے۔۔۔۔

وہ مہر سلیمان تھی۔۔۔۔۔

لیکن۔۔۔ وہ مہر سلیمان نہیں تھی۔۔۔۔۔

"یہ۔۔۔۔ یہ میں نہیں ہوں۔۔۔ "

وہ کسی خواب کی سی کیفیت میں بولی۔۔۔۔

"یہ میں نہیں ہوں۔۔۔ " وہ بڑبڑاتی جا رہی تھی اور ان تصاویر کو بے یقینی سے چھوتی جا رہی تھی۔۔۔۔

"ہاں۔۔۔ یہ تم نہیں ہو مہر سلیمان۔۔۔۔ " وہ ان کی طرف پلٹی

سامنے وہی شہزادوں سا شخص کھڑا تھا۔۔۔ شلوار قمیص۔۔۔ کندھوں پر چادر۔۔۔ بازو کی آ ستینں فولڈ کیے۔۔۔ سیاہ آ نکھوں سیاہ بالوں والا شہزادہ۔۔۔۔۔

"یہ کون ہے۔۔۔ ؟" اس نے بے چینی سے پوچھا۔۔۔

"مہر سلیمان۔۔۔۔ "

وہ بولے۔۔۔ "تم اس وقت سید احسان علی شاہ کی حویلی میں کھڑی ہو۔۔۔ یہ حویلی۔۔۔ اس کے آس پاس کا سارا علاقہ۔۔۔۔ ایکڑوں پر پھیکی زمین اور بہت سے گاؤں اور ان کی سرداری جن کے نام ہے۔۔۔۔

تم ان کی زمین۔۔۔ ان کی حویلی میں کھڑی ہو۔۔۔۔ "

مہر سلیمان پر عجیب سے انکشافات ہو رہے تھے۔۔۔۔

"اور یہ کمرہ۔۔ جہاں تم کھڑی ہو۔۔۔۔ سید احسان علی شاہ کے اکلوتے بیٹے اور ان کے وارث خرم احسان علی شاہ کا ہے۔۔۔۔ "

وہ بے تاثر سے لہجے میں بول رہے تھے۔۔۔۔

"اور سامنے بھری دیوار پر مسکراتی ہوئ لڑکی۔۔۔ سید احسان علی شاہ کی اکلوتی بھتیجی اور ان کے بیٹے کی زندگی۔۔۔۔ نوشین فیضان علی شاہ ہے۔۔۔۔۔ "

وہ بولے۔۔۔ مہر نے نام زیر لب بڑبڑایا۔۔۔

"نوشین۔ فیضان علی شاہ۔۔۔ "

"ہاں۔۔۔ نوشین فیضان علی شاہ۔۔۔۔۔ "

"وہ۔۔۔ وہ کہاں ہے۔۔۔ ؟"

مہر نے اٹکتے ہوۓ پوچھا۔۔۔ لیکن سامنے کھڑا شخص لب بھنچے خاموش رہا۔۔۔۔

"نوشین فیضان علی شاہ کہاں ہے ؟؟" اس نے پھر سے پوچھا۔۔۔

"وہ مر چکی ہے۔۔۔۔ " اس شخص کا لہجہ بھی پتھر تھا۔۔۔۔۔

"نوشین فیضان علی شاہ آ ج سے چار مہینے پہلے مر چکی ہے۔۔۔۔ "

مہر سلیمان کا دل دھک سے رہ گیا۔۔۔۔

"یہ کیا کہہ رہے ہیں آ پ۔۔؟"

وہ شاکڈ سی بولی۔۔۔۔ اس نے پیچھے مڑ کر بےانتہا خوبصورت, مسکراہٹ سے بھرپور چہرے والی لڑکی کو دیکھا۔۔۔۔ کیا وہ مر چکی تھی ؟ ۔۔۔۔۔۔ اس دنیا میں نہیں رہی تھی ؟

۔۔۔

وہ لڑکی۔۔۔ جسے دیکھ کر زندگی کا گمان ہوتا تھا۔۔۔۔ جس کی ہر تصویر زندگی سے بھرپور تھی۔۔۔۔ وہ حسین ترین, لڑکی مر چکی تھی۔۔۔۔۔ ؟ مٹی ہو چکی تھی۔۔۔۔ ؟

مہر کا دل دکھ سے بھر گیا۔۔۔۔ وہ کیسے مر سکتی تھی۔۔۔۔۔

وہ اتی زندہ دل۔۔۔ زندگی سے بھرپور لڑکی۔۔۔۔

"مہر سلیمان۔۔۔۔ یہ وقت ہمیں ہماری آ نکھوں سے بہت سے ناقابل یقین واقعات دکھاتا ہے۔۔۔۔ کبھی کبھی ہماری زندگی سے کوئ ایسا بھی چلا جاتا ہے جس کے جانے کا ہمیں برسوں یقین نہیں آ تا۔۔۔۔۔ "

مہر نے مڑ کر اس شخص کو دیکھا۔۔۔ اسے وہ کہیں دور کھویا ہوا سا لگا۔۔۔۔ اسے اس کی آ نکھوں میں دکھ کی کرچیاں سی نظر آئیں۔۔۔۔۔

"ایسے لوگ ہماری آ نکھوں کے سامنے سے چلے جاتے ہیں۔۔۔۔ جو زندگی سے بھرپور ہوتے ہیں۔۔۔۔ جو کل تک مسکرا رہے ہوتے ہیں۔۔۔ ہمارے ساتھ باتیں کر رہے ہوتے ہیں اور آ ج۔۔۔۔۔"

وہ خاموش ہوا۔۔۔

"آ ج جب وہ ہمارے سامنے خاموش, آ نکھیں موندے, بالکل چپ۔۔۔۔ پڑے ہوتے ہیں تو ہمارے بے تحاشا چیخنے چلانے ہر بھی وہ آ نکھیں نہیں کھولتے۔۔۔۔۔ اور ہم بے یقین سے انہیں اپنی آ نکھوں کے سامنے مٹی میں ملتے دیکھتے ہیں۔۔۔۔

ہماری پکاروں کا, چیخوں کا ان پر کوئ اثر نہیں ہوتا۔۔۔ وہ خاموش ہوتےہیں۔۔۔ بالکل خاموش۔۔۔۔ "

شاید انہوں نے بھی کسی کو کھویا تھا۔۔۔۔

مہر اپنے ساتھ کیے گیۓ زندگی کے ہر مذاق کو بھول گئ اس وقت۔۔۔۔

وہ سامنے کھڑے شخص جو بنا پلک جھپکے دیکھ رہی تھی۔۔۔۔۔

"وہ نوشین فیضان علی شاہ تھی۔۔۔۔ " وہ دو قدم چلتا ہوایک تصویرکے سامنے آ یا ۔۔۔ نوشین کی چمکدار آ نکھوں, مسکراتے چہرے والی تصویر۔۔۔۔۔

"سید احسان علی شاہ کے بڑے بھائ کی اکلوتی بیٹی۔۔۔ ان کی آ خری نشانی۔۔۔۔ بن ماں باپ کی نوشین فیضان علی شاہ۔۔۔ ان کو عزیز تھی۔۔۔ بے حد عزیز۔۔۔۔ اپنے اکلوتے بیٹے سے بھی زیادہ عزیز۔۔۔

انہوں نے نوشین کی ہر خواہش پوری کی۔۔ اس کے منہ سے نکلا ہر لفظ پایہ تکمیل کو پہنچا۔۔۔۔

یہ حویلی کی اونچی دیواریں۔۔۔ جہاں سے حویلی بیٹیاں باہر نہ جا سکتیں۔۔۔۔ جہاں سے باہر کی دنیا سید احسان علی شاہ کی تینوں بیٹیوں نے بھی کبھی نہ دیکھی تھی۔۔۔۔۔

اس باہر کی دنیا کے دروازے حویلی کی پہلی بیٹی نوشین فیضان علی شاہ کے لیے کھلے تھے۔۔۔۔ اس نے دنیا گھومی۔۔۔۔

اس کا دم گھٹتا تھا اس حویلی میں۔۔۔۔ وہ بیرون ملک رہی۔۔۔۔ وہاں تعلیم حاصل کی۔۔۔۔ آ زادی سے اس نے اپنی زندگی گزاری۔۔۔۔ اور اس کی زندگی جب سے شروع ہوئ۔۔۔ اس کا ہمسفر, اچھا ساتھی۔۔۔ ایک بہترین دوست خرم احسان علی شاہ۔۔۔ اس کے ساتھ تھا۔۔۔ اس نے اپنی زندگی کے ہر موڑ پر خرم احسان کو اپنے ساتھ پایا۔۔۔۔ اور خرم احسان نے اپنی زندگی کا ایک حصہ نوشین فیضان علی شاہ کے ساتھ گزارا۔۔۔۔ ان کی دوستی مثالی تھی۔۔۔۔ ان کا ایکدوسرے کے بنا گزارا نا ممکن تھا۔۔۔۔ "

وہ بول رہے تھے۔۔۔۔ اور مہر سلیمان کھوئ ہوئ سی ان کو سن رہی تھی۔۔۔۔ وہ جیسے نوشین فیضان علی شاہ کی زندگی کو اپنی آ نکھوں کے سامنے چلتا ہوا دیکھ رہی تھی۔۔۔۔

"خرم احسان سے نوشین کو پہنچنے والی چھوٹی سی تکلیف بھی برداشت نہ ہوتی۔۔۔۔۔ وہ اس کو بیمار دیکھ کر پا گل سا ہو جاتا۔۔۔۔ کچھ پل بھی ایکدوسرے کے بنا رہتے تو بے چین ہو جاتے۔۔۔۔ "

"کیا تم سوچ سکتی ہو مہر۔۔۔۔ "

وہ اس کی طرف مڑے۔۔۔

"کوئ ایسا جس سے اس حد تک وابستگی۔۔۔ جس کی اس حد تک عادت ہو کہ اس کے بنا گزارا نہ ہو۔۔۔۔

وہ زندگی سے چلا جاۓ تو کیا ہو گا۔۔۔۔ ؟"

وہ اس سے پوچھ رہے تھے۔۔۔۔۔

"کیا ہو گا مہر سلیمان جب کوئ من چاہا زندگی سے ہمیشہ ہمیشہ کے لیے چلا جاۓ۔۔۔۔ ؟"

انہوں نے مہر سلیمان کی آ نکھوں میں دیکھا۔۔۔۔۔

"وہ انسان مر جاۓ گا۔۔۔۔ "

مہر سلیمان کی آ نکھوں میں آ نسو تھے۔۔۔۔ اس لڑکی کے لیے۔۔۔ جو آج سے چار مہینے پہلے مر چکی تھی۔۔۔۔ اس لڑکی کے لیے جو مہر سلیمان کے جیسی تھی۔۔۔۔ اس پھولوں جیسی لڑکی کے لیے جو آ ج منوں مٹی تلے دفن تھی۔۔۔۔

"تم ٹھیک کہہ رہی ہو۔۔۔ وہ انسان مر جاۓ گا۔۔۔۔۔ "

وہ دکھ بھرے لہجے میں بولے۔۔۔۔

"سید احسان علی شاہ کا اکلوتا بیٹا۔۔۔ ان کی پشتینی سرداری اور جاگیروں کا وارث۔۔۔ آ ج ہاسپٹل کے ایک کمرے میں زندگی اور موت کی جنگ لڑ رہا ہے۔۔۔۔۔ "

مہر سلیمان کو جھٹکا لگا ۔۔۔۔۔

"ہاں مہر سلیمان۔۔۔۔ وہ انسان جس سے اس کے باپ کا فخر اور غرور وابستہ ہے۔۔۔۔ اس حویلی کے ایک کمرے میں جاۓ نماز بچھاۓ دعا کے لیے ہاتھ اٹھاۓ رو رو کر دعائیں کرتی بوڑھی ماں کی دھندھلاتی آ نکھوں کا نور اور اس حویلی کی کم گو, خاموش سی, تین جوان بہنوں کا مان وابستہ ہے۔۔۔۔۔

وہ شخص آ ج موت کے دہانے پر ہے۔۔۔ وہ مر گیا تو بہت سے لوگ مر جائیں گے مہر سلیمان۔۔۔۔ بہت سے لوگ۔۔۔۔ "

مہر سلیمان کو اس شخص کی آ نکھوں میں بے تحاشا سرخی اور ضبط کی جھلک نظر آئ۔۔۔۔۔

"آ ج سے چار مہینے اور کچھ دن پہلے ایک حادثہ ہوا۔۔۔۔ حادثہ۔۔۔۔ جو کبھی بتا کہ نہیں ہوتا۔۔۔۔ اور جس کے بعد زندگی تہس نہس ہو کر جاتی ہے۔۔۔۔۔ "

وہ بولے۔۔۔۔

"ہاں۔۔۔ جیسے میری ہوئ ۔۔۔۔ "وہ بنا آ واز کے بولی۔۔۔۔

دل میں درد سا اٹھا تھا۔۔۔۔

"خرم احسان علی شاہ نے اپنے ہاتھوں سے نوشین فیضان علی شاہ کو موت کی کھائ میں دھکیل دیا۔۔۔۔ "

مہر نے نا سمجھی سے اسے دیکھا۔۔۔۔

"ایکسیڈنٹ ہوا تھا۔۔۔ دونوں ساتھ تھے۔۔۔ ہمیشہ کی طرح۔۔۔ اور نوشین۔۔ بچ نہ سکی۔۔۔ اس دن خون میں تر نوشین کی لاش اور خرم احسان کا زخمی, ٹوٹا پھوٹا سا وجود ایک ساتھ لاۓ گیۓ تھے۔۔۔۔ اس دن میں نے سید احسان علی شاہ کو جھکے کندھوں اور بنا شملے کے روتے ہوۓ دیکھا تھا ۔۔۔۔

ان کے چہرے پر غرور نظر نہ آ یا۔۔۔۔ ان کی آنکھیں بوڑھی نظر آئیں۔۔۔۔۔

انہوں نے نوشین فیضان علی شاہ کو کھویا تھا۔۔۔۔۔ اپنے بھائ کی آ خری نشانی کو۔۔۔۔ اور اب وہ یقینی طور پر اپنے بیٹے کو کھونے جا رہے تھے۔۔۔۔ ان کا وجود کانپ رہا تھا۔۔۔۔ " اس شخص کے لہجے میں کرب تھا۔۔۔۔

مہر کی آ نکھوں سے آ نسو بہہ رہے تھے۔۔۔۔

"چار ماہ سے سید احسان علی شاہ کا بیٹا ہاسپٹل میں زندگی اور موت کی جنگ لڑ رہا ہے۔۔۔ وہ کوما میں ہے۔۔۔۔ اور ہوش میں آ نے پر اگر اس کو نوشین فیضان کی موت کی خبر ہوئ تو۔۔۔۔ وہ دوسرا سانس بھی نہیں لے پاۓ گامہر۔۔۔۔ "

مہر کا دل غم سے بھرتا چلا گیا۔۔۔۔

"سنو مہر۔۔۔۔۔!! " وہ اس کی طرف آ ۓ۔۔۔۔

اس کے قریب۔۔۔ بے حد قریب۔۔۔۔

"غور سے سنو۔۔۔ "

مہر سانس روکے ان کو دیکھے گئ۔۔۔۔

"میں نے کہا تھا نا تمہیں کہ۔۔ مہر سلیمان مر چکی ہے۔۔۔۔۔ ؟"

مہر کا دل زور سے دھڑکا۔۔۔۔ اس نے ہاں میں سر ہلایا۔۔۔۔۔

"تمہاری نئ زندگی شروع ہو چکی ہے مہر سلیمان۔۔۔۔۔ تمہیں تمہارا نام ,پچھلی زندگی اور اس زندگی سے جڑا ہر انسان۔۔۔ ہر رشتہ بھلانا ہو گا۔۔۔۔ اپنی پہچان تک بھلانی ہو گی۔۔۔۔ "

انہوں نے ایک ایک لفظ پر زور دیا۔۔۔۔

"نن۔۔۔۔ نہیں۔۔۔ " وہ ششدر سی انہیں دیکھے گئ ۔۔۔۔

"تم آج سے مہر سلیمان نہیں۔۔۔ نوشین فیضان علی شاہ ہو۔۔۔ "

"نہیں۔۔۔۔ بالکل نہیں۔۔۔ "

وہ مسلسل نفی میں سر ہلا رہی تھی۔۔۔۔

"تم نے سنا۔۔۔ ؟ تم آ ج سے نوشین فیضان علی شاہ ہو۔۔۔۔۔۔۔ اس حویلی کی بیٹی۔۔۔۔ سید احسان علی شاہ کی بھتیجی۔۔۔ اور خرم احسان علی شاہ کی زندگی نوشین ہو۔۔۔۔ نوشین فیضان علی شاہ ۔۔۔۔۔۔۔۔"

اس دن وہ ، اس حویلی کے وارث کے کمرے میں کھڑی ہو کر سیاہ آنکھوں والے اس شہزادے کے سامنے بہت چیخی تھی ، چلائ تھی۔۔۔

"نہیں۔۔۔ مجھے کسی اور کے نام کی زندگی نہیں گزارنی۔۔۔ کبھی نہیں۔۔۔ مجھے اپنی پہچان واپس چاہئے۔۔۔ مجھے میرے گھر جانا ہے۔۔۔ میرے اپنوں کے پاس۔۔۔آپ لوگ جو کر رہے ہیں وہ ظلم ہے۔۔ ایسا نہیں کریں۔۔۔"

وہ سسک سسک کر التجا کر رہی تھی۔۔۔

"خدا کیلئے مجھے واپس جانے دیں۔۔۔ میں ابا جان کے بنا نہیں رہ سکتی۔۔۔"

اس نے اس شخص کے آگے ہاتھ جوڑے تھے۔

سرخ روئ آنکھوں پژمردہ چہرے اور بکھرے حلیۓ میں۔۔۔ وہ۔انتہائی بے بس لگ رہی تھی۔۔۔ اس پر سے نظریں ہٹانا مشکل ہو رہا تھا۔۔۔

"مہر سلیمان۔۔۔ یا تو تمہیں یہ زندگی گزارنی ہو گی یا پھر سچ میں مرنا ہو گا۔۔۔"

سامنے کھڑا شخص خاموشی سے اس کی آہ و پکار سننے کے بعد اس کے قریب آیا۔۔۔ چہرہ اس کے کان کے قریب کیا اور سرد بے تاثر آواز میں بولا۔۔۔

مہر سلیمان ایک دم منجمند ہوئ تھی۔۔ آنسو جم سے گۓ تھے۔۔۔ خوف سے اسے دیکھا۔۔۔

"تمہیں مرنا ہو گا۔۔۔ ختم کر دیا جائے گا تمہیں ۔۔۔ اور ساتھ ہی تم سے جڑے ہر رشے کو۔۔۔۔ تمہارے ابا جان کو۔۔۔۔ سب کو۔ ۔۔۔

تم ان سخت دل جاگیر داروں کی سرشت کو نہیں جانتی۔۔۔جو چیز ان کے کام نہ آ ۓ ۔۔۔۔ اسے صفحہ ہستی سے مٹا دیا جاتا ہے۔۔۔"

مہر کے ہاتھ سرد پڑے اور سینے میں سانس اٹکنے لگی۔۔۔

"فیصلہ تم پر ہے مہر۔۔۔ تمہیں جینا ہے اپنی فیملی کی زندگی بچانے کے لئے یا مرنا ہے۔۔۔ ان کو ساتھ لیے۔۔۔"

اور مہر سلیمان۔۔۔

وہ معصوم، ڈری سہمی نازک پریوں جیسی لڑکی۔۔۔ اس میں اتنی ہمت کہاں تھی کہ وہ موت کا رستہ خود چنتی اپنے لئے اور اپنے جان سے عزیز گھر والوں کے لئے

۔۔۔۔ وہ بالکل بھی بہادر نہ تھی

۔۔۔ اس میں اتنی ہمت نہیں تھی کہ اپنی وجہ سے اپنے, اپنوں کو۔۔۔۔ ۔ اپنے رشتوں کو موت کی طرف دھکیل دیتی ۔۔۔

اس نے وہیں اسی جگہ اپنی ہار تسلیم کی۔۔۔

وہ اس دن ان ظالموں کے ظلم کے آگے ڈھے گئی تھی۔۔۔

دل میں کہیں بہت اندر بہت چپکے سے اس نے اللّہ سے ایک بات کی۔۔ "جیسے تو راضی میرے مالک، ویسے میں راضی۔۔۔ اور خود پر ہونے والا ہر ظلم ہر زیادتی میں نے رکھ لی۔۔ اس انصاف کے دن کے لیے۔۔۔"

اس نے بے دردی سے آنسو پونچھے۔۔

"بس مہر۔۔۔ زندگی کا سب سے بھیانک روپ تم نے دیکھ لیا۔۔۔ سب سے بڑا حادثہ تم پر سے ہو گزرا۔۔۔ اب آنسو نہ بہاؤ۔۔۔ اس سے بڑا اور کونسا دکھ دیکھنا ہے اب۔۔۔"

وہ نہیں جانتی تھی وقت نے اس کے لئے اس سےبھی بڑے ، اس سے بھی تکلیف دہ حادثے کی سازش بہت پہلے سے رچا رکھی تھی۔۔ کچھ اس سے بھی بڑا، بھیانک اور تکلیف دہ حادثہ اس کا منتظر تھا۔۔

جس کا نام "محبت " تھا۔۔۔ جس کا نام "امیر حماد" تھا۔۔۔

"امیر حماد" سامنے کھڑا سیاہ آنکھوں، سیاہ بالوں والا، بے انتہا خوبصورت، بے انتہا پر اسرار سا شہزادہ۔۔۔

" میں مانوں گی آپ کی ہر بات۔۔۔"

اس نے امیر حماد کو کہا اور اور وہیں دوزانو بیٹھ کر سر گھٹنوں میں دیۓ پھوٹ پھوٹ کر رو دی۔۔۔

مہر سلیمان کے خود کے وجود، خود کی پہچان اور نام کے ختم ہونے پر۔۔۔

وہ اس دن امیر حماد کے سامنے تڑپ تڑپ کر روئی تھی۔۔۔

*********

امیر حماد نے اسے متعارف کروایا۔۔۔

اس حویلی سے ۔۔۔ اس کے مکینوں سے۔۔۔اس کے درودیوار سے۔۔۔ جن میں وہ۔قید ہونے جا رہی تھی۔۔۔

اس حویلی میں بہت سے لوگ تھے۔۔ اماں سائیں، ان کی تین بیٹیاں اور بہت سے ملازم، خادمائیں۔۔۔

کیسی عجیب بات تھی۔۔۔ اتنے لوگوں کے ہونے کے باوجود وہاں سب خاموشی کی چادر اوڑھے ہوئے، خاموش مجسمے بنے پھرتے تھے۔۔۔

جیسے لاشیں ہوں کوئی۔۔ ہر کوئی اپنے معمول کے کاموں میں مصروف ہوتا۔۔۔۔

اس حویلی کی وہ تینوں بیٹیاں بڑی بڑی چادریں اوڑھے خاموشی سے اسے ملیں۔۔۔نہ کوئی سوال نہ کوئی جواب۔۔۔ عجیب پتھراۓ ہوۓ سے چہرے تھے ان کے۔۔۔ مہر کا دم گھٹنے لگا۔۔۔

اس حویلی کے تمام ملازم جیسے بے زبان تھے۔۔۔جیسے مشینیں ہوں۔۔۔

اور اماں سائیں۔۔۔ وہ ان کے پاس جاۓ نماز کے قریب خاموشی سے بیٹھی، سلام کیا۔۔۔

انہوں نے قرآن پاک پڑھتے۔۔۔ ایک پل کو رک کر اسے دیکھا۔۔۔۔ اجنبی نظروں سے۔۔ ہاتھ اس کے سر پر رکھا۔۔۔ اور دوبارہ سے قرآن پاک پڑھنے میں مصروف ہو گیئں۔۔۔

مہر نے مڑ کر دروازے میں ہاتھ باندھے کھڑے امیر حماد کو دیکھا۔۔۔ انہوں نے اسے اٹھ کر وہاں سے چلے آنے کا اشارہ کیا اور وہ ان کے ہمراہ باہر نکل آئی۔۔۔

اسے لگا جیسے بے زبانوں کی حویلی میں بس امیر حماد ہی بولتے تھے۔۔۔ وہ ان کی بھی آواز نہ سنتی تو شاید بہری ہو چکی ہوتی اب تک۔۔۔

"نو شین۔۔۔" ان کے ساتھ مختلف راہداریوں سے گزرتے ہوئے وہ حویلی کے بڑے سے وسیع باغ نما لان میں آ گئے تھے۔۔۔ جب انہوں نے پکارا۔۔۔ مہر نے الجھی نظروں سے انہیں دیکھا۔۔۔

"نو شین۔۔۔" وہ رک گئے اور سختی سے اس کی آنکھوں میں دیکھ کر بولے۔۔۔

"جج۔۔۔ جی۔۔۔" وہ سٹپٹائ۔

وہ اسے پکار رہے تھے ۔۔۔مہر سلیمان کو۔۔۔

"عادت ڈال لو اب اس نام کی۔۔۔" وہ۔پھر سے چلنے لگے۔ مہر نے تیزی سے ان کی رفتار سے قدم ملاۓ۔۔۔

"یہاں کوئی بھی بات نہیں کرتا۔۔۔ سب چپ رہتے ہیں۔۔۔"

وہ ان سے بولی۔

"یہاں سب ایسے ہی ہیں ۔۔۔ ہمیشہ سے۔۔۔" وہ بولے۔

"میں کیسے ان میں رہ پاؤں گی"

اس کی آنکھوں میں نمی تیرنے لگی۔۔۔ امیر حماد کے دل کو کچھ ہؤا۔۔۔

"نو شین۔۔۔ تم مجھے اس حویلی میں ہر جگہ، ہر قدم پر اپنے ساتھ پاؤ گی۔۔۔"وہ رکے۔۔۔

"مجھے اپنا دوست سمجھو، اور میرا تم سے وعدہ ہے اس حویلی میں کبھی تمہارے ساتھ کچھ برا نہیں ہو گا۔۔۔

ہاں یہ ظالم لوگ ہیں۔۔۔ لیکن یہ عزتوں کا خیال رکھنے والے۔۔۔ دلوں کے خالص لوگ ہیں۔"

وہ بہت نرمی سے اسے بتا رہے تھے۔ اور مہر۔۔۔ اس کے دل سے تمام برے خدشات اور وہم۔۔۔ دور ہوتے چلے گئے۔۔۔

"پھر بھی نہیں یقین۔۔ تو سنو ۔۔۔ اس حویلی میں تمہاری حفاظت کی ضمانت میں لیتا ہوں۔۔۔میں امیر حماد۔۔۔ مجھ پر یقین کرو۔۔۔" اور اس نے کر لیا یقین ان پر۔۔۔ کہ وہ ہی تو تھے اجنبی دنیا کے باسیوں میں اس کے واحد آشنا۔۔۔

************

وہاں سب اسے نو شین بی بی سمجھتے تھے۔۔۔ پتا نہی سمجھتے تھے یا سمجھنے پر مجبور تھے۔۔۔ اس کی طرح۔۔

۔اس کے ویران سے شب و روز وہاں گزرنے لگے جہاں گھٹن ہی گھٹن تھی۔۔۔ تازہ ہوا کا کوئ جھونکا نہ تھا۔۔۔ خرم احسان کی بہنوں سے وہ چھوٹی چھوٹی باتیں کرتی ۔ کبھی اس کی کسی بات پر وہ تینوں لڑکیاں مسکراتیں تو ان کی مسکراہٹ میں بھی عجیب سے ڈر کی جھلک نظر آتی۔۔۔

وہ اماں سائیں کے پاس بیٹھی رہتی۔۔ ان سے باتیں کرنے کی کوشش کرتی۔۔ اسے ان کے پر نور چہرے پر ٹھہرے غم کی تحریر نظر آتی۔۔۔

کبھی کبھی وہ شفقت سے اس کے سر پر ہاتھ پھیر دیتیں۔۔۔

اور کبھی کبھی آنکھوں میں عجیب سی آس لۓ اسے دیکھتی رہتیں۔۔۔

مہر ان سے گھلنے ملنے لگی تھی۔۔۔ وہ آزادی اور رونقیں میں رہنے والی لڑکی تھی۔۔ یہاں بھی ہر طرف رونقیں ہی چاہتی تھی۔۔۔

______

______

اس دن وہ مسکرا کر اس حویلی کی سب سے چھوٹی بیٹی ام ہانی سے کوئ بات کر رہی تھی۔۔

ام ہانی اس سے کچھ حد تک بے تکلف ہو چکی تھی۔۔۔

نو شین کی مسکراہٹ اس کی شہد رنگ آنکھوں کو چھوٹا اور چمکدار کر دیتی تھی۔۔۔ دور کھڑے امیر حماد نے پر سوچ نظروں سے اس کی طرف دیکھا۔۔۔

"کیا اس لڑکی کی آنکھوں میں ستارے چمکتے ہیں یا جگنو جگمگاتے ہیں۔۔۔"

امیر حماد کو وہ دن یاد آیا جب انہوں نے پہلی بار اس لڑکی کو دیکھا تھا۔۔۔

اس پر ہجوم سڑک کے کنارے بے فکری سے ہنستی کھلکھلاتی چلی جا رہی تھی۔۔

وہ کسی فائل پر جھکے بابا سائیں کو اہم نکات بتا رہے تھے ۔

بابا سائیں خاموش پتھرائ آنکھوں سے باہر دیکھ رہے تھے۔۔۔یقینا ان کے ذہن میں اپنی جوان بھتیجی کی خون میں ڈوبی لاش اور کوما میں پڑے اپنے بیٹے کا وجود تھا۔۔۔ جب اچانک ان کی نظر مہر پر پڑی۔۔۔

اور ان کی طبیعت وہیں بگڑ گئی۔۔ وہ گہرے گہرے سانس لینے لگے تھے اور کانپتے ہاتھوں سے انہوں نے امیر حماد کو اس طرف متوجہ کیا تھا۔۔

امیر حماد پر حیرتوں کے پہاڑ ٹوٹے تھے اس وقت۔۔۔

انہوں نے اپنے جان سے عزیز بابا جان کی غیر ہوتی حالت کو دیکھا۔۔۔۔

اور ایک نظر اس لڑکی کو دیکھا۔۔۔۔۔

بابا سائیں مسلسل ہانپتے ہوۓ, بڑبڑا رہے تھے۔۔۔۔۔

"میری نوشین۔۔۔۔ میری نوشین۔۔۔۔۔ "

وہ ان کو یاسپٹل لے آ ۓ تھے۔۔۔

جہاں ان کی طبیعت کچھ ہی گھنٹوں میں بحال ہوئ گئ تھی۔۔۔۔

اوراس ایک رات کے اندر اندر وہ اس لڑکی کے بارے میں ہر قسم کی معلومات حاصل کر چکے تھے۔۔۔۔

اگلے دن۔۔۔۔۔

وہ اسی جگہ, ان دونوں لڑکیوں کو نظروں کے حصار میں لیے ہوۓ تھے۔۔۔۔۔۔ ڈرائیور نے ان کے کہنے پر گاڑی ان کے پاس روکی اور کسی بے تکے سے ایڈرس پر ان کے پانچ سے دس منٹ ضائع کیے۔۔۔۔۔

امیر حماد نے اس لڑکی کت ایک ایک نقش کو حفظ کیا۔۔۔۔۔

وہ نوشین فیضان علی شاہ نہیں تھی۔۔۔

لیکن۔۔۔

وہ ہو بہو , نوشین فیضان علی شاہ تھی۔۔۔۔۔

امیر حماد کی گہری نظریں اس پر جمی تھیں۔۔۔

وہ کچھ بے چین ہوئ تھی , ادھر ادھر دیکھ رہی تھی ۔۔۔

امیر حماد ساکت نظروں سے اسے دیکھتے رہے۔۔۔۔ جب اس کی نظریں کھڑکی پر رکیں اور وہ یک ٹک وہاں دیکھے گئ۔۔۔۔

تب۔۔۔ امیر حماد نے محسوس کیا, اس کی آ نکھیں۔۔۔۔۔

ہاں اس کی آ نکھیں جدا تھیں۔۔۔

اس کی آ نکھیں نوشین جیسی نہیں تھی۔۔۔۔۔

ان آنکھوں پر سے نظریں ہٹانا مشکل ہو رہا تھا۔۔۔۔

ان آنکھوں میں بہت سی روشنیاں بھری تھیں۔۔۔۔۔

امیر حماد نے رات کو ہوٹل کے بڑے سے آراستہ کمرے میں آ نکھیں موندے لیٹے بابا سائیں کو دوا دینے کے بعد ان کا ہاتھ تھام کر بہت آرام سے, آ ہستگی سے بتایا تھا۔۔۔۔ کہ وہ نوشین نہیں تھی۔۔۔ ان کی نوشین نہیں تھی۔۔۔۔

بابا سائیں نے ہولے سے ہاتھ کھینچ لیا تھا اور چہرے کا رخ موڑ لیا تھا۔۔۔۔

"بابا سائیں۔۔۔۔ " امیر حماد نے پیار سے ان کو پکارا۔۔

"بابا سائیں! ۔۔ جن کو ہم اپنے ہاتھوں سے مٹی میں دفن کر کے آ ئیں۔۔۔ وہ کبھی لوٹا نہیں کرتے۔۔۔۔

آ پ نے کیونکر باندھ لی پھر سے نوشین کی زندگی کی امید۔۔۔۔ ؟ "

وہ نرم سے لہجے میں ان کو سمجھا رہا تھا۔۔۔۔

کتنا ہی وقت خاموشی کی نظر ہو گیا ۔

"اس لڑ کی کو اٹھوا لو۔۔۔ مجھے وہ لڑکی چاہئے۔۔۔ "

کئ لمحوں بعد وہ بولے تو امیر حماد نے بے یقین سی نظروں سے انہیں دیکھا۔۔۔۔

"بابا سائیں۔۔۔۔ ؟؟"

"اسے حویلی لے جاؤ۔۔۔۔ میرے بیٹے کو ہوش آنے پر دوبارہ نہیں مرنا پڑے گا اب۔۔۔۔ وہ زندہ رہے گا۔۔۔۔ کیونکہ اب۔۔۔۔ نوشین فیضان علی شاہ زندہ ہو گئ ہے۔۔۔۔ امیر حماد۔۔۔۔ "

انہوں نے خود غرضی کی انتہا کر دی تھی ۔۔۔۔

"مگر بابا سائیں۔۔۔ اس کی اپنی ایک زندگی ہے۔۔۔ "

وہ بولے۔۔۔۔

"تو ختم کر دو اس کی زندگی۔۔۔۔ "

وہ غصے سے دھاڑے تھے۔۔۔۔۔

امیر حماد ایکدم خاموش ہوۓ۔۔۔۔۔

" جو حکم بابا سائیں۔۔۔۔ "

وہ لب بھینچے, ہاتھ باندھے انکے سامنے کھڑے ہو گیۓ ۔۔۔۔۔

امیر حماد کو اندر ہی اندر اس لڑکی کی بد قسمتی پر افسوس ہوا ۔۔

اور آ ج۔۔۔۔۔

وہ ان کے سامنے تھی۔۔۔۔

شہد رنگ آ نکھوں سے مسکراتی ہوئ۔۔۔۔

امیر حماد نے اس سے نظریں ہٹائیں اور اپنے دماغ سے اس لڑکی کے متعلق ابھرتی ہوئ ہر سوچ کو سختی سے جھٹکا۔۔۔۔

لیکن وہ سوچیں بدروح نما ہیولوں کی طرح ابھرتی ہی چلی جا رہی تھیں اور ان کے ذہن پر حاوی ہوتی جا رہی تھیں۔۔۔۔۔

____

____

وہ بڑے سے ستونوں میں سے ایک کے ساتھ سر ٹکاۓ, کھلے, وسیع فرش پر بیٹھی سامنے خلاؤں میں جانے کیا ڈھونڈ رہی تھی۔۔۔

امیر حماد بڑی سی گاڑی میں بیٹھے حویلی میں داخل ہوۓ , ساتھ چلتے منشی کو کچھ سمجھاتے ہوۓ۔۔۔ ان کی نظر مہر سلیمان پر پڑیں۔۔۔۔۔

وہ کام نمٹا کر اس کی طرف آ ۓ۔۔۔۔۔ کچھ دیر خاموشی سے اسے دیکھتے رہے۔

پھر اسی ستون سے ٹیک لگاۓ کھڑے ہو گیۓ اور سامنےنظر آ تے بلند و بالا درختوں کو دیکھنے لگے۔۔۔۔۔

"کیسی ہو۔۔۔ ؟"

وہ ان کے پکارنے پر چونکی۔۔۔۔ سر اٹھا کر ان کو دیکھا اور اٹھ کھڑی ہوئ۔۔۔۔۔

"اچھی ہوں "

"زندگی کیسی ہے ؟؟؟"

"زندگی۔۔۔۔ ؟"

وہ تلخی سے ہنسی۔۔۔

"زندگی۔۔۔ اچھی ہے, بہت اچھی۔۔۔۔ "

اس کے لہجے میں عجیب نفرت سی تھی۔۔۔۔ عجیب تلخی سی تھی, اپنی زندگی کے لیے۔۔۔۔

"نوشین۔۔۔ !"

انہوں نے اسے دیکھا۔۔۔۔۔

"نوشین۔۔۔۔ ؟؟" مہر نے دکھ بھری نظروں سے امیر حماد کو دیکھا۔۔۔۔ اسے بے حد تکلیف ہوتی۔۔۔ جب جب کوئ اسے اس نام سے پکارتا۔۔۔۔۔

"میں نے کہا تھا, عادت بنا لو اس نام کی۔۔۔۔ "

اس کی آ نکھیں لمحوں میں جل تھل ہوئیں۔۔۔۔۔

اور امیر حماد۔۔۔ وہ بنا پلک جھپکے اسے دیکھے گیۓ۔۔۔۔

وہ سر جھکا کر لب کاٹتے ہوۓ آ نسو روکنے کی ناممکن سی کوشش کرنے لگی۔۔۔۔

"اندر ہی اندر۔۔۔ بہت تکلیف ہوتی ہے۔۔۔ یہ۔۔۔ یہ سب۔۔۔ برداشت سے باہر ہے۔۔۔۔ " وہ بھیگے لہجے میں کرب سے بول رہی تھی۔۔۔۔۔

"مجھے امی۔۔۔ ابا جان بہت یاد آ تے ہیں۔۔۔ "

اس نے سر اٹھا کر آ نسو بھری نظروں سے امیر حماد کو دیکھا۔۔۔۔ اس کی آنکھوں میں التجا تھی۔۔۔۔

"مجھے وہ بہت یاد آ تے ہیں۔۔۔۔ میرے اپنے۔۔۔۔ "

وہ کسی ایسے معصوم بچے کی طرح ان کو دیکھ رہی تھی جو اپنی من پسند چیز لینے کیلیۓ مچل رہا ہو۔۔۔۔

"مجھے وہ بہت یاد آ تے ہیں۔۔۔۔۔۔

" ۔۔۔۔ وہ چہرہ ہاتھوں میں چھپاۓ سسک اٹھی تھی۔۔۔۔

اس کی سسکیاں امیر حماد کے ذہن پر ہتھوڑوں کی طرح برس رہی تھی ۔۔۔۔

وہ بہت دیر تک روتی رہی اور امیر حماد اسے دیکھتے رہے۔۔۔۔ ان کو سامنے کھڑی مہر سلیمان میں کوئ اور نظر آ رہا تھا۔۔۔۔۔ ایک معصوم سا تیرہ سالہ لڑکا۔۔۔۔ جو سسک رہا تھا ۔۔۔۔

اور سامنے بیٹھے اونچے شملے والے جاگیر دار سے کہہ رہا تھا۔۔۔۔

"مجھے امی ابو بہت یاد آتے ہیں بابا سائیں۔۔۔ مجھے وہ بہت یاد آ تے ہیں۔۔۔۔۔

۔۔۔۔۔۔۔۔۔۔

۔۔۔۔۔۔۔۔۔

مجھے وہ بہت یاد آ تے ہیں مہر ۔۔۔۔۔ "

وہ کہیں دور کھوۓ ہوۓ بول رہے تھے۔۔۔۔۔

مہر نے چونک کر سر اٹھایا۔۔۔ دنوں بعد اس کو اس کے اپنے نام سے پکارا تھا انہوں نے۔۔۔

"مجھے بھی میرے اپنے بہت یاد آتے ہیں۔۔۔ مہر سلیمان۔۔۔۔ "

وہ یہاں نہیں تھے۔۔۔ وہ کہیں اور تھے۔۔۔ دور, یہاں سے بہت دور۔۔۔ بہت پیچھے کہیں ماضی میں۔۔۔۔۔

____________