منظور حسین منظورؔ کی شاعری

قرار میڈا توں لُٹ کِدھا اے قرار تیکوں نصیب ہووے
وفا دی راہ اچ خلوص دا اے معیار تیکوں نصیب ہووے

ہیں اپنٹریں مرضی دا آپ مالک توں جیں کوں چاہویں اُجاڑ چھوڑیں
دلاں نوں توڑن دا اِے حسین کاروبار تیکوں نصیب ہووے

توں جگ تے جیویں دُکھی نہ تیویں ہمیشہ عزت مقام ہووی
اِے حسن جوبن جوانی تے اِے سنگھار تیکوں نصیب ہووے

اساں تاں اپنٹریں گذار گئے ہاں اَخیری بازی وی ہار گے ہاں
اے زندگی دی بہار شالا ہزار تیکوں نصیب ہووے

اَساں تاں غم دے خود بچاری اَساں کوں خوشیاں دی کیا تمنا
وَفا محبت خوشی تے عزت وقار تیکوں نصیب ہووے

اَساں مسافر ہاں ٹُردے پھردے جے اَج اِیتھاں ہاں تے کل اُتھاں ہاں
اِے تیڈا سوہنٹراں تے ہسدا وَسدا دیار تیکوں نصیب ہووے

اَساں تاں منظورؔ ہاں دعا گوں توں آ ساڈی ہر دم ایہو دعا اِے
قدم قدم تے اے ساری دھرتی دا پیار تیکوں نصیب ہووے