رئیس الدین رئیس(علی گڑھ)
مِرے ہنر پہ نہیں صرف نکتہ چیں خاموش
ہنوز آسماں حیران ہے، زمیں خاموش
میں ان کے بیچ میں بیٹھا ہوا ہوں چپ سادھے
گمان ذہن پہ غالب ہے اور یقیں خاموش
کوئی نشان بظاہر نہ میں نے چھوڑا تھا
میں کیا کروں جو نہیں میری آستیں خاموش
وصال و ہجر کے لمحے زباں نہیں رکھتے
یہ کون ہے مِرے دل میں کہ جو نہیں خاموش
ترس رہے ہیں کئی آستانے سجدوں میں
تمہارے در پہ پڑی ہے مِری جبیں خاموش
مخالفین نے تم سے بہت سوال کیے
تمہارے سامنے بیٹھے رہے ہمیں خاموش
تمام شہر پہ سکتہ سا ہے رئیسؔ مگر
نہ جانے کیوں مِرے دل کا مکیں نہیں خاموش
