جدید ادب جرمنی۔ شمارہ نمبر ۹

سہیل احمد صدیقی(کراچی)

زندگی کیا ہے‘ رات گزری ہے

گیسوؤں میں حیات گزری ہے

کیا بھلا فائدہ ہو شبنم سے

جب خزاں پات پات گزری ہے

محوِ حیرت ہو ں چشمِ جاناں سے

جگنوؤں کی برات گزری ہے

ہم سے ملتار ہا ہے مہرِ دونیم

کس قیامت کی رات گزری ہے

آتش گل بجھائے گا کیسے

اُ س کے سر سے یہ بات گزری ہے

فصلِ گل جب کبھی ادھر آئی

ہم سے بے التفات گزری ہے

تذکرہ پھر سہیلؔ مضطر کا

رات گزری ہے ‘ بات گزری ہے