ن۔م۔راشد
سلیماں سر بزانواور سبا ویراں
سبا ویراں،سبا آسیب کا مسکن
سبا آلام کا انبارِ بے پایاں
گیاہ و سبزہ و گِل سے جہاں خالی
ہوائیں تشنۂ باراں
طیور اس دشت کے منقار زیرِ پر
تو سرمہ در گلو انساں
سلیماں سر بزانو اور سبا ویراں!
سلیماں سربزانو،ترشرو،غمگیں،پریشاں مُو
جہانگیری،جہاں بانی،فقط طرارۂ آہو
محبت شعلۂ پرّاں،ہوس بوئے گلِ بے بو
زراز دہر کمتر گو!
سبا ویراں کہ اب تک اس زمیں پر ہیں
کسی عیار سے غارتگروں کے نقش پایابی
سبا باقی نہ مہروئے سبا باقی!
سلیماں سر بزانو
اب کہاں سے قاصدِ فرخندہ پَے آئے
کہاں سے ،کس سبو سے،کاسۂ پِیری میں مَے آئے
