محمد طاہر رزاقی(مرادآباد)
سکوتِ شب کا کوئی ہم زباں تلاش کریں
کہ اشک اشک چلو کارواں تلاش کریں
خموشیوں کی زباں میں ہے گفتگو کرنی
بدن سرائے میں اک رازداں تلاش کریں
ابھی تو موجِ حوادث سے ہی الجھنا ہے
ہوا رُکے تو کوئی بادباں تلاش کریں
اب اس جہاں کی وسعت سے ہے پرے تخئیل
’’نئی زمین،نیا آسماں تلاش کریں
سماعتوں میں جو دنیا کی مدتوں گونجے
وہ لہجہ اور وہ حسنِ بیاں تلاش کریں
تمام عمر کیا ہے تمازتوں کا سفر
تھکن بہت ہے،چلو سائباں تلاش کریں
کتابِ زیست کی تزئین یوں کریں طاہرؔ
کہ لفظ لفظ کوئی کہکشاں تلاش کریں
