صبا اکبر آبادی (مرحوم)
اللہ کی رحمت ہے محمدؑ کے لئے
تکمیلِ رسالت ہے محمد کے لئے
ہوتے نہ محمد تو نہ ہوتا کچھ بھی
کونین کی خلقت ہے محمد کے لئے
ہر نور میں تحلیل تمہارا جلوہ
ہر سورۂ تنزیل تمہارا جلوہ
اسلام کے ارکان ، تمہاری سیرت
اسلام کی تکمیل تمہارا جلوہ
ہے دینِ خوش انجام تمہارے دم سے
قرآں کے ہیں احکام تمہارے دم سے
اے صلِ علیٰ ہے یہ تمہارا اعجاز
اسلام ہے اسلام تمہارے دم سے
آداب و عقیدت کے مقامات ہیں اور
آثارِ امامت کے مقامات ہیں اور
کیا سدرہ ہے کیا عرش و حجابِ عظمت
انوارِ نبوت کے مقامات ہیں اور
