رئیس الدین رئیس(علی گڑھ)
تازگی گلشنِ کونین میں ہر سُو جاگے
ذکرِ سرکارؐ ہو کچھ ایسے کہ خوشبو جاگے
اُنؐکے الفاظ نے دنیا کو اجالا بخشا
جس طرح ظلمتِ شب تاب میں جگنو جاگے
تجھ کو خاطر میں نہ لائیں گے فدایانِ رسولؐ
لاکھ اے گردشِ دوراں ترا جادو جاگے
اب تو روضے کی زیارت ہو نصیب آنکھوں کو
اب تو آنکھوں میں سلگتے ہوئے آنسو جاگے
ہو کرم شاہِ اُممؐ رزم گہہ ہستی میں
تازہ ایماں ہو مِری غیرتِ بازو جاگے
تھام لے دستِ عمل سے رئیسؔ اب وہ دامن
جاگے سوئی ہوئی تقدیر اگر تو جاگے
